Jueces 3 - Wuj Pa K'ubultzij

I winaq chi xe'elsax tu b'i chila Canaán

¹ Je are i tinimit iri chi xeuya kan i Ajwal chila Canaán ilb'al re we kekojon kak'al aj Israel che, chi k'amaja kealaxik are xmaj kan ulew Canaán.

² I Ajwal xu'an ile man kraj chi kak'al aj Israel kenaw che i ch'oj man ike lik mijuyak ki'anom ch'oj.

³ Keje uri ile chi xekanaj kan jo'ob' ajawinelab' aj Filistea, konojel aj Canaán, aj Sidón xaq aj Jiw chi je jeqel te'eq chwi taq jyub' Líbano, chi kjeqan b'i uchi' che i jyub' Baal-hermón k'a che i okb'al chi Hamat ub'i.

⁴ Ku' i tinimit le, i Ajwal xraj uk'amik kipam aj Israel we kekojon che i utzij xaq che i utzij upixab' chi xya' chke i katit kimam rumal ma Moisés.

⁵ Keje ile i aj Israel xkijeq jeqelem chkixol aj Canaán, chkixol aj Het, chkixol aj Hamor, chkixol aj Ferez, chkixol aj Jiw xaq chkixol aj Jebús.

⁶ I kimi'al kik'ojol aj Israel xek'uli ku' i kimi'al kik'ojol i jub'an tinimit le xaq xkikoj u'ij kitiox.

Ma Otoniel xeresaj aj Israel pu'ab' ma Cusan-risataim

⁷ Ronojel ni'pa xki'an aj Israel lik xumaj ti uwach i Ajwal, man xko'taj kan ukojik u'ij ire, xa xkijeq ukojik u'ij i jalajuj taq uk'exwach i tiox Baal xaq i ati tiox Asera

⁸ Rumali i Ajwal xpe roywal chke aj Israel xaq xeujach pu'ab' ma Cusan-risataim, chi ajawinel re i tinimit Mesopotamia. Wajxaqib' junab' xechakun aj Israel chrij i ajawinel le.

⁹ Aj Israel lik k'a xkitz'onoj ni utzil che i Ajwal; rumali i Ajwal xu'ul jun winaq chi keuto. I tol ke le are ma Otoniel, chi uk'ojol ma Cenaz, chi ucha' ma Caleb.

¹⁰ I Utewal i Ajwal xpe puwi ma Otoniel, are uri ire xnab'ej b'i chkiwach konojel i winaq aj Israel chu'anik ch'oj, xaq i Ajwal xu'ano chi xkiqajsaj u'ij i ajawinel ma Cusan-risataim, chi are ajawinel re i tinimit Siria.

¹¹ Chrijil chik ile xpe i chomb'al ib' chwach ulew chi xuch'ij kawinaq (40) junab', k'a xkam ni ma Otoniel, chi uk'ojol ma Cenaz.

Ma Aod xeresaj aj Israel pki'ab' aj Moab

¹² Xwiri aj Israel xemakun chik chwach i Ajwal. Rumali i Ajwal xu'an che ma Eglón, chi ajawinel re i tinimit Moab, chi lik xpe ucho'ab' chkiwach aj Israel.

¹³ I ma Eglón xeusik'ij aj Amón xaq aj Amalec ru', anb'al ch'oj chkij aj Israel; are uri junam x-e chu'anik ch'oj, xuk'am kan i tinimit chi o uche'lal palma chwach.

¹⁴ Are u'ankil uri chi aj Israel wajxaqlajuj junab' xki'an kichak chrij ma Eglón.

¹⁵ Aj Israel lik k'a xkitz'onoj ni utzil che i Ajwal; rumali i Ajwal xu'ul jun winaq chi keuto. I tol ke le are jun aj moxim chi ma Aod, uk'ojol ma Gera, ukwenta utzob'ajil ma Benjamín. O jun ij, i aj Israel xkitaq b'i ma Aod chuya'ik jun sipon che ma Eglón.

¹⁶ Xwiri ma Aod xu'an jun ch'ich' chi o uware k'ulala, kolo o keb' ripaj ab'aj che i raqan xaq xuya chwa ra' wiqab'im chupam u'u'.

¹⁷ Te'uri x-ek, xuk'am b'i sipon che ma Eglón, chi lik ti'oj.

¹⁸ Are ya xyataj i sipon che ma Eglón, ma Aod xel li ku' i winaq chi je rachi'ilam b'ik.

¹⁹ Xwiri are xupon ku' i tiox chi o chila naqaj che i tinimit Gilgal, ma Aod xtzalij chali ipa o wi ma Eglón; xub'ij che: Nim laj winaq, o jun tzij chi wok'am li chawe xwiri rajwaxik chi atukelal kinb'ij chawe; xcha. I ajawinel xub'ij chke i winaq chi je o ru': —Mixch'awik. Te'uri i winaq chi je o chwach xe'el b'i chisaq.

²⁰ I ma Aod are xkanaj kan utukel ru' ma Eglón, are uri xtejeb' pan ru' pa ja ipa uxlannaq wi, xub'ij che: I tzij chi ink'amom li chawe, nim laj winaq, are i Dios b'iwnaq li chwe. I ma Eglón are xuta ile xwalij pukub'ib'al chi o u'ij.

²¹ Are uri ma Aod xresaj li uch'ich' ru' u'ab' moxim chi o chwa ra' wiqab'im, xumin b'i che upam ma Eglón.

²² Lik ko xumin b'ik man xsach ne b'i uxe' i ch'ich' xaq uchapb'al re, lik x-aljin ti chik man are uti'ojil xch'uquw b'i ch'ich'; i ma Aod le xresaj ti chub'i uch'ich'.

²³ Chrijil chik ile ma Aod xutz'apij uchija xukoj lawe che, te'uri xuk'aq b'i rib' pa wantana.

²⁴ Are enaq chik ma Aod xeupon i rajtaqon i ajawinel; are xkilo chi tz'apil uchija ipa o wi, are uri ike xkib'ij: Moqxa ktijin chutzaqik rib' k'a pa ja loq pa k'ijib'al chi joror upam are lik tij ij.

²⁵ I ajtaqon are xkilo chi lik nti relik loq, are uri xe'ok il. Juntir xkik'am la i lawe, xkijaq la uchija, are uri xkilo chi jab'al chub'i kajaw pulew i kamnaq chik.

²⁶ Tz'aqat ktijin kib'aytajik ike ru' i kamnaq, i ma Aod x-anmajik, xik'aw chila ipa je o wi tiox pa Gilgal, xupon k'a pa Seirat, chila xruwaj wi rib'.

²⁷ Are xupon chila pkulew aj Israel, xuxut'ij i trompeta puwi i jyub' re ma Efraín sik'b'al ke konojel i winaq. Are uri xeqaj li konojel aj Israel chi je o chwi taq jyub', nab'e ma Aod chkiwach.

²⁸ Ma Aod xub'ij chke chi cheterej b'i chrij man i Ajwal kuya ni ch'akanik chke pkiwi konojel ajch'oj chkij chi aj Moab. Are uri xeterej b'i chrij ma Aod, xkitzukuj ni'pa axb'al chi o chi taq ya Jordán, xkichajij, rumali mijun winaq xkiya che chi xik'awik.

²⁹ Che i ij le kolo jo'mo' juchiy (10,000) aj Moab xekikamsaj, konojel ni'pa i xekamik le, lik je yij che i ch'oj, lik ko kiwach xaq lik o kicho'ab'. Mijun x-anmajik, konojel xekamik.

³⁰ Keje uri ile chi aj Israel xekikamsaj konojel aj Moab. Chrijil chik ile xuch'ij kajwinaq (80) junab' i chomb'al ib' chwach ulew.

Ma Samgar xeresaj aj Israel pki'ab' aj Filistea

³¹ Chrijil chik ma Aod le are ma Samgar chi uk'ojol ma Anat xok'aw utzam chke aj Israel; i ma Samgar le xeukamsaj lajujwinaq jumo' (600) achiyab' aj Filistea ru' jun che' chi o ch'ich' chutzam re ch'ayb'al i b'oyex. Keje kito'ik aj Israel ile xu'ano.