LEVÍTICO 25 - Wuj Pa K'ubultzij

I junab' re i uxlanem xaq i junab' re o'tanik

¹ I Ajwal xlapan ru' ma Moisés chila chwi jyub' Sinaí, xub'ij che:

² Chab'ij i tziji chke aj Israel: Are ix oknaq chik chwach ulew chi kinya ni chiwe, i ulew rajwaxik kuxlan na kojb'al u'ij i Ajwal.

³ Waqib' junab' kixtikan ni chwach iwulew, xaq kimol ni uwach itikon, xaq che i waqib' junab' le utz kichet uwi.

⁴ Xwiri che uwuq junab', i ulew lik kuxlan ni jun junab' kojb'al u'ij i Ajwal; lik mixtikan chwach iwulew che i junab' le xaq michet uwi itikon.

⁵ Xaq mik'upij i trigo chi kealax li kitukel chrijil chik i k'isb'al molonik, xaq mich'up uwach i uva chi chettal ti uwi; i ulew rajwaxik chi lik kuxlan na.

⁶ Man rumal i uxlanem le, i ulew kk'is ti uri ucho'ab' xaq lik o ni kitij yix uri, o ni kkitij imokom, o ni kkitij iwajke'el xaq o ni kkitij aj naj chi je jeqel chixol,

⁷ xaq o ni kkitij uri i jalajuj taq ichikop xaq o ni kkitij i chikop je aj pa taq es chi je o chila che i jyub' le. Ronojel ni'pa kuya ulew le kajwax ni chiwe re kitijo.

⁸ Rajwaxik kiwajlaj wuqmul i wuqub' junab', chi ke'eloq b'elejeb' kawinaq (49).

⁹ Man che i lajuj ij che i wuqub' ik', chi are i ij re i kuyb'al mak, kixut'ij ni rok'a' chij ma, chila pa ronojel i tinimit.

¹⁰ Che i junab' lajuj kawinaq (50) kisaqij ni yix chi i junab' le, lik elsam rumal i Ajwal, man are i junab' re i o'tanik. Che i junab' le kisaqij na chi konojel i winaq re i tinimit ke'o'tax na, konojel ketzalij ni ku' kalk'uwal xaq kkanaj chik kulew pki'ab'.

¹¹ Che i junab' lajuj kawinaq (50) are ni junab' re i o'tanik chiwe yix; che i junab' le kixtikan taj xaq kimol ti uwach i tikon chi je alaxnaq li kitukel, xaq kimol ti uwach i uva che uche'lal chi kik'upim ti uwi.

¹² Man i junab' le lik o u'ij xaq re i elik chisaq. Lik kitij ni uri ni'pa uwach i tikon chi to' kalax loq chi kuya ulew chiwe.

¹³ Che i junab'i re i o'tanik, iwonojel yix kik'am chik iwulew.

¹⁴ We o jun kuk'ayij xaq we kulo' ulew che jun chik winaq, mut'or uri i rachlok'anij.

¹⁵ We o jun klo'onik, rajwaxik kutojo chrij ni'pa junab' ik'awnaq chik k'a che li junab' re i o'tanik; xaq i kk'ayiwik rajwaxik kutz'onoj i rajil chrij ni'pa i junab' re i molonik tupu k'amaja kuriqa.

¹⁶ We lik k'a k'iyal junab' kraj che i elik chisaq, lik paqal uri rajil i ulew, xwiri we k'iyal ti chik junab' kraj, lik paqal ti chik uri, man xwi kk'ayix ni ni'pa junab' kkanaj che i elik chisaq.

¹⁷ Man keje ile mijun kutzuq taq rib' chrij ulok'anij, mi'an taq jun utz taj chwach i-Dios yix. Yin in Ajwal xinb'ij iri chiwe.

¹⁸ Chi'ana pacha kub'ij in-atb'al tzij, lik chi'ana intaqanik man keje ile lik utz na kixk'iji chwach ulew ipa kixjeqi wi;

¹⁹ i ulew lik k-on ni chom i tikon chwach xaq yix lik kixkikot na kixk'iji chwach, lik kitij ni uwach i tikon xaq lik k'a kixnoj na.

²⁰ Moqxa kich'ob' taq yix pijolom: ¿Wach kqatij che uwuq junab' man we kojtikan taj xaq we kojmolon taj?

²¹ Lik mixk'achirik man Yin kinya ni utzil chomal piwi che uwaq junab', lik k'i ni molonik ki'an che i junab' le, lik xqare kix-ono re oxib' junab'.

²² Keje ile kitij ni trigo chi ik'olom tz'aqat kitik chik uwach iwulew che uwajxaq junab', xaq i trigo chi ik'olom k'a xqare kix-ono re kitij che ub'elej junab' tz'aqat kuriq ni ij re molonik re i k'ak' tikanik.

²³ I ulew kk'ayix taj ronojel ij saq uwach: Man i ulew lik we Yin, yix xa ix ik'awel chwach, pacha taq ix ajposar we yin.

²⁴ Rumali xa pachike ulew o pi'ab' we kiwaj kik'ayij tan chik, rajwaxik kib'ij chik che i k'ayiwnaq chiwe, man ire lik o re che we kraj kulo' tan chik.

²⁵ We o jun chke awach tinimit xchaptaj rumal jun nim laj nib'a'il, we xuk'ayij kan rulew chawe, utz uri we kk'un jun rachalal chulo'ik i ulew chi xuk'ayij kan i rachalal chawe, man keje ile i ulew kkanaj chik uri pu'ab' i rachalal le.

²⁶ Xwiri we o jun chi nti jun rachalal klo'ow i rulew chi xuk'ayij, lik are uri ire kumol tan chik uchi' umer man lo'b'al tan chik rulew le chi uk'ayim kanoq,

²⁷ krajlaj ni'pa junab' uk'ayixik kanoq rumal, man keje utzalixik tan chik umer ku'an che, i lo'ownaq kan i rulew che; keje ukanajik tan chik uri rulew ile pu'ab'.

²⁸ Xwiri we ktiki ti chumolik uchi' umer re kuk'am chi kan rulew chi uk'ayim, lik kkanaj ni uri pu'ab' i lo'ownaq k'a kuriqa ni junab' re i o'tanik, te'uri i lo'ownaq kro'taj ni ulew xaq i k'ayiwnaq kuk'am chik rulew.

²⁹ We o jun kuk'ayij rachoch pa tinimit chi o tapial chrij chi nim uwach, lik o re uri che we kraj kulo' tan chik, are k'amaja kuk'is jun junab' uk'ayixik rumal.

³⁰ Xwiri we xtiki ti chik chulo'ik i rachoch che jun junab' chi uk'ayim, lik kakanaj ni uri ronojel ij saq pu'ab' i winaq chi lo'ownaq, xaq lik ke ni kan uri umuq uxikin. Lik kya' ti chik che i rajaw are kuriqa i junab' re i o'tanik.

³¹ Xwiri i ja chi je o pa taq tinimit chi nti tapial chrij chi nim uwach, xaqjun ni uri k-ani che pacha k-ani che ulew pa taq komon; i ja le k'a k-an ni tikilem che xa pachike junab' ktiki i rajaw chulo'ik tupu we xtiki ti che, k'a kkanaj ni uri pu'ab' are kuriqa i junab' re i o'tanik.

³² I je aj Leví ike tupu kkik'ayij kachoch chi o pkitinimit, xwiri lik kya' chke we kkaj kkilo' tan chik.

³³ We jun aj Leví klo'ow i ja, rajwaxik chi kro'taj kan i ja le che i junab' re i o'tanik; xaq k-e uri putinimit ipa o wi rulew ire. Man i kik'ijib'al aj Leví lik xwi i kachoch chi o pa kitinimit chkixol aj Israel.

³⁴ I ulew ipa kewa wi chikop chi o chrij chwach i tinimit chi ke aj Leví, lik kk'ayix taj man i ulew le lik ke ike ronojel ij saq.

³⁵ We o jun chke awach aj tinimit xchaptaj rumal jun nim laj nib'a'il xaq we kupon awu', rajwaxik uri kato pacha ka'an che jun aj naj chi to' ik'awel, kaya ni jun uk'ijib'al chi awachoch.

³⁶ Lik nti kamaj che xaq matz'onoj alaj che i mer chi kuchi'maj chawe, are cha'ana, chak'utu chi kakoj u'ij i Dios xaq chaya che alok'anij chi kjeqi chi awachoch.

³⁷ Lik matz'onoj alaj che i mer chi kuchi'maj chawe xaq mapaqb'a an rajil i wa chi kaya che.

³⁸ Yin in Iwajwal Dios chi xixwesaj li pa Egipto yab'al re ulew Canaán chiwe, man ki'an ni i-Dios chwe.

³⁹ We o jun chke alok'anij kchaptaj rumal jun nim laj nib'a'il are o awu' chi awachoch, xaq we xuk'ayij rib' chawe, lik ma an taq che pacha jun winaq chi o pa k'ax rumal i rajaw.

⁴⁰ Cha'ana che pacha jun ajchak, xaq pacha jun ajposar awu'. Kchakun ni awu' k'a kuriqa ni junab' re i o'tanik.

⁴¹ Te'uri kel chi awachoch junam ku' rak'al man ktzalij chik chwach kulew uqajaw uchuch.

⁴² Man ike je wajpatan Yin, xaq Yin xewesaj li pa Egipto, rumali kek'ayix taj pacha winaq chi je o pa k'ax rumal i kajaw.

⁴³ Makamsaj pa chak, are cha'ana, chak'utu chi kakoj u'ij a-Dios.

⁴⁴ We kawaj winaq chi kaya pa k'ax, achi xaq we ixoq, jat uri chulo'ik pa nimaq taq tinimit chi je o chawij chawach.

⁴⁵ Xaq utz kalo' chke i winaq je aj naj chi je jeqel chixol xaq we are i kak'al chi kealaxik tz'aqat are je jeqel pitinimit yix; ike le utz keilo'o, lik iwe yix.

⁴⁶ Xaq kiya kan pki'ab' iwak'al chuxe'el ikamik yix man re ni kitaqon. Xwiri mijun chiwe yix chi ix aj Israel kikamsaj taq jun iwach aj Israel pa chak.

⁴⁷ Jun aj naj chi o chwach iwulew, we xb'eyomarik, xaq we o jun iwach aj Israel chunaqaj we xchaptaj rumal jun nim laj nib'a'il, xaq we xuk'ayij rib' che aj naj le chi b'eyom, xaq we che jun chik aj naj,

⁴⁸ tupu uk'ayim chik rib', xwiri utz we jun chke rachalal kulo' chik i relb'al pu'ab' i xlo'owik.

⁴⁹ Nti k-ono we jun rikan, jun ratz ucha' pa tzij, xaq xapachinoq chke i rachalal chi je aj najil taj che; xaq utz we are ire kresaj rib' pu'ab' i xlo'owik we ktiki che.

⁵⁰ Ire xaq i rajaw kkajlaj ni'pa junab' x-on ru', are i ij chi xulo'o k'a che i junab' re i o'tanik; i rajil re i lo'b'al re are ni pacha kuch'ak jun ajchak, chrij ni'pa junab' chakunnaq chik.

⁵¹ Xwiri we k'a k'iyal junab' kraj chi kuriqa i junab' re i elik chisaq, rajwaxik uri chi kuchap jub'i' che i mer chi xya' che are xlo'ik kuk'isb'ej utojik i relb'al b'ik.

⁵² Xwiri we xa keb' oxib' junab' chik kraj che i junab' re i o'tanik, xwi uri keb' oxib' junab' le kutoj na re relb'al b'ik.

⁵³ Rajwaxik k-an ni che pacha jun ajchak chi moktalik re junab' uwach, yix rajwaxik chi kiya taj kkamsax jun aj Israel pa chak.

⁵⁴ We xelsax ti pu'ab' i rajaw che taq i junab' le, k'ate ko'tax uri che i junab' re i o'tanik junam ku' i rak'al.

⁵⁵ Man yix chi ix aj Israel lik ix wajpatan, lik ix we Yin na, man Yin xixwesaj li pa Egipto. Yin in Ajwal i we yix.