NEHEMÍAS 4 - Wuj Pa K'ubultzij

I aj Israel keyo'yax kumal i je ajch'oj chkij

¹ Are xretamaj ma Sanbalat chi kojtijin chuyijb'axik i tapial chi nim uwach, lik xpe jun nim laj roywal, are uri xujeq kiyo'yaxik aj Israel,

² xub'ij chkiwach i rachi'il xaq chkiwach achiyab' chi je yij che i ch'oj aj Samaria: “¿Wach taq ki'ij aj Israel le, ya ne kekamik? ¿Kkich'ob' wa ike le chi kya' chik chke chi kkiporoj chik kisipon? ¿Kkich'ob' wa ike chi xa jun ij kki'an che i chak le? ¿Xatab'a kkich'ob' ike chi che i t'ub'aj k'atnaq ab'aj le, kkesaj chik k'ak' ab'aj?”

³ Xwi ta la ile, xaq ma Tobías chi aj Amón xuya uwach ru' ma Sanbalat, man xub'ij: “Chiwila pe i tapial chi ketijin chu'anik le, xa ne jun ixim utiw kuwulijsaj loq we k-an puwi.”

Ulapanik ma Nehemías ru' i Dios

⁴ Are uri yin xinlapan ru' i Dios, xinb'ij: “Qajwal Dios: Chata wach qayo'yaxik kki'ano. Cha'ana na chi ronojel ni'pa i utz taj chi kkirayij chqe, chkik'ulmaj ni ike, chetzaq ni pki'ab' i ajch'oj chkij xaq chek'am nu b'i che jun chik tinimit naj.

⁵ Makuy ni'pa itzel laj taq anik chi kki'ano xaq makuy kimak chke, man kiyo'yam ni'pa i ketijin chuyijb'axik i tapial chi nim uwach.”

Uch'ach'axik i kamsanik kumal i je ajch'oj chkij

⁶ Yoj xqamayij ti uyakik i tapial chi nim uwach chi qayakom chik nik'aj che. I winaq lik kekikot chu'anik i chak.

⁷ Xwiri, are xketamaj ma Sanbalat, ma Tobías, je aj Arabia, aj Amón xaq aj Asdod chi uyijb'axik i tapial chi nim uwach chrij i Jerusalén, xmayix taj, xaq xjeqan utz'apixik i jalajuj taq k'ijib'al ipa o wi uchija, are uri lik xpe jun nim laj koywal,

⁸ konojel junam xkich'ob' u'anik ch'oj chkij aj Jerusalén anb'al k'ax chke konojel.

⁹ Are uri xojlapan ru' i qa-Dios xaq xqakoj chajinel, chipa'ij chicha'ab' tob'al qib' chkiwach.

¹⁰ I winaq aj Judá xkib'ij: “Nti chik qacho'ab' xaq ni'pa i t'ub'ulik lik k'i, kojtiki ti chik chuyijb'axik i tapial chi nim uwach”.

¹¹ I ajch'oj chqij, xkich'ob' ike chi yoj kqetamaj taj xaq kqil ti ub'e wach kich'ob'om ike, k'a ke'ok ni chqaxol kamsab'al qe xaq u'atixik i chak.

¹² Xwiri, i winaq aj Israel chi je jeqel naqaj chke ike, xek'un lajujmul chub'ixkil chqe, chi i winaq le ke'ok b'i chu'anik ch'oj chqij pa taq k'ulala,

¹³ xinya jun taqanik chke i winaq, chi pa taq alk'uwalil kek'iji ni chrij i tapial chi nim uwach; pa taq jul, xaq chuxol taq b'e ru' ch'ich' chi o uware k'ulala, che' chi ch'ich' utzam xaq i ch'ab'.

¹⁴ Are xwilo chi kkixij kib', xintak'i anoq xaq xinb'ij chke i winaq chi nimaq ki'ij, aj-ok'al utzam i jalajuj taq tinimit xaq chke i winaq re i tinimit chi je o kan chila: “Mixij iwib' chke. Chk'un chik'ux chi Ajwal lik nim ucho'ab' xaq nim u'ij uchomal, chi'ana ikoch' chu'anik ch'oj kumal iwinaq, kumal imi'al, iwalk'uwal, kumal iwixoqil xaq iwachoch.”

¹⁵ I ajch'oj chqij, are xketamaj chi yoj oj yijilik xaq i Dios xuyojo wach taq kich'ob'om ike, qonojel yoj xoj-e chila ipa o wi tapial chi nim uwach, are uri xqajeq chik qachak chqajujunal.

¹⁶ Lik che taq i ij le, nik'aj chke inwinaq xkijeq u'anik i chak, xaq i nik'aj chik xkiyijb'a kib' che i ch'oj, kok'am i che' ch'ich' utzam pki'ab', tob'al ib', ch'ab' xaq tob'al uwach kik'ux. Konojel aj-atzil xekito i winaq aj Judá

¹⁷ chi ketijin chuyakik i tapial chi nim uwach. Konojel ni'pa kkerej b'i i eqan, lik xkimayij ti uk'amik b'ik, xwiri ru' jun ki'ab' kechakunik xaq ru' i jun chik kok'am jun b'iroxik anb'al ch'oj.

¹⁸ Konojel ni'pa ketijin chuyakik i tapial chi nim uwach, o kich'ich' chi o uware k'ulala chwi ka', i achi chi kuxut'ij i trompeta pintzal o wi,

¹⁹ man yin inb'im chke i winaq chi nimaq ki'ij, ni'pa aj-ok'al utzam i jalajuj taq tinimit xaq chke i winaq re i tinimit chi je o kan chila: “Iri lik jun nim laj chak, rumali chi yoj qajachom qawach chu'anik i chak chi are u'anik i tapial, lik naj qaxol chqawach.

²⁰ Rumali, chila ipa ix o wi are kita uch'awb'al i trompeta, chixpet qu' yoj man i qa-Dios kch'ojin ni pqak'exel yoj tob'al qe.”

²¹ Keje uri ile chi yoj lik jun ij kojchakun chu'anik i chak, nik'aj chke i winaq kok'am kiche' ch'ich' utzam pki'ab'.

²² Xwi ta la ile, xaq che i ij le xinb'ij chke konojel i winaq, chi lik konojel ike, xaq i je ajtonel, kewar kan pa Jerusalén man keje ile kojkichajij cha'ab' xaq kechakun pa'ij.

²³ Xwi ta la ile, mitene yin, mitene watz incha', mitene i ajtol we, xaq mitene achiyab' chi je ajchajinel chi in kachnimam, kqesaj qa'u', chqajujunal o qache' ch'ich' utzam pqa'ab'.