Jueces 5 - Wuj Pa K'ubultzij

I b'ix chi xub'ixaj ati Débora xaq ma Barac

¹ Che taq i ij le ati Débora xaq ma Barac, chi uk'ojol ma Abinoam, keje iri xkib'ixaj:

² Iwonojel chib'ixaj u'ij i Ajwal, man k'a je o achiyab' pa Israel chi lik ronojel kik'ux kki'an ch'oj. Man k'a je o achiyab' chkixol konojel i winaq chi lik kkaj enam are kesik'ix pa ch'oj.

³ ¡Chinita iwonojel, yix ix ajawinelab'! Xaq ¡Chinita iwonojel yix, ix atol tzij! Man yin kinb'ixaj u'ij i Ajwal, kinb'ixaj i Dios ke aj Israel.

⁴ Ajwal, Yet are xatel chila pa Seir, are xat-e chila pa Edom, xyikyat ulew xaq xsiksat i kaj, i sutz' xutixixej li jab' chwach ulew.

⁵ Chawach Yet, lo'laj Ajwal, chawach Yet, lo'laj Dios ke aj Israel, xeyikyat i tzam taq jyub' xaq xyikyat i jyub' Sinaí.

⁶ Che i ij re ma Samgar, chi uk'ojol ma Anat, xaq che i ij re ati Jael i je ajb'inel xko'taj kan i b'e, xkimaj b'i jub'an chik b'e chi k'ax b'inik che.

⁷ Konojel i jalajuj taq komon re i tinimit Israel xkanaj kanoq nti chik winaq chwach. Are uri yin in ati Débora xinyak wib' pacha in kichuch i aj Israel.

⁸ Je o jujun chi xkitzukuj chik ki-dios k'ak', tz'aqat are ktijin i ch'oj pa taq okb'al re i tinimit xwiri lik mijun che' ch'ich' utzam xaq mijun ch'ab' x-iltaj chkixol i jo'chiy (40,000) aj Israel.

⁹ ¡Yin kinya ink'ux chke i nimaq taq aj-atzil ke aj Israel, chke i winaq re intinimit chi xkaj enam pa ch'oj! ¡Iwonojel chikojo u'ij i Ajwal!

¹⁰ Chib'ixaj iwonojel yix chi kix-an chkij atitab' taq axna chi saq purpuj kij; chib'ixaj yix chi kixkub'i chwach i pacha taq pop; xaq iwonojel yix, chi ix ajb'inel.

¹¹ Chila chuxol i tu'b'al taq kiya' i chikop, are kita uch'awb'al i son re i sotsaq ch'ich' chkikojo u'ij i Ajwal rumal i ch'akanik chi xu'an pa taq komon re Israel.

¹² Chk'un saq chawach, ati Débora, chk'un saq chawach xaq chatwalijoq, chab'ixaj jun b'ix, ¡Xaq yet ma Barac, chi at uk'ojol ma Abinoam, chatwalijoq, xaq cheak'ama b'i awinaq chi je achapom pa ch'oj!

¹³ Are uri xeqaj li aj Israel chu'anik ch'oj chkij i o kicho'ab', wumal yin xeqaj li ajch'oj re i Ajwal, chu'anik ch'oj chkij achiyab' chi lik je yij che i ch'oj.

¹⁴ O jujun achiyab' re utzob'ajil ma Efraín xeqaj li chwa ta'aj, chkij ike le xeterej li achiyab' re utzob'ajil ma Benjamín, chi lik je k'iyal taq tzob'ajil je yij che i ch'oj. I je re utzob'ajil ma Maquir xeqaj li kaj-atzil, xaq keje utzob'ajil ma Zabulón xeqaj li aj-ok'al utzam chke.

¹⁵ Xaq i aj-atzil ke utzob'ajil ma Isacar lik xkachnimaj b'i ati Débora; i ma Isacar xuto ma Barac man xterej b'i chrij are x-e chwa ta'aj. We chkixol konojel uwinaq ma Rubén je o winaq chi lik ko kiwach.

¹⁶ ¿B'uchak uri chi xekanaj kan chkixol i chij chkitayik i ajyu'ul chij are kekisik'ij i kichij? Chkixol uwinaq ma Rubén lik je o winaq chi lik je xib' rib'.

¹⁷ I winaq chi je aj Galaad xe'uxlan kan chila ch'aqa ya Jordán. Ma Dan xaq uwinaq xekanaj kan chila ipa je o wi i barco. I ma Aser junam ku' uwinaq xejeqi kan chila pa tinimit chi taq mar, lik xe'el ti chila.

¹⁸ I utzob'ajil ma Zabulón xaq utzob'ajil ma Neftalí xkiya kik'aslemal pa ch'oj chila chwi nimaq taq jyub', lik nti ke che we xekamik.

¹⁹ Are uri i ajawinelab' xeupon chu'anik ch'oj che i k'ijib'al chi Taanac ub'i, chi o chila chutzal i raqana Meguido, xaq xeupon i ajawinelab' aj Canaán chu'anik ch'oj, xwiri xetiki tu b'i chuk'amik i b'eyomal xaq i saq-o'oj.

²⁰ I ch'umil, xech'ojin li k'a chila loq chikaj chrij ma Sísara.

²¹ I raqana, raqana chi lik ax o wi, raqana re i Cisón xeucharej b'i konojel ike. ¡Yet kala'puj ni pkiqul konojel i o kicho'ab'!

²² ¡Lik kt'iqiq kaqan i kaway! ¡Xaq lik kepok'ok'ik xe'ek, ket'iqiqik, lik are i kaway chi lik kerikik!

²³ I ángel re i Ajwal kutzijoj: “¡Chpet ni jun k'ax laj tojpen puwi ma Meroz xaq pkiwi konojel uwinaq!” Man xeupon ti chkito'ik i ajch'oj re i Ajwal pacha xki'an i ko kiwach.

²⁴ ¡Chkixol konojel ixoqib' lik ch-ol ni utzil chomal puwi ati Jael, chi rixoqil ma Heber chi aj Ceneo. ¡Lik ch-ol ni utzil chomal puwi ati Jael chkiwach konojel ixoqib' chi je o chila pa mujb'al!

²⁵ Ma Sísara xutz'onoj uya' che ati Jael, xwiri ati Jael leche xuya che. ¡Xaq xuya mantekil che chupam jun chom laj tu'b'al chi lik o u'ij!

²⁶ Are uri ati Jael xuk'am pan jun estaka ru' u'ab' moxim xaq xuk'am pan jun ch'ayb'al estaka, ru' u'ab' wiqab'im, xuch'ap b'i estaka le che ujolom ma Sísara, xuka'ij b'i ujolom xqaj k'a chwach ulew.

²⁷ Are uri ma Sísara xub'ak'ak'ej rib' rumal uk'axk'ol xtzaq pulew chuqul taq raqan ati Jael, chila ipa xtzaq wi le, chila xkam wi kanoq.

²⁸ I uchuch ma Sísara xtejeb' pan pa wantana, rumal uk'achirik xsik'in chub'ixkil i tziji: ¿B'uchak k'amaja kk'un ma Sísara pa ch'ich'? ¿B'uchak chi b'aytajnaq uch'ich' re ch'oj?

²⁹ Are uri ixoqib' chi lik o kino'oj xkila' uwach che, Xwiri uchuch ma Sísara xukamulij xuroxmulij ub'ixkil utzij:

³⁰ “Ile moqxa ketijin chujachik chkiwach ronojel ni'pa i xetiki chumajik pa ch'oj. Moqxa jun ajke'el, o moqxa keb' kel chkiwach ajch'oj. I ma Sísara re ire i k'ul chi lik k'i utzunb'al, moqxa jun o moqxa keb', chi lik k'iyal taq utzunb'al i t'is kojtal che re retz'b'alil uqul i ch'akanel.”

³¹ Keje kamik ile k-an ni chke konojel i je ajch'oj chawij Ajwal. Xwiri konojel ni'pa i k'ax katkina'o je keje na pacha uchomal utzunb'al i ij che ronojel utzunb'al chwach ulew. Chrijil chik ile xuch'ij kawinaq (40) junab' chi lik o chomb'al ib' chwach ulew.