1 Samuel 25 - Wuj Pa K'ubultzij

Ukamik ma Samuel

¹ Are xkam ma Samuel, konojel aj Israel xkimol kib' che i o'ej ru'. Xkimuq chi rachoch chila pa Ramá. Chrijil chik ile i ma David x-e pa tz'inilik jyub' chaqij Parán.

Ma David xaq ati Abigail

² Chila pa tinimit Maón o jun achi lik b'eyom chi o lajujwinaq wuqmo' (3,000) chij ru', lajujwinaq kamo' (1,000) chab'at xaq o jun nim laj uk'ay chila pa tinimit Carmel, ipa kuk'upij wi kismal uchij arewi.

³ I b'eyom laj achi le ma Nabal ub'i, chi umuq uxikin ma Caleb; ire lik k'an laj achi chi xaqmanal ku'ano, xwiri i rixoqil chi ati Abigail lik chom laj ixoq xaq lik o uno'oj.

^4-5 I ma David are o chila pa tz'inilik jyub' chaqij, xretamaj chi ma Nabal ktijin chuk'upixik kismal uchij chila pa Carmel, xeutaq b'i lajuj chke umokom chuya'ik rutzil uwach ma Nabal le,

⁶ ru' i tziji: “Ma Nabal, chak'ama i rutzil ink'ux chawe chi are rutzil awach, rutzil kiwach awak'al xaq konojel ni'pa je o awu' chi awachoch.

⁷ Xwetamaj chi kattijin chuk'upixik kismal achij. Rumali kwaj kinb'ij chawe chi ajyu'ul achij xek'iji pa Carmel chila qu' yoj, che ronojel ij le chi xojk'iji junam, lik nti pich' ch'ich'anik xqa'an chke xaq lik nti xqamaj chke.

⁸ Utz chatz'onoj chke awajchak, man ike le kkib'ij ni chawe chi qatzij ni'pa kintijin chub'ixkil chawe, rumali kintz'onoj utzil chawe chi chawila tob'al kiwach achiyab' are keuponik, chi chaya chke ike le xaq chwe yin wach taq o awu', man in pacha ak'ojol.”

⁹ Are uri umokom ma David xe'e chub'ixkil che ma Nabal wach xb'ix b'i chke rumal ma David, xekanaj chila chroy-exik wach kb'ix chke rumal ma Nabal.

¹⁰ Xwiri ma Nabal xub'ij chke: —¿Pachin taq ma David le? ¿Pachin taq uk'ojol ma Isaí le? ¡Wo'or lik je k'i taqon chi ke'anmaj chkiwach i kajaw!

¹¹ ¿Xatab'a kink'am i wa, ti'ij xaq i ya chi inyijb'am chik ke inmokom chi kek'upiw kismal inchij, kinya taq chke i winaq chi weta'am taj ipa taq kepe wi?

¹² Are uri umokom ma David xetzalij loq, are xeuponik, xkilap che ma David ronojel wach taq xub'ij li ma Nabal chke.

¹³ Are uri ma David xub'ij chke uwinaq: —¡Iwonojel chik'ama b'i anb'al ch'oj! Are uri konojel xkiya b'i kich'ich' chi o uware k'ulala chwa ka' xaq keje ile x-on ma David; je jumo' (400) achiyab' xe'e ru' ire xaq lajujwinaq (200) xekanaj kan chuchajixik i jalajuj taq b'iroxik chi o ku'.

¹⁴ Xwiri jun chke umokom ma Nabal, x-e chub'ixkil che ati Abigail, chi rixoqil ma Nabal, xub'ij che: —I ma David xeutaq li jub'an uwinaq k'a chila pa tz'inilik jyub' chaqij chuya'ik rutzil uwach ma Nabal, xwiri ire lik utz ti ula'ik uwach xu'an chke.

¹⁵ Xwiri yoj qeta'am chi achiyab' le lik je utz laj taq winaq qu', man nti taq xojkich'ich'a xaq nti taq xkimaj chqe are xojb'in junam ku' k'iyal ij pa taq es.

¹⁶ Lik xojkichajij yoj xaq konojel i qachij, pa'ij chicha'ab'.

¹⁷ Xwiri, i awachijil yet le, lik to' kk'achk'atik kraj taj katch'aw ru', chach'ob'o yet uri xaq chawila wach ka'ano, man lik saq laj tzij o jun utz taj kuk'ulmaj ire xaq konojel i ralk'uwal.

¹⁸ Are uri i ati Abigail xuk'am la pan lajujwinaq (200) wa re trigo, keb' tz'um uwa'al uva muqb'am, jo'ob' chij b'olom, oxib' almul jok'om trigo, jo'winaq (100) chaqij uva antal sotsaq che xaq lajujwinaq (200) ral taq sotsaq chaqij higo. Te'uri xkiya la b'i chkij i axna,

¹⁹ xaq xub'ij chke umokom: —Chixnab'ej b'i yix man yin k'ate kixinmaja panoq. Ronojel ni'pa ile xulap ti che i rachijil,

²⁰ ati Abigail le x-an b'i chrij u'axna, keje ile ani'al xqaj b'i chrij jun jyub'. Are uri xrilo chi ma David junam ku' uwinaq je petnaq, are uri ire x-e chkik'ulaxik.

²¹ Ma David are ktijin che i b'e xuch'ob' i tziji pujolom: Lik nti xuya re chwe chi xinchajij ronojel uchij ma Nabal pa tz'inilik jyub' chaqij xaq nti xink'am che ub'itaq re, man ire wo'or ku'an jun utz taj chwe puk'exel i utz chi xin-an yin che.

²² Rumali chi xub'ij i tziji pub'i i Ajwal: “Chuya ni utojb'alil i Dios chwe we keje taq iri chweq je inkamsam ti konojel i achiyab' chi je rachalal.”

²³ Ati Abigail are xril ma David, xqaj li chrij u'axna, xuqajsaj upalaj k'a chwach ulew k'utb'al re chi lik o u'ij.

²⁴ Are uri xxuki chwach ma David xaq xub'ij che: —Nim laj winaq, chtzaq ni tojpen pinwi yin, xwiri lik kintz'onoj jun utzil chawe chi chaya ni chwe chi kinlapan jub'i' awu' xaq chata ni usuk' intzij.

²⁵ Makoj retalil wach xub'ij ma Nabal chawe, man ire are jun achi chi lik k'ax kch'awik xaq lik kukoj u'ij, rumali chi lik nti uno'oj ub'i, rumal utz ti u'anik ku'an che i ni'pa i ku'ano. I awajchaki xeril ti i taqon chi xeataq b'i chuya'ik rutzil uwach ire.

²⁶ Lik saq laj tzij i Ajwal kuya ti chawe chi katk'un chu'anik i kamsanik xaq kola'ana taq i atb'al tzij pacha to' arayijb'al yet. I Dios chu'ana chi konojel ni'pa i ajch'oj chawij xaq konojel ni'pa kkaj u'anik i utz taj chawe, kkik'ulmaj na pacha kuk'ulmaj ma Nabal.

²⁷ Wo'or kintz'onoj utzil chawe chi ronojel ni'pa i sipon chi ink'amom li chawe, chjach ni chkiwach konojel ni'pa awajchak chi at kachnimam,

²⁸ chakuyu ni umak i awajchaki, lik saq laj tzij i Ajwal ku'an ni chawe yet xaq chke awalk'uwal chi lik arewi ki'at ni tzij man yet lik kattijin chu'atik apen rumal i Ajwal, xaq che ronojel ak'aslemal mijun k'ax kak'ulmaj na.

²⁹ We o taq jun katuterb'ej man kraj taq akamsaxik, xwiri ak'aslemal yet lik nti kuk'ulmaj man o pu'ab' Awajwal Dios. I je ajch'oj chawij lik kek'aq nu b'i rumal i Ajwal pacha uk'aqik b'i jun ab'aj ru' k'aqb'al ab'aj.

³⁰ Rumali, i Ajwal are kuya ronojel ni'pa i utz chi usujum chawe, xaq are katuya kan pa kaj-atzil i winaq aj Israel,

³¹ lik nti taq k-ututi pak'ux man nti taq jun kamik a'anom xaq nti taq atb'al tzij a'anom pawach wi. I Ajwal are u'anom chik nim chawe, msach i awajchaki chak'ux.

³² Are uri ma David xub'ij che: —Lik nim u'ij i Ajwal chi ki-Dios aj Israel chi xatutaq li chink'ulaxik wo'or,

³³ xaq lik utz awe yet chi xa'an i suk'ulik, man xaya ti chwe chi kin-an taq jub'an kamik xaq kin-an taq atb'al tzij pacha to' kwaj yin.

³⁴ Lik saq laj tzij kinb'ij chawe pub'i i Ajwal chi ki-Dios aj Israel, chi are ire xuya ti chwe chi kin-an taq jun k'ax chawe. Wetene xatb'ay taj chintzukuxik, chweq konojel achiyab' chi je ralk'uwal ma Nabal kekam te'eq.

³⁵ Are uri ma David xuk'amo wach k'amtal b'i che rumal ati Abigail xaq xub'ij che: —Utz kat-e chi awachoch, lik matb'ison chik; pacha xawilo ri, xinta wach taq usuk' alapanik wu' xaq xinya chawe wach xatz'onoj chwe.

³⁶ Are xupon ati Abigail ipa o wi ma Nabal, xrilo chi ktijin chu'anik jun nima'ij chi rachoch chi pacha i nima'ij chi kki'an i ajawinelab' rumal ki'ij. Ma Nabal lik o chupam jun nim laj kikotemal xaq ktijin che ab'arik, rumali chi ati Abigail nti xub'ij che, k'a chukab' ij xlapan ru',

³⁷ are ik'awnaq chik ab'arik che ma Nabal, are uri ati Abigail xulap che ronojel wach taq xk'ulmaxik. I Dios xu'an che ma Nabal le are chi are xuta ile, lik juntir xpe jun k'ax che ranima chi xusikirsaj uch'akul.

³⁸ Are ik'awnaq chik lajuj ij, i Ajwal xupetsaj chik jun yob'il che, are uri su' xkamik.

³⁹ I ma David are xretamaj chi xkam ma Nabal, are uri xub'ij: Lik nim u'ij i Dios man xu'an uk'exel che ma Nabal pacha kraj te'eq u'anik chwe yin. Xaq xuya ti chwe yin chi kin-an te'eq jun utz taj xaq xu'ano chi ni'pa i mak atzalal chi kraj te'eq u'anik ma Nabal chwe yin, chrij ire xtzaq wi. Chrijil chik ile i ma David xutaq ub'ixkil che ati Abigail chi kraj kk'uli ru'.

⁴⁰ Are xeupon i rajchak ma David che i lapanik ru' ati Abigail chila pa Carmel, xkib'ij che: —Ma David xojutaq li chak'amik man kraj k-on rixoqil chawe.

⁴¹ Are uri ati Abigail xuqajsaj upalaj k'a chwach ulew k'utb'al re chi o ki'ij rajchak ma David xaq xub'ij chke: —Yin xa in jun rajchak ma David, lik ru' ronojel ink'ux kinch'aj kaqan i winaq chi je o pa k'ax rumal ire, we kinutaq che.

⁴² Are xb'itaj ile, juntir xuyijb'a ub'itaq re, te'uri x-an chrij jun axna, xterej b'i chkij i achiyab' chi je utaqom b'i ma David xaq x-achnimax b'i kumal jo'ob' rajke'el, are xupon ru' ma David xk'uli ru'.

⁴³ Xwi ta la ile, i ma David xaq xk'uli ru' ati Ahinoam chi aj chila pa tinimit Jezreel, chekeb' xu'an rixoqil chke.

⁴⁴ I ma Saúl uya'om chik umi'al, chi ati Mical, chi rixoqil te'eq ma David, che ma Palti, i ma Palti le, uk'ojol ma Lais chi aj chila pa tinimit Galim.