Ester 3 - Wuj Pa K'ubultzij

Ma Mardoqueo xaq ma Amán

¹ X-on panoq, i ajawinel ma Asuero xu'ansaj an upatan ma Amán, chi uk'ojol ma Hamedata, chi umuq uxikin ma Agag, aj-atzil pkiwi aj-ok'al utzam i jalajuj taq tinimit.

² Konojel ni'pa kki'an kipatan chrij i ajawinel pa nim laj rachoch, kexuki'ik xaq kiqajsaj kipalaj chwach ulew are kik'aw ma Amán, man keje utaqanik i ajawinel ile; xwiri ma Mardoqueo xuqel i taqanik le.

³ Are uri i rajpatan i ajawinel xkitz'onoj che ma Mardoqueo b'uchak chi kkojon ti che i taqanik chi xuya i ajawinel.

⁴ Lik ij ij keje i tz'onb'enik ile kki'an che, xwiri ire kkojon ti chke. Are uri xe'e chub'ixkil che ma Amán, ilb'al re we ma Mardoqueo kujikb'a utzij man ire ub'im chke chi aj Judío.

⁵ Are xuk'am upam ma Amán, chi ma Mardoqueo kxuki taj xaq kuqajsaj ti upalaj chwach ulew are kik'aw ire, lik xpe roywal;

⁶ xwiri kib'im chik che pachike tinimit petnaq wi ma Mardoqueo, xuch'ob'o chi xwi ti ire kuya utojb'alil che, are uri xujeq uch'ob'ik wach uchupik kiwach konojel aj Israel chi je jeqel pa tinimit ipa ku'at wi tzij ma Asuero.

Taqanik chupb'al kiwach aj Israel

⁷ I nab'e ik' che i junab', ile are i ik' chi Nisán ub'i, che i kab'lajuj junab' re rajawinik i ajawinel ma Asuero, xki'an jun sakinik chwach ma Amán, man kkich'ik i ij xaq i ik' chi ku'an na wach uch'ob'om, are uri xtzaq i sakinik che i ij oxlajuj re ik' kab'lajuj, ile are ik' chi Adar ub'i.

⁸ Are uri xub'ij ma Amán che i ajawinel ma Asuero: —Chkixol konojel i tinimit chi kat-ajawin yet puwi, Nim laj Winaq, o jun tinimit chi ki'anom kib' chke jub'an chik, o ki'atb'al tzij junwi chwach jub'an chik tinimit, ike le kekojon ti che ataqanik yet, Nim laj Winaq. Rumali kmajaw taj chi kejeqi chkixol i tinimit chi kat-ajawin yet pkiwi.

⁹ Rumali we kumaj awach yet, Nim laj Winaq, chaya uri jun taqanik chi kub'ij chi kchup ni kiwach konojel; yin kinya ni oxwinaq wajxaqlajujmo' (7,260) tintal saq-o'oj chila ipa o wi ub'eyomal i ajawinel.

¹⁰ Are uri i ajawinel xresaj ub'aq che uwi u'ab', xuya che ma Amán, chi ajch'oj chkij aj Israel,

¹¹ xub'ij che: —Chkanaj ni i saq-o'oj awu'. I tinimit chi kab'ij le cha'ana chke pacha kumaj awach.

¹² Che i ij oxlajuj re i nab'e ik' che i junab' xesik'ix konojel ajtz'ib' re i ajawinel, ike le xkitz'ib'aj i taqanik chi xub'ij ma Amán man ktaq b'i ku' aj-ok'al utzam chke i jalajuj taq tinimit xaq aj-ok'al utzam i nimaq taq tinimit. I taqanik le xtz'ib'ax pkich'ab'al i jalajuj taq tinimit, juch'um uwach rumal i ajawinel ma Asuero xaq xkikoj b'i uk'exwach ub'aq re uwi u'ab' che.

¹³ Chrijil chik ile, xtaq b'i chke ajk'amol b'i wuj man kkijach pa jalajuj taq tinimit ipa ku'at wi tzij i ajawinel ma Asuero. Chupam i wuj le ktaq uchupik kiwach konojel aj Israel, che jun chi ij konojel aj Israel, alab'om, rijab', ak'alab' xaq ixoqib', xaq kk'am ronojel ub'itaq ke. I ij ch'iktalik are i ij oxlajuj re i kab'lajuj ik', ile are ik' chi Adar ub'i.

¹⁴ K'iyal taq uk'exwach i taqanik le x-anik, xaq xya' utzijol pacha jun atb'al tzij, xaq xya' retamaxik pa ronojel i jalajuj taq tinimit man keje ile je yijil chik che i ij ch'iktalik.

¹⁵ I ajjachol wuj le lik juntir xkijacho man keje utaqanik i ajawinel ile, i taqanik le xya' retamaxik chila pa tinimit Susa. Tz'aqat i ajawinel xaq ma Amán ketijin che ab'arik, konojel i winaq pa tinimit Susa keb'isonik.