1 Samuel 9 - Wuj Pa K'ubultzij

Uriqik kib' a Saúl ru' ma Samuel

¹ Chkixol utzob'ajil ma Benjamín o jun achi chi ma Cis ub'i, chi uk'ojol ma Abiel, ri umam ma Zeror; uqajaw ma Zeror le are ma Becorat, uqajaw ma Becorat le are ma Afía. I ma Cis are jun achi chi lik o u'ij kumal i winaq,

² ire le o jun uk'ojol chi k'a k'ojol ala xaq lik chom, a Saúl ub'i. Lik nti chik jun aj Israel pacha uchomal xaq pacha unajtil rij ire.

³ Xuk'ulmaj jun ij chi ma Cis le xesach u'axna, rumali xub'ij che a Saúl chi uk'ojol: —Chayijb'a awib' man kat-e chkitzukuxik i atitab' axna, chak'ama b'i jun chke i mokom awu'.

⁴ Are uri a Saúl xaq i mokom xe'e chutzukuxik i axna, xeik'aw che ronojel i rulew ma Efraín tzam taq jyub', te'uri xeik'aw che i ulew Salisa, xwiri xeuriq taj. Xaq xeik'aw che i k'ijib'al Saalim, chrijil chik ile xe'e chila ipa o wi rulew ma Benjamín xaq xeuriq ti chila.

⁵ Are xeupon chila che ulew Zuf, i a Saúl xub'ij che i mokom chi enaq ru': —Chojtzalij b'ik, man inqajaw lik kk'achir ne chik chqe yoj wo'or chkiwach i axna.

⁶ Are uri i mokom xub'ij che: —Che i tinimiti o jun profeta chi konojel i winaq lik kkiya u'ij, man ronojel ni'pa kub'ij lik saqil ke'eloq. Jo' ru', moqxa kub'ij chqe pachike b'e kqamaj b'ik.

⁷ —Jo ri' —xub'ij a Saúl che i mokom—. Xwiri, ¿Wach nawi kqak'am b'i che i achi le? Man nti ne chik qawa chupam qateb', lik nti kqaya ri che profeta le —xcha.

⁸ Are uri i mokom xub'ij che: —O jun ral saqpwaq wu' yin, kqaya che i profeta le man keje ile kub'ij ni chqe pachike taq b'e kqamaj b'ik.

⁹ (Ujer, we o jun aj Israel kraj klapan ru' i Dios, keje iri kub'ij: “Jo ru' i achi chi kya' retamaxik che wach kk'ulmax chweq kab'ij”, chi wo'or “profeta” kb'ix che).

¹⁰ Are uri a Saúl xub'ij che i mokom: —Utzi', jo' ri chila. Are u'ankil uri chi chekeb' xe'e pa tinimit ipa jeqel wi i profeta.

¹¹ Are kimajom b'i jyub' enam ke pa tinimit, xkik'ulaj jub'an altom chi enam ke chrelsaxik li kiya', are uri xkitz'onoj chke: ¿Chi kqariq wi i achi chi kya' retamaxik che wach kk'ulmax chweq kab'ij?

¹² —Waral xecha, xwiri k'a jela panoq. Lik chib'isoj, man ire o tan chi pa tinimit man wo'or ksujux i sipon pa lo'laj k'ijib'al re i Dios.

¹³ Are kixupon chila, su' chitzukuj are k'amaja k-e pa wa'im chila pa lo'laj k'ijib'al re i Dios. Man i winaq kkitij ti kiwa we uponnaq ti ire, man are ire kutioxij che i Dios puwi i sipon, te'uri kkitij i winaq chi je sik'tal che i wa'im. Rumali su' chib'isoj b'ik man wo'or k'a kiriq chila.

¹⁴ Are uri a Saúl xaq i mokom xe'e la pa tinimit; are ktijin b'i kokik, xkik'ulaj chwach ma Samuel enam re pa lo'laj k'ijib'al re i Dios ipa k-an wi i wa'im.

¹⁵ Jun ij chuxe'el ruponik a Saúl, i Ajwal ub'im chik iri che ma Samuel puwaram:

¹⁶ “Chweq pacha u'onom ori, kintaq li jun achi awu' chi kpe putinimit ma Benjamín. I achi le kajach ni pin-ab' man kkanaj na ajawinel puwi intinimit Israel. I ajawinel le keresaj ni intinimit pki'ab' aj Filistea, man intinimit kikojom uch'ojil chwe, rumali Yin kwil ni tob'al kiwach.”

¹⁷ I ma Samuel are xril a Saúl, are uri i Ajwal xub'ij che: “Are i achi ile chi xinb'ij chawe pa waram, are ire le ku'at ni tzij puwi intinimit.”

¹⁸ Are je o chik chila pa okb'al re i tinimit are uri a Saúl xtejeb' pan ru' ma Samuel, xub'ij che: —Cha'ana jun utzil chwe, chab'ij chwe ipa o wi i rachoch achi chi kya' retamaxik che wach kk'ulmax chweq kab'ij.

¹⁹ I ma Samuel xub'ij: —Yin ile chi kya' retamaxik chwe wach kk'ulmax chweq kab'ij. Jo', chatnab'ej b'i chinwach, pa lo'laj k'ijib'al re i Dios man katij awa wu' wo'or chila. Chweq we' kinb'ij chawe ronojel ni'pa katz'onoj chwe te'uri kat-ek.

²⁰ I axna chi je sachnaq pa oxib' ij kanoq, matk'achir kumal man je riqtajnaq chik. Xwi ta la ile, ronojel ni'pa i rayijb'al uwach chi o chila pa Israel, awe yet na xaq ke ni awalk'uwal.

²¹ Are uri a Saúl xub'ij: —Wach u'anik uri ile, man yin in jun chke utzob'ajil ma Benjamín chi lik je k'i taj chkiwach jub'an chik tzob'ajil aj Israel; xwi ta la ile, i walk'uwal yin lik je k'i taj chkiwach i jub'an chik alk'uwal re ma Benjamín. ¿B'uchak kab'ij ronojel ile chwe?

²² Are uri ma Samuel xuk'am b'i a Saúl xaq i umokom pa nim laj ja re i tinimit, xeukub'a che i k'ijib'al chi lik nim u'ij chkixol ni'pa je o chila chi kolo je lajuj juwinaq (30) achiyab'.

²³ Are uri ma Samuel xub'ij che i ajyijb'al wa: —Chak'ama li ti'ij chi xinya chawe chi xaq xinb'ij chawe chi kawesaj jun la.

²⁴ Are uri i ma ajyijb'al wa le, xresaj li jun ra' ti' xuya che a Saúl; are uri ma Samuel xub'ij che: —Are i ti' ile chi in-ulum kan chawe. Chatija man yin in-ulum kan chawe che i iji, chi insik'im konojel i winaq chwa'im. Are uri a Saúl xutij uwa ru' ma Samuel che i ij le.

²⁵ Are xeutzin li che i wa'im xe'el li pa lo'laj k'ijib'al, xe'e pa tinimit, xkiyijb'a jun uwarb'al a Saúl chila pukale ja,

²⁶ te'uri xwarik. Are xsaqir chukab' ij, ma Samuel xusik'ij an a Saúl pukale ja xub'ij che: Chatwalijoq, man kamaj chub'i ab'e. —Are uri xwalij, ma Saúl. Te'uri i ma Samuel le xrachnimaj b'ik, xe'el pa b'e.

²⁷ Are xe'el b'i tzam ja, are uri ma Samuel xub'ij che a Saúl: —Chab'ija che i amokom chi knab'ej b'ik, man yet rajwaxik chi kawoy-ej ni jub'i', man kinb'ij ni chawe wach xub'ij i Dios chwe.