Hechos 16 - Nuevo Testamento Tzeltal de AmatenangoTe Timoteo la sjoyin ta beel te jPablo sok te Silase 1 Te jPablo sok te Silase laj kꞌot ta jtejklum Derbe sok ta jtejklum Listra. Teꞌ la staik jtul hermano te jTimoteo sbiile, yal jtul juriyo-ants te hermanae. Te state griego-winik stukel. 2 Te hermanoetik te ba Listra sok te ba Iconioe ben lek skꞌoplal yuꞌunik te jTimoteoe. 3 Te jPabloe la skꞌan te ya sjoyin te jTimoteoe, pero nail a yaꞌbe yichꞌ sirkunsision yuꞌun jich makꞌ xlijk ta kꞌop a te juriyoetik te teꞌ kuxajtik ae. Porke snaꞌojik ta spisilik te stat jTimoteoe griego-winik stukel. 4 Ta spisil te jtejklum te ba ya xkꞌaxike, jaꞌ a yalbeyik te hermanoetik te tut mantal a xchap te apostoletik sok ansianoetik yuꞌun te hermanoetik ta Jerusalene. 5 Jicha junub yoꞌtanik ta xchꞌuunel Dios te juju-tijkꞌ hermanoetike, y te hermanoetike jujun kꞌaal a lijk pꞌolikuk. Ta xwayuch te jPabloe la yil jtul macedonia-winik 6 Beenik kꞌaxel ta estado Frigia sok ta estado Galacia, porke komot yuꞌun te Chꞌul Espíritu te ya xkꞌa yal skꞌop Dios te ba estado Asiae. 7 Jicha laj kꞌot ta slum Misia. Kꞌan snopik te ya xlaj och ta estado Bitinia, pero maꞌ akꞌotik ochel yuꞌun te Espíritu yuꞌun te Jesuse. 8 Toj nax a kꞌaxik bael ta estado Misia. Jich koel a laj bajt ta jtejklum Troas te ay ta tiꞌmare. 9 Teꞌ ay tut aꞌbot yil ta xwayuch ta ajkꞌubal a te jPabloe. La yil jtul winik ta estado yuꞌun Macedonia te tekꞌel ta skꞌanel pawore. Jicha albot yuꞌun: “Kꞌaxan me bael ta Macedonia, yuꞌun ya xtal akoltayotik”, xꞌutot. 10 Te tutꞌil jich a yil ta xwayuch te jPabloe, jich a jchap jbajtik ta ora y bootik ta estado Macedonia, yuꞌun batsꞌi jaꞌ a yalbotik te Diose te ya yikꞌotik ta yalel teꞌa te lek achꞌ kꞌope. Te jPablo sok te Silase ayik ta jtejklum Filipos 11 Jich a mootik bael ta barko teꞌa te ba jtejklum Troase, y toj a bootik ta slum Samotracia te joybil ta mare. Ta xchebal kꞌaal kꞌootik ta jtejklum Neapolis. 12 Teꞌ lijkotik bael a y bootik ta jtejklum Filipos, te jaꞌ kolonia yuꞌun te Romae y jaꞌ ben aꞌbil ta jkuenta ta estado Macedonia. Teꞌ jalajotik cheꞌoxeb kꞌaal a. 13 Ta jun skꞌaalel kuxo-oꞌtan lokꞌotik bael ta tiꞌ jtejklum te ay ta tiꞌjae, te ba kꞌayemik te ya stsob sbaik ta skꞌoponel Diose. Teꞌ jnakan bajtik a, y la kalbeytik yaꞌiy te lekil achꞌ kꞌop te antstik te teꞌ ya stsob sbaik ae. 14 Ay jtul ants te teꞌey ae, xLidia sbiil, te lijkem tal ta jtejklum Tiatirae. Jaꞌ yaꞌtelinej xchonel te ben tsaꞌam tsajal ijkꞌsukantik pakꞌ te ben toyol stojole. Te ants to ben lek xchꞌuunej te Diose, yipal ta yaꞌiyel te tut ya yal te jPabloe te nikbot yoꞌtan yuꞌun te Kajwaltike. 15 Jicha aꞌbot yichꞌ jaꞌ sok spisil te machꞌa ay yuꞌun te snae. Ta patil la skꞌanbe pawor: —Teme la anaꞌikix te batsꞌi jun koꞌtan jchꞌuunej te Kajwaltike, laꞌ me, olananik liꞌ ba jnae —xchi. Y puersa a yalbotik te teꞌ ya xꞌanotik ae. 16 Ay jun buelta ay tut kꞌot ta pasel te kꞌalal yipalotik kꞌael ta beel a te ba luwar ba ya xba jkꞌopontik Diose. La staotik jtul achꞌix te nainbil yoꞌtan yuꞌun te pukuje, y ya snaꞌ xchiknatesel te tutꞌil ya xkꞌot ta pasele. Ay chaꞌoxtul yajwal te bayal ya spas ganar a te tut ya snaꞌ xchiknatesele. 17 Te achꞌix to lijk stsꞌakliyotik sok te jPabloe y xꞌawte xꞌawte ta yalel: —Te winketik to, jaꞌ jꞌaꞌteletik yuꞌun te Dios te ay ta chꞌuchane. Jaꞌ ya yalbeyex te tutꞌil ay te sbeelel kolele —xchi ta yalel. 18 Bayal kaal te jich a spas te achꞌixe. Te jPabloe maꞌ kujchix yuꞌun a te tut yipal ta spasele. Jicha sujtes sba y la yalbe te pukuj te nainbil yuꞌun te yoꞌtane: —Ta skuenta te Jesucristoe ya kalbeyat mantal te ya xlokꞌat ta yoꞌtan te achꞌixe —xyut. Mismo ora a lokꞌ bael te pukuje. 19 Pero te yajwale la yilik te ma staikix takꞌin ta skuenta a te achꞌixe. La stsakik te jPabloe sok te Silase y la yikꞌik bael ta parke ta stojol te juꞌeletike. 20 La stejkꞌanik ta stojol te alkaletike y la yalbeyik: —Te juriyoetik to yipalik ta yixlanel te jlumaltike. 21 Y ya snojpeswan ta kostumbreetik te ma xjuꞌ ya jnoptik sok ma spas ya jchꞌuuntik, porke jromaotik —xchiik. 22 Jich te gentee lijk skontrainik euk. Te alkaletike la yakꞌik mantal te ya slokꞌeslanbot skꞌuꞌ-spakꞌik te jPablo sok te Silase, sok te ya yichꞌ majel ta teꞌ. 23 Patil te lom bayalix a smajik ae, la yotsesik ta prexo. Pasot ta mantal te jkanan-prexoe te lek me ya skanantaye. 24 Te tutꞌil la yichꞌix mantal, te jkanan-prexoe la yotses bael kꞌalal ta último srinkonal te prexoe, y la xojbe jilel yok ta jutbil teꞌ. 25 Pero olil ajkꞌubal a te jPablo sok te Silase yipalik ta skꞌoponel Dios a sok yipalik ta kꞌayoj a, y te yan jprexojeletike yipalik ta yaꞌiyel. 26 Y ora nax a tal ben tulan jikichab y la snikbe yipajib te prexoe. Y ora nax a jeꞌ spisil te puertaetike, y la jpol te kadenaetik te chukajtik a te jprexojeletike. 27 Kꞌalal kux yoꞌtan te jkanan-prexoe, la yil jeꞌajtikix a te puertaetik yuꞌun prexoe. La stas lokꞌel spuñal, kꞌan smil sba yuꞌun la skuy te anemikix lokꞌel a te jprexojeletike. 28 Pero te jPabloe tulan a yawutay: —Ma me amil aba. Jpisiltik me liꞌ ayotik to —xchi ta yalbeyel. 29 Jich te jkanan-prexoe la skꞌan tal kꞌajkꞌ yuꞌun ya yil a. Xyalet ochel, y ben xlilinot ta sik yuꞌun xiꞌel, kꞌo skejan sba ta yok te jPablo sok te Silase. 30 Te nax a la yikꞌtalan lokꞌel y la sjojkꞌobe: —¿Moletik, tut lek ya skꞌan jpas yuꞌun ya xkolon ae? —xchi. 31 Te jPablo sok te Silase la sjakꞌbeyik: —Chꞌuuna te Kajwaltik Jesuse. Jich ya xkolat sok spisil te machꞌatik ay awuꞌune —xchiik. 32 Y la yalbeyik te skꞌop Kajwaltike stukel sok spisil te machꞌatik ay yuꞌun ta snae. 33 Mismo ora ajkꞌubal a te jkanan-prexoe la yikꞌ bael ba spokbe te yejchꞌene, y te nax a akꞌtalanbot yichꞌ jaꞌ spisil sok te machꞌatik ay yuꞌune. 34 Patil la yikꞌtalan bael ta sna y la yakꞌtalanbe sweꞌel. Stukel sok te machꞌatik ay yuꞌune ben kontentoik yuꞌun te la xchꞌuunikix te Diose. 35 Kꞌalal sakub te kꞌinale, te alkaletike la stikon bael polisiaetik ta stojol te jkanan-prexoe, yichꞌojik bael mantal te ya skolesik te jPablo sok te Silase. 36 Te jkanan-prexoe la yalbe te jPabloe: —Te alkaletike la yaꞌbonix mantal te ya jkolesex baele. Jaꞌ yuꞌun, junuk awoꞌtanik xbaex —xchi. 37 Pero te jPabloe la yalbe te polisiaetike: —Te joꞌotik te japubilotik ta Romae la kichꞌtik majel ta sitil komon, y ma nailuk a sjojkꞌobelotik, y ba yotseselotik ta prexo. Y ora to mukul nax ya skꞌan skolesotik lokꞌel. ¡Ma spas! Aꞌ taluk mismo stukelik, aꞌ tal slokꞌesotik bael —xchi te jPabloe. 38 Te polisiaetike ba yaꞌbe snaꞌ te alakletike. Kꞌal ta yoꞌtanik yuꞌun te la yaꞌiyik te japuybil ta Roma te jPablo sok te Silase. 39 Jicha laj tal te alkaletike, tal skꞌanbeyik perdon ta stojol te jPablo sok te Silase. La slokꞌeslan bael y la skꞌanbeyik pawor te yauk xlokꞌik bael te ba jtejklume. 40 Te kꞌalal lokꞌik bael ta prexo te jPablo sok te Silase, toj a la jbajt ta sna xLidia. Y ta patil te la yilikix a te hermanoetike sok te la yaꞌbe spuersa yoꞌtanike, laj bajt. |
Nuevo Testamento Tzeltal de Amatenango © Sociedad Bíblica de México, 2006.
Bible Society of Mexico