JOSUÉ 13 - Wuj Pa K'ubultzij

Ulew chi k'amaja kmajik

¹ Are lik rij chik i ma Josué i Ajwal xub'ij che: Yet lik at rij chik, i k'a o ulew chi k'amik kraj,

² i ulew le chi kinb'ij are kulew konojel je aj Filistea, xaq i je aj Gesur,

³ chi kupon uchi' k'a chi raqana Sihor chi o prelb'al ij che i Egipto, uponnaq k'a chuchi' kulew je aj Ecrón chila pa moxab', chi kulew aj Canaán kb'ixik; chwach ulew le je o jo'ob' ajawinelab' ke je aj Filistea: Ajawinelab' ke je aj Gaza, ajawinel ke je aj Asdod, ajawinel ke je aj Ascalón, ajawinel ke je aj Gat xaq aj ajawinel ke je aj Ecrón. Xaq k'amaja kamaj kan kulew je aj Ava,

⁴ chi o chila pa wiqab', xaq ronojel kulew je aj Canaán chi kjeqan li uchi' pa taq tinimit ke je aj Sidón, kupon k'a pa Afec, chuchi' kulew je aj Hamor,

⁵ xaq k'amaja kamaj kan kulew i je aj Giblita, xaq ronojel i jyub' Líbano chila prelb'al ij, kjeqan li uchi' pa Baal-gad chila chi raqan jyub' Hermón kupon k'a pa okb'al re i Hamat.

⁶ Lik Yin kewesaj nu b'i konojel i je jeqel chijyub' ni'pa i je o chwach ulew Líbano xaq ni'pa je o chwach ulew k'a pa Misrefotmaim, xaq konojel je aj Sidón; xwiri yet chajacha i ulew le chke je aj Israel pacha at intaqom chu'anik.

⁷ Man are chik ij iri chi kumajo kajach ulew le chke i je b'elejeb' tzob'aj xaq nik'aj chke utzob'ajil ma Manasés.

Kulew ma Manasés, ma Rubén xaq i ma Gad

⁸ I utzob'ajil ma Rubén, utzob'ajil ma Gad xaq i nik'aj chke utzob'ajil ma Manasés, yatal chik kulew ike le rumal i etz mam Moisés, chi rajchak i Ajwal, xuya ulew chke chi o prelb'al ij che i Jordán.

⁹ I ulew le chi xya' chke, kjeqan li uchi' pa Aroer chi o chuchi' i b'eya Arnón xaq i tinimit chi o chwa ta'aj, xaq ronojel i jyub' ta'aj uwi chi Medeba, uponnaq k'a pa Dibón,

¹⁰ xaq rachi'ilam ronojel utinimit ma Sehón, chi ajawinel ke je aj Hamor chi xu'at te'eq tzij puwi i tinimit Hesbón, k'a chuchi' kulew je aj Amón.

¹¹ Xaq xumaj b'i kulew je aj Galaad, kulew je aj Gesur, kulew je aj Maaca, ronojel i jyub' Hermón, xaq ronojel ulew pa Basán, xupon k'a Salca;

¹² i ulew le re te'eq ma Og, chi ajawinel ke je aj Basán, chi xaq xu'at tzij pa Astarot xaq pa Edrei, ire le are jun chke je aj Refaim chi xek'asi kanoq are xech'ak rumal etz mam Moisés, chi xaq xeresaj b'i pa kitinimit.

¹³ Xwiri i je aj Israel xekesaj tu b'i je aj Gesureo xaq je aj Maaca chwach kulew, ike le k'a je o chila wo'or pa kulew i je aj Israel.

¹⁴ Xwiri i je utzob'ajil ma Leví xya' ti kan kulew rumal etz mam Moisés, man ni'pa i sipon chi kkisujuj i je aj Israel chwach i Dios are uk'exel kulew ike ile.

¹⁵ I etz mam Moisés xujach kan ulew chke utzob'ajil ma Rubén chrij ni'pa kik'iyal i kalk'uwal:

¹⁶ I ulew le chi xya' chke kjeqan li uchi' pa Aroer chi o chuchi' i b'eya Arnón, xaq i tinimit chi o chwa ta'aj, xaq ronojel i jyub' ta'aj uwi chi Medeba ub'i,

¹⁷ uponnaq k'a pa Hesbón xaq ronojel i tinimit chi o chwa ta'aj: Dibón, Bamot-baal, Bet-baal-meón

¹⁸ Jahaza, Cademot, Mefaat,

¹⁹ Quiriataim, Sibma, Zaret-sahar chwi jyub' chi o chwa ta'aj,

²⁰ Bet-peor, uwa taq jyub' re i Pisga, Bet-jesimot,

²¹ ronojel i tinimit chi o chwa ta'aj, xaq ronojel i tinimit ipa xu'at wi te'eq tzij ma Sehón, chi ajawinel ke i je aj Hamor chi xjeqi pa Hesbón. Chi xaq xch'ak rumal etz mam Moisés, xaq keje xu'an chke i je uwi ujolom re i tinimit Madián, ike le je are iri: Ma Evi, ma Requem, ma Zur, ma Hur xaq ma Reba; konojel ike le je uwi ujolom re ma Sehón.

²² I je aj Israel lik je k'i i winaq xekikamsaj ru' ch'ich' pa ch'oj, xaq xkikamsaj ma Balaam chi ajnanel, uk'ojol ma Beor.

²³ I ulew re utzob'ajil ma Rubén xjach chke, i ulew le, tinimit xaq i komon chi o chupam are i sipon chke je rak'al kan ma Rubén, chrij pacha kik'iyal i kalk'uwal xaq xupon uchi' k'a che i raqana Jordán.

²⁴ I etz mam Moisés xujach kan ulewi chke je rak'al kan ma Gad chrij pacha kik'iyal i kalk'uwal:

²⁵ Ronojel ulew Jazer, ronojel i jalajuj taq tinimit re i Galaad, xaq nik'aj che kulew je aj Amón, uponnaq uchi' k'a chila Aroer chi o chwach i Rabá;

²⁶ xaq kjeqan chub'i uchi' chila Hesbón, uponnaq k'a chila pa Ramat-mizpa xaq pa Betonim, xaq kjeqan chali uchi' chila Mahanaim uponnaq k'a chuchi' i Debir;

²⁷ xaq i ta'aj Bet-aram, Bet-nimra, Sucot xaq i Zafón, junam ru' i jub'i' chi o te'eq pu'ab' ma Sehón, chi ajawinel te'eq re i tinimit Hesbón; rumali i kulew rak'al kan ma Gad xnimar uwach, xjeqan b'i uchi' prelb'al ij che i raqana Jordán k-e k'is k'a pa wiqab' che i semelik ya Cineret.

²⁸ Ile are kulew, kitinimit xaq kikomon je rak'al kan ma Gad chrij pacha uk'iyal i kalk'uwal.

²⁹ I etz mam Moisés xaq xuya kan ulewi chke nik'aj chke rak'al ma Manasés, chrij pacha kik'iyal i kalk'uwal.

³⁰ Are ulew chi re te'eq ma Og, chi ajawinel te'eq puwi i tinimit Basán; ronojel ulew Basán le kjeqan li uchi' pa Mahanaim, kumaj b'i oxwinaq (60) tinimit chi o chupam ulew Jair.

³¹ Xaq nik'aj che ulew Galaad, Astarot xaq i Edrei, chi ipa ku'at wi te'eq tzij ma Og, ile are xya' chke nik'aj je umuq uxikin ma Maquir chi rak'al ma Manasés, chrij pacha kik'iyal i kalk'uwal.

³² Are ulew ile chi xujach kan etz mam Moisés, are o te'eq chila chwa ta'aj Moab, ch'aqa ya Jordán prelb'al ij che i tinimit Jericó.

³³ Xwiri i je utzob'ajil ma Leví xya' ti kan kulew rumal etz mam Moisés, “man i Ajwal chi ki-Dios je aj Israel, lik are kikuxtab'al (uk'exel kulew) ike ile, pacha ub'im Ire chke.”