2 Samuel 10 - Wuj Pa K'ubultzij

Ma David xeuch'ak aj Siria xaq aj Amón

¹ X-on panoq, xkam ma Nahas chi ajawinel ke aj Amón, are uri xkanaj kan uk'ojol puk'exel chi ma Hanún.

² Are uri ma David xuch'ob'o chi lik utz rilik ma Hanún ku'ano, chi uk'ojol ma Nahas, keje pacha x-an che ire rumal uqajaw ma Hanún, chrijil chik ile, ma David xutaq b'i jub'an rajpatan chuya'ik ukowil uk'ux rumal ukamik uqajaw. Xwiri are xeupon i rajpatan ma David le chila pkitinimit aj Amón,

³ i kaj-atzil aj Amón xkib'ij che ma Hanún chi aj-atzil: “¿Nim laj winaq, kakoj b'a yet ile chi ma David xeutaq li i achiyab' le chuya'ik ukowil ak'ux xaq chukojik taq u'ij etz aqajaw? ¡Ile xeutaq loq xa chuk'ak'alixik i qatinimit, man keje ile k-on panoq kkichup uwach chqe!”

⁴ Are uri ma Hanún xutaq kiminik rajpatan ma David prexil, xkisol b'i nik'aj che kismachi' xaq xraqch'ix b'i ki'u' chke pa nik'aj, k'a xupon che kitun. Te'uri xero'taj b'ik.

⁵ Are xretamaj ma David, xutaq b'i kik'ulaxik, man ike le lik ke k'ix che xaq xutaq b'i ub'ixkil chke chi chekanaj kan pa Jericó, k'a kk'iy ni kismachi', te'uri kepetik.

⁶ I aj Amón xkinab'ej chi ma David lik xpe roywal chke, rumali xkitoj lajujmo' kachiy (20,000) achiyab' chi je yij che i ch'oj aj Siria, aj Bet-rehob xaq aj Soba, xaq xkitoj lajujwinaq kamo' (1,000) achiyab' che i ajawinel chi o chila Maaca xaq lajujmo' juchiy (12,000) aj Is-tob.

⁷ Xwiri ma David xretamaj, rumali xutaq b'i ma Joab ku' konojel achiyab' chi lik ko kiwach i je yij che i ch'oj.

⁸ Konojel aj Amón xkiyijb'a b'i kib' chu'anik ch'oj, xe'el pa tinimit, xe'e k'a pa taq elb'al re i tinimit le, tz'aqat i achiyab' chi je yij chik che i ch'oj aj Siria, aj Soba, aj Rehob, aj Is-tob, xaq aj Maaca xkuwaj kib' pa taq es.

⁹ Are xril ma Joab chi je o ajch'oj chrij chwach, are uri xeu'ul achiyab' aj Israel chi lik mas ko kiwach xaq lik kkiriq i ch'oj chi xeutaq la chuyijb'axik kib' chu'anik ch'oj ku' aj Siria.

¹⁰ Te'uri ni'pa i jub'an chik achiyab' chi je yij che i ch'oj, xeuya kan chuqul ucha' chi ma Abisai man kki'an ni ch'oj ku' aj Amón.

¹¹ Are uri xub'ij che ma Abisai: “I aj Siria we lik mas kkiriq u'anik ch'oj chinwach yin, katpe uri yet chinto'ik; xaq i aj Amón we mas kkiriq u'anik ch'oj chawach yet, kin-e uri yin chato'ik.

¹² Chakowij ak'ux, chqakoch'ij qib' chojkeb' rumal qatinimit xaq rumal utinimit i qa-Dios. ¡I Ajwal chu'ana na pacha kumaj uwach ire!”

¹³ Are uri ma Joab junam ku' achiyab' chi je yij che i ch'oj chi je o ru', xe'e chu'anik ch'oj chkij aj Siria, xwiri i aj Siria le xe'anmajik.

¹⁴ I aj Amón, are xkilo chi xe'anmaj aj Siria xaq ike xe'anmaj chwach ma Abisai, xe'ok la b'i pa tinimit. Are uri ma Joab xumayij u'anik ch'oj chkij aj Amón, te'uri xtzalij chub'i pa Jerusalén.

¹⁵ I aj Siria are xkina ub'e chi xech'ak kumal aj Israel, xkimol chik kib'.

¹⁶ Are uri ma Hadad-ezer, xutaq kik'amik aj Siria chi je o chila ch'aqa ya Éufrates, are uri ike le xeupon chila pa Helam. Are ma Sobac nab'e chkiwach man are ire aj-atzil chke achiyab' chi je yij che i ch'oj re ma Hadad-ezer.

¹⁷ Xwiri ronojel ni'pa ktijin u'anik le, xlap che ma David, are uri ma David le xub'ij chke konojel achiyab' aj Israel chi je yij che i ch'oj chi kki'axuj i raqana Jordán man keupon chila pa tinimit Helam. Chila che i tinimit le i aj Siria xkitak'b'a kib' chu'anik ch'oj ru' ma David,

¹⁸ xwiri pa k'isb'al re xe'anmaj chkiwach aj Israel, i ma David xeukamsaj jo'chiy (40,000) achiyab' chi je yij che i ch'oj ajrij taq kaway xaq xeukamsaj jo'lajujwinaq jumo' (700) chi je o chupam i ch'ich' re anb'al ch'oj, xwi ta la ile, i ma David xukamsaj ma Sobac chi kaj-atzil achiyab' chi je yij che i ch'oj aj Siria, are uri lik chila xkam wi ma Sobac le.

¹⁹ Are xkil konojel i ajawinelab' chi kiya'om kiwach ru' ma Hadad-ezer chi xech'akan aj Israel, are uri konojel ike xkichomaj kib' ku' aj Israel xaq xekanaj kan pki'ab' aj Israel. Lik che uri i ij le konojel aj Siria lik xkixij kib' xaq xekito ti chik aj Amón.