2 Reyes 5 - Wuj Pa K'ubultzij

Ukuntajik ma Naamán che i yob'il che utz'umalil

¹ O jun achi chi ma Naamán ub'i, ire aj-atzil ke i achiyab' chi je yij che i ch'oj, re i ajawinel pa tinimit Siria. I ma Naamán le, lik k'ax kna' rumal i ajawinel, man i Ajwal uya'om jun nim laj ch'akanik che i tinimit Siria rumal i ma Naamán le. Xwiri o jun yob'il che utz'umalil.

² Xuk'ulmaj juyak, are xki'an ch'oj aj Siria chkij aj Israel, che i ch'oj le xkichap b'i jun ali aj Israel, i ali le xkanaj kan pa taqon chrij i rixoqil ma Naamán.

³ I ral ali le xub'ij che i rixoqil ma Naamán, chi rajaw: —I rajaw inchak, wetene k-e chrilik jun profeta chi o chila Samaria, lik kkuntaj uri che i uyob'il che tz'umalil le.

⁴ Ma Naamán x-e chub'ixkil che i rajawinel wach taq xub'ij i ali le.

⁵ Are uri i ajawinel aj chila pa tinimit Siria xub'ij: —Utzi', jat, yin kintaq nu b'i jun wuj che i ajawinel ke aj Israel. Are uri ma Naamán xumaj b'i ub'e; xuk'am b'i jo'lajujmo' oxchiy (30,000) saqpwaq, jo'lajujmo' (6,000) an-o'oj xaq lajuj molaj k'ul.

⁶ Keje uri ile, chi xuk'am b'i i wuj che i ajawinel, chi keje iri kub'ij: “Are kupon i wuji pa'ab', kawetamaj uri chi kintaq b'i ma Naamán awu', chi are jun chke i wajpatanib', man kakunaj i yob'il che utz'umalil.”

⁷ I ajawinel are xrajlaj uwach i wuj, xuraqch'ij u'u', rumal wach taq kub'ij i wuj le, rumali xub'ij: —¿Xatab'a in Dios taq wa yin man o pin-ab' kinya k'aslemal xaq o pin-ab' kwesaj k'aslemal, man i ajawinel le kutaq li jun winaq chwe re kinkunaj i yob'il che utz'umalil? ¡Chikojo pe retalil, chi ire le xa to' ktijin chutzukuxik ch'oj chwij! —Xcha.

⁸ Are xretamaj ma Eliseo chi i ajawinel xuraqch'ij u'u' rumal i wuj, xutaq ub'ixkil che: “¿B'uchak chi xaraqch'ij a'u'? Chataqa li achi le wu', man keje ile kretamaj na chi o profeta waral pa Israel.”

⁹ Are uri x-e ma Naamán, xuk'am b'i uch'ich' xaq ukaway, are xuponik xtak'i xol uchija che i rachoch ma Eliseo.

¹⁰ Xwiri ma Eliseo xutaq b'i jun ajb'il tzij chub'ixkil i tziji che ma Naamán: “Jat, chach'aja ach'akul wuqmul chila chupam i raqana Jordán, man keje ile kkuntaj ach'akul che i yob'il che tz'umalil chi o chawe le.”

¹¹ Are xuta ma Naamán ile, lik xpe roywal, are x-ek, xujeq ub'ixkil i tziji: —Kinb'ij yin, kel li chink'ulaxik, xaq ktak'i chutz'onoxik che i Ajwal chi u-Dios, xaq kuya u'ab' puwi i k'ax chi o che inch'akul, keje ile kel ni i yob'il che intz'umalil.

¹² ¿Xatab'a je are ti i raqana re i Damasco, Abana xaq i Farfar, lik mas utz chwach ronojel i raqana chi o pa Israel? ¿Utz ti b'ari xin-e ti pa atinem chupam jun chke i raqana le, man kch'ajtaj b'i i k'ax chwij, i lik kinutzir na? I lik mi'naq roywal xtzalij b'ik.

¹³ Xwiri i je utaqon, xetejeb' pan ru', xkib'ij che: —Nim laj Winaq, i profeta we katutaq chu'anik jun b'iroxik chi lik k'ax k-anik, ¿Ka'an ti uri? Ire xwi xatutaq che atinem wuqmul chupam i raqana le, man keje ile katutzirik.

¹⁴ Are uri ma Naamán, x-e pa raqana Jordán, wuqmul xumuq rib' chupam i raqana le. Chrij pacha b'ital che rumal i profeta, are uri uch'akul xutzirik, lik x-on pacha uch'akul jun ral ak'al chi lik ch'u'.

¹⁵ Are uri ma Naamán le xaq konojel i je rachnimam b'ik, xe'e chila ipa o wi ma Eliseo. Are xeuponik, ma Naamán xub'ij che: —¡Wo'or lik kinkojo chi nti Dios chwach ronojel i jyub' ta'aj, lik xwi pa Israel olik! Rumali yin, kwaj chi kak'am i siponi chi xuk'am li awajchak chawe.

¹⁶ Xwiri ma Eliseo xub'ij che: —Lik kinb'ij pub'i i Ajwal, chi kinrilo, kinb'ij chawe chi kink'am ti sipon chi kasujuj chwe le. Tupu ma Naamán xu'an pen che ma Eliseo, xwiri ma Eliseo lik xuk'am taj.

¹⁷ Are uri ma Naamán xub'ij chik: —We kak'am ti insipon, chaya b'i uri chwe chi kink'am b'i keb' kaway ulew aj waral Israel; man i awajchaki lik nti chik jun sujunik ku'an che jun chik dios, lik xwi che i Ajwal.

¹⁸ Xwi kintz'onoj che i Ajwal chi chukuyu jun b'iroxik chwe: Are k-e i ajawinel prachoch i dios Rimón, xaq are i ajawinel le kuk'am ni ucho'ab' puwi inteleb', xaq are kinxuki ni chupam i rachoch i dios le, chukuyu ni inmak i Ajwal.

¹⁹ Ma Eliseo xub'ij che: —Jat, lik matk'achirik. Are uri ma Naamán xel chila che i k'ijib'al le, are naj chik jub'i' o wi,

²⁰ are uri ma Giezi, chi rajtaqon i profeta ma Eliseo, xuch'ob' keje iri: “I wajawinel xuya b'i che ma Naamán, chi aj Siria, x-ek, lik xuchap ti che wach rok'am li ire che. Lik pub'i i Ajwal kinb'ij chi lik kinterej la b'i chrij, kwilb'ej re we o kintiki kan chuk'amik che.”

²¹ Are uri ma Giezi xterej b'i chrij ma Naamán; are ma Naamán xrilo chi teren b'i chrij, xqaj la li chupam uch'ich', x-e la chuk'ulaxik, xutz'onoj che: —¿Moqxa o jun utz taj ktijin uk'ulmaxik?

²² Are uri ma Giezi xub'ij: —Nti jun utz taj ktijin uk'ulmaxik. Xwiri i rajaw inchak xinutaq li chub'ixkil chawe, chi k'ate xeupon keb' profeta ru' chi lik k'a je alab'om, ike le je petnaq chila che i jyub' Efraín, rumali kutz'onoj jun utzil chawe chi kaya b'i lajujwinaq wuqmo' (3,000) saqpwaq xaq keb' molaj k'ul chke.

²³ Ma Naamán xub'ij che: —Cha'ana utzil chwe, chak'ama b'i jo'lajujmo' (6,000) saqpwaq. Ma Naamán lik xu'an pen che chi kuk'am b'ik, are uri xuya chupam keb' koxtal junam ru' i keb' molaj k'ul, xuya b'i chke keb' rajtaqon, xenab'ej b'i chwach ma Giezi.

²⁴ Are xeupon puwi i jyub' chila ipa o wi i rachoch, are uri ma Giezi xuk'am i saqpwaq chi kik'amom b'i taqon; chrijil chik ile, xub'ij chke chi che'oj, te'uri xuk'ol i mer chupam i rachoch.

²⁵ Te'uri xeuk'utu rib' chwach i rajaw chi ma Eliseo, are uri ma Eliseo xutz'onoj che: —¿Ipa xatpe wi yet, ma Giezi? Are uri ma Giezi xub'ij che: —Yin, nti in enaq wi.

²⁶ I ma Eliseo xub'ij chik che: —Are xqaj li ma Naamán chupam uch'ich' chak'ulaxik, chila o wi wanima yin chrilik ronojel. Xwiri wo'or, are ti or iri chi kqak'am taq saqpwaq, molaj k'ul, ulo'ik ulew, ulo'ik tikb'al uva, ulo'ik chij, ulo'ik b'oyexab', ulo'ik ajtaqon achiyab' xaq ajtaqon ixoqib'.

²⁷ Rumali, i yob'il che utz'umalil chi o te'eq che uch'akul ma Naamán k-ax wo'or che ach'akul yet xaq che kich'akul awalk'uwal ronojel ij saq; xcha ma Eliseo che. Are xel ma Giezi chwach ma Eliseo, are uri lik nojnaq chik uch'akul che i yob'il che utz'umalil, lik saq u'anom che uch'akul pacha taq saqb'ach.