Ipilu 11 - Ata New Testament

Tava'u so lopala

¹ Ioxe, lopala ne talulusou aloxo 'o. Mimi ane talopalanu taxomaiou la talavu manina lexe uxali ane. Xe mimi mose'i tasaxisou no ienge uasi ia oponenge ututuluousi.

² Xo ane'i so tatei milopala noxou Mosinge la anu mu'osasi'axu.

³ Mo xo no anu lopalasi laso talamana lexe lialia ilou loxotolo muxali no anu vaikalaou Mosingesi. Mo talavu lexe mimi ane tasaxisou no pa'upa'umenge la muxali no anu ane tasaxisou no ienge uasi.

Inoki mo Noa mo Aveli milopalasi

⁴ Xo no anu lopalasi laso Aveli mulaixu mi vile noxou Mosinge ane lailaixe manina no anu mi e Kaini mulaixu. Ioxe, Aveli mulaixu no anu lopala laso Mosinge mu'osasou mi ne mo muvikalasou lexe anu itema mulapusi. Laso manina, anu musoli ia no anu lopala noxousi la anu a upepe­la'inge vaimomo 'o.

⁵ Xo no anu lopalasi laso Mosinge muno'u Inoki mutelaixu no tuala­sou mo usoli uasi. Xe tamitema mikakamulinu ia ixalisou uasi xo Mosinge muno'usi. La vaikalaou Mosinge uvikala lexe tei loxo uxoxolusio utelai uao, la Mosinge u'osasou.

⁶ Xo loxo no anu lopala uasi la umomomo uasi manina so Mosinge u'osasou itema. Laso loxo itema umasaxau ulavusou Mosinge la masi ulopala tei lexe Mosinge uxolu. Mo ulopala lexe tamitema ta'ei tane'i u'oxoxu Mosinge la anu ukolinu mo u'oxone'i laixe.

⁷ Xo no anu lopalasi laso Mosinge muveletalosou Noa no anu mimi so uxali ili'i la mulomuxu. Xo mimi ne usaxisou uao ia mumama'u laso mulalaxinu lasipi so oli'a ta'olu ixalisou pamauli no anu. Ioxe, lopala noxou Noa ne mupala'anixu ilixo masumasua noxi'a tatemanu lialia lexe opone'i pakia'usi. Ia noxou, la Mosinge mu'osasouxu lopala noxou laso mulemolu lexe anu itema mulapusi.

Apala'amu olie Sala milopalasi

⁸ Xo no anu lopalasi laso no voxo Mosinge mu'avalou Apala'amu la anu mulomuxu mo mulutu mulai no tuala ane Mosinge muvavalimasou lexe ulosou. Mulutu mulai ia ulavusou lexe ulai ne'ei uasi.

⁹ Mo xo no anu lopalasi laso mutalu­pexa loxo asila no anu xale lia Mosinge muvavalimasou ne. La utulusou tani maninasou uasi, oli'a Aisaki xe Iakovo mi'ala'alaxu laselisi so ixoxomaiou nene'axu vavalima.

¹⁰ Xo mi e Apala'amu tanu u'oxoxu a tuala ane tava'u pumuxusi. Tuala ne Mosinge molu so upilenimunu mo utulusou.

¹¹ Xo no anu lopalasi laso Sala miua'ulixu voxo so ipala ia milo­pala noxou Mosinge lexe uxalixu nene'axu vavalima noxou. Milo­pala laso maixene mune'e la anu mu'oxo vote'i so mivo'onu ilie.

¹² Mo noxou mulue kalumo anu loxo vasimolu musoli mukalu so upalala uasi. Ia noxou la ta'ilusunu mixali navasi'a tatila loxo tataoto no loxotolo. Ta'itisi'a uasi xo ane'i milolutu e milolutu a loxo io'iio'i no luaki 'o.

¹³ Ioxe, tamitema ano'o mukalusi milopala noxou Mosinge umo­momo avile no anu soli noxi'a. Ane'i ixoxolusio la ixalisou nene'axu vavalima noxou Mosinge uao. Anu loxo mitulu mo misu'anu ie'iou mimi lailaixe ne a uxolu nopaxasio ia opone'i muleilaxu. Mo ane'i imama'u uasi so ivikala lamana lexe ane'i mutuxu tuala ano'o uasi, ane'i loxo taasila no lialiasi.

¹⁴ Xe loxo ilemolu vaikala axone la anu so upela'inge lexe ane'i tane'i u'oxoxu xale lia vile noxi'a u'isalili so ixalisou.

¹⁵ Xo loxo mimasaxau xale lia aneva milutu no anu tei la ane'i masi imomomo so ilivu ane.

¹⁶ Ia uasi, xo opone'i mutatamasou xale lia ane lailaixe, xale lia e tualasou Mosinge. Xe tamitema anene loxo imoxo'u Mosinge lexe anu Mosi'a u'isalili la anu umaila no anu uasi xo a mulalaxinu taoni noxi'amo.

¹⁷ Xo no anu lopalasi laso no voxo loxo Mosinge mutovonu Apala'amu la anu oponu so upilixinu mauli noxou Aisaki so lexe noxou Mosinge. Apala'amu ne anu mosou e muxalisou vavalima ia u'apisou olu soxu ne uasi, mulalaxi so uvau usoli.

¹⁸ Xo tei la Mosinge muvikalanu Apala'amu aloxo 'o, “Ta'ilusuneni ixali no anu vote'i noxou Aisakisi.”

¹⁹ Ia Apala'amu oponu mutulu lexe Mosinge umomomo so utulusi'a tamitema no anu soli. Laso anu muxali latilo­vosou mi ne xo Aisaki loxo musoli ka Mosinge mu'umenu no anu mo mulivunoxu noxou momula.

Aisaki mo Iakovo mo Iosepu milopalasi

²⁰ Xo no anu lopalasi laso Aisaki muvikala laixe so xoluxoluxa'a Iakovo ilou Iso. La mulemolu mimi ane so uxalisi'a ili'i.

²¹ Mo xo no anu lopalasi laso no voxo loxo Iakovo so usoli la muvikala laixe so xoluxoluxa'a Iosepu ta'olu tamulu kalumo. La mutulu muto­sopenu no anu vilaxo kisou so mu'itinu Mosinge ualasou.

²² Mo xo no anu lopalasi laso no voxo loxo Iosepu so usoli la mulemolu vaikala lexe ili'i la Ta'isilaeli ilala ne Isipi. Xe muvikala lamana lexe usoli xo xe ili'i la inavanu xinuxinu.

Mosisi mulopalasi

²³ Xo no anu lopalasi laso no voxo loxo Mosisi muvo'o la nenu ilou momu mimaisou lexe molomolo lailaixe laso mitalumeu muxolu so'io tatalu. Ilou i'ume uasi, mixola'u voto masua noxou kingisi.

²⁴ Mo xo no anu lopalasi laso loxo Mosisi mutilae xe loxo tamotu milemolu lexe anu kingi olu ilie la oponu muxililiou.

²⁵ Oponu muxililiou tanixu xoluxolu se'isisi ilou susu ane umumosou masa­masaxa no anu vasimolu ne. Xo mu'oxo lexe, “Uasi, mi ne ukalu paleasi ane. Eni alai apita noxi'a tamitemaou Mosinge. Xo manina, itavulenu tu'umaxu no avo'a Ta'isipi, ia mi vile uasi, a'una no anu xoluxoluxa'asi.

²⁶ Xo loxo axolu ne Isipi 'o la masi axolu no latanu mimi. Mo loxo a'una noxi'a olele la atavulenu maila no anu ualasou Itema Mosinge musoso­vosou. Ia mi vile uasi, xo lakolisou ane so axalisou ili'i ne lailaixe mo uua'ulixu ano'o avile.”

²⁷ Mo xo no anu lopalasi laso Mosisi muxexe­sou xale lia ne Isipi, u'umolu la'ia noxou kingi uasi. Xo manina, nenge tamitema vote'i so tasaxisou Mosinge no ienge uasi. Ia noxou Mosisi la mutulu pumuxu avile axone la anu loxo musaxisou no iou lavo'onu ane.

²⁸ Mo xo no anu lopalasi laso anu mulomuxu voto so Mualasi'a. Laso mipeipeinu sialu mo so anu ane so umamulone'i laposalaxa'a Ta'isipi la uxalisi'a Ta'isilaeli uasi.

Ta'isilaeli mose'ila milopalasi

²⁹ Xo no anu lopalasi laso Ta'isi­laeli mixali xalevile no anu Luaki Lauoinu mo mimuamua'i no anu lia esi'esisi. Ia loxo Ta'isipi mito­vonu so imuline'i la mi'uo'ousi.

³⁰ Mo xo no anu lopalasi la Ta'isilaeli mimuamua'i mixixaou­sou vimelusou taoni Ieliko voxo 7 sika vimelu ne mumamulosi.

³¹ Mo xo no anu lopalasi laso sema so vote'i e La'apu misu'uline'i tamitema so kililo tamei e mine'e no tuala ne. Misu'uline'i laso no voxo loxo tatemanu tuala ne mimamulo la ane uasi, mixolu laixesi.

³² Ia aa'alo avile axova? Xo loxo aa'aloxu lopala noxi'a tamitema mukalusi la voxo umomomo to uasi. A tamitema loxo Xiteoni mo Valaki mo Samisoni mo Iepita mo Teviti mo Samueli mo tapolopeti.

³³ Xo no anu lopalasi laso ane'i tamitema ane xo ne la miua'ulixa'a takingi oli'a ta'amii'a xe mi'oxonu xaixai mutiatila mo mulapusi mo mixalisou vavalima noxou Mosinge mo mitanuxu talaioni anaxa'a.

³⁴ Xe misitanuxu navu xavinu toxoxa'a mo mimaxalexu laviso so oto anaxu. Ane'i ne pelesi'asi ia mune'e la xavine'i so mi'otoxa'a ta'ami so tuala nopaxapaxa loxo ine'e. Xavine'i laso mikusai'a i'ume avile.

³⁵ Xe noxi'a se'i la misoisoli ia mitulu mimaulila la milivu noxi'a taneni'a. Ioxe, noxi'a se'i la mixolu mikala­vusu mo taxilili mimamulonu vasime'a so lexe ixiunu tumali'aou lopala noxi'a. Ia uasi, mitetelisou mumomomo avile no anu soli xo opone'i ututuluou voxo lailaixe so Mosinge utulusinge tamitemaou no anu soli.

³⁶ Xe ane'i mose'i la taxilili mimolo sukusi'a mo mipua­puasi'a mo miloilokisi'a no anu seni mo mimuxala'a no lakalavusu.

³⁷ Xe milealeaxa'a no anu lavo'o so ive'a isoli mo mixotonu vasi­me'a no anu laso so muxali mautunu tamei mo mive'ave'a misoisoli no anu laviso so oto. Xe se'i noxi'a lavalava uasi, misakinu sipisipi ilou koti sosousi. Xe ane'i mixolu loxo ta'oloxola mo mita­vulenu navunavu mo tu'umaxu no avo'a tamitema.

³⁸ Xe ane'i tani uasi, mixixaoxao vitanisi no xale lia esi'esi mo no la'ola'olu mo mixolu no anu maia taxataxanu mo no lia taxataxanusi. Ai, lialia ano'o laixe umomomo so tamitema ane xo ne ixolu no anu to uasi!

³⁹ Xo no anu lopalasi laso Mosinge mu'osasi'a tamitema anene muka­lusi ia ixalisou nene'axu vavalima noxou uao.

⁴⁰ Xo mi ane Mosinge mulalaxinu lexe u'oxonu singe la uua'ulixu anene, laso uxalixu nene'axu noxi'a kolokolo uasi. U'oxonu aloxo 'o. Mi ane muvavalimasou so si'a xe ane so singe la upitanu vilesisi mo so uxali laixe loloni.