Cantares 6 - Wuj Pa K'ubultzijKonojel keb'ixanik 1 Yet chi lik at chom chkixol i chomiq taq ixoqib'. ¿Ipa x-e wi i k'axnab'al ak'ux? ¿Ipa xumaj wi b'i ub'e? ¡Koj-e awu' chutzukuxik! Ixoq kb'ixanik 2 I k'axnab'al ink'ux enaq chupam i tikb'al ukotz'ij, chupam i tikb'al ukotz'ij chi lik muy; keuchajij i jalajuj taq uchikop xaq chuch'upik i kotz'ij lux. 3 Yin lik in re i k'axnab'al ink'ux, xaq ire lik we yin. Ire keuchajij i jalajuj taq uchikop xol taq kotz'ij lux. Ujo' b'ix Achi kb'ixanik 4 Yet, ral k'axnab'al ink'ux, lik at chom koq xaq lik at ajk'amol wachij pacha i tinimit Tirsa xaq i Jerusalén, lik mijun kok awu' pacha achiyab' chi je yij che i ch'oj chi kech'ak taj. 5 ¡Minataqej chik man i ab'a'wach ya xinuch'ako. I awi keje pacha i ral taq chab'at chi keqaj li chwa taq jyub' Galaad. 6 I aware ronojel lik chom, keje pacha i chij chi k'ate je elnaq li pa atinem chi lik je yijil chik re kk'upix kismal. 7 I uxukut taq achi' keje pacha jun turas pirtal pa nik'aj chi kuwam kib' chrij i k'ul re ch'uqb'al ajolom. 8 I altom ajawinelab' je oxwinaq (60), i qas ti mer rixoqil je kajwinaq (80) xaq lik je k'i i apojib' taq altom. 9 Xwiri ral inpalomax chi lik chom xaq lik ch'am xa jun olik; lik xa jun i ralit ixoq chi lik mas k'ax kuna chkiwach i jub'an chik. Are k-iltaj kumal altom lik kkiya ukikotemal, i altom ajawinelab' xaq i je qas ti mer wixoqil kkikoj u'ij. Konojel keb'ixanik 10 ¿Pachin taq ile chi ktejeb' loq pacha ku'an i ij are ksaqrik? Lik chom koq pacha ktzun i ik', lik kjuljatik pacha i ij. ¡Lik nim a'ij pacha achiyab' chi je yij che i ch'oj chi kech'ak taj! Ixoq kb'ixanik 11 Xin-e xe taq anpatan chrilik uraxil utux i jalajuj taq tikon chwa ta'aj, chrilik kipo'ik li tikon uva, xaq i usij i turas. 12 Te'uri yin xinnab'ej ti chik wach taq xk'ulmaxik xaqte'et xinna'o in o chupam jun ch'ich' chutzal uk'ojol i ajawinel we yin. Konojel keb'ixanik 13 ¡Chattzalij loq Sulamita, chattzalij loq! ¡Chattzalij loq man kqaj awilik! ¿Wach kkaj rilik che al Sulamita? Jun xajoj pacha xu'an pa k'ijib'al re molb'al ib'. |
© Biblia Achí de Cubulco, Derechos reservados de Sociedad Bíblica de Guatemala
Bible Society in Guatemala