NEHEMÍAS 6 - Wuj Pa K'ubultzij

Kkich'ob' ukamsaxik ma Nehemías

¹ Are xketamaj ma Sanbalat, ma Tobías, ma Gesem aj Arabia xaq jub'an chik ajch'oj chqij chi yin xinyijb'a i tapial chi nim uwach, lik nti jun ik'awb'al xinya kanoq (tupu maja kinkoj uchija pa taq uk'ijib'al),

² are uri ma Sanbalat xaq ma Gesem xkitaq li jun tzijol chwe man kqamol qib' chila che jun chke ta'aj pa tinimit Ono. Xwiri, are i kich'ob'onik ike are u'anik jun utz taj chwe.

³ Are uri, yin xintaq b'i ajb'il tzij chub'ixkil chke chi yin latz'ab'naq inwach che jun chak chi lik rajwaxik, rumali chi k-antaj ti in-enam, man we kin-ek kch'aqi kan i chak.

⁴ Kajmul xkitaq li tzijol le, xaq yin keje ula'ik uwach ile kin-an b'i chke, chi k-antaj ti wumal.

⁵ Chujo'mul, ma Sanbalat xutaq li jun rajchak chi xuk'am chal i tzijol le chwe chupam jun wuj chi jaqal chik uwach,

⁶ chi keje iri kub'ij: “Ketijin i winaq chulapik, xaq keje kub'ij ma Gesem, chi yet xaq aj Israel kixtijin chuch'ob'ik jun qelanik, rumali chi kixtijin chuyijb'axik i tapial chi nim uwach. I tzij chi kkilap i winaq le, ke'eloq chi yet katk'iji ni pkajawinel ike,

⁷ xaq je ayijb'am chik aj profeta man are ike kkisaqij na chi yet at ajawinel pa Jerusalén xaq pa Judá. I tzij le kretamaj i ajawinel chi ma Artajerjes, rumali utz we katpetik man keje ile kojlapan na.”

⁸ Are uri yin xintaq b'i ub'ixkil che: Konojel i winaq nti ketijin chub'ixkil, ile xa to' anojim li ub'ixkil yet.

⁹ Man ike kkaj te'eq kojkixib'ij, ike xkich'ob'o chi yoj kqaj qak'ux xaq kqamayij i chak; xwiri yin xa mas xinkowij ink'ux chu'anik i chak.

¹⁰ Te'uri xin-e chi rachoch ma Semaías, chi uk'ojol ma Delaía, xaq ri umam ma Mehetabel, chi xutz'apij rib' chupam rachoch, xub'ij chwe: “Jo' prachoch i Dios, chqamolo qib' chupam xaq chqatz'apij uchija man che i a'ab'i kek'un chakamsaxik, xata, lik kek'un chakamsaxik.”

¹¹ Xwiri yin xinb'ij che: “I achiyab' pacha yin ke'anmaj taj, xaq kkimina ti kib' prachoch i Dios re tob'al kib'. Yin kin-an ti ile.”

¹² Xwi ta la ile, xaq xinnab'ej chi ronojel ni'pa kub'ij ru' ti Dios petnaq wi, xub'ij ile tzaqsab'al we man tojom kumal ma Sanbalat xaq ma Tobías;

¹³ xkitojo xib'b'al we, man keje ile yin kinmakunik. Keje ile xaqmanal kkich'ach'a chwij qajsab'al in-ij.

¹⁴ ¡Wajwal Dios: Chk'un chak'ux wach u'anom ma Sanbalat xaq ma Tobías! ¡Xaq keje ile x-on ati Noadías chi ati profeta xaq jub'an chik profeta chi xkaj inxib'ixik!

¹⁵ I tapial chi nim uwach xutzin che i ij jo'ob' juwinaq (25) re i ik' Elul, i chak le kab'lajuj kawinaq (52) ij xki'an chu'anik.

¹⁶ Are xketamaj i je ajch'oj chqij xaq i jalajuj taq tinimit chi je o chqij chqawach, lik xkixij kib' xaq xpe kik'ix man xkinab'ej chi i chak le x-antajik man i Qajwal Dios xojuto.

¹⁷ Che taq i ij le lik je k'i winaq aj Judá chi nimaq kopis xkitaq b'i wuj che ma Tobías xaq ma Tobías kutaq b'i wuj chke ike,

¹⁸ man je k'i i winaq aj Judá le kib'im chi kiya'om kiwach ru' ma Tobías, man uji' ma Secanías, chi uk'ojol ma Ara; xaq uk'ojol chi ma Johanán xk'uli ru' umi'al ma Mesulam, chi uk'ojol ma Berequías.

¹⁹ Keje uri ile chi lik chinwach yin kkikoj u'ij, xaq kkilap ronojel che ni'pa kinlap yin. I ma Tobías le kutaq li wuj wu', xib'b'al we.