PRIMER LIBRO DE CR%D3NICAS 27 - Wuj Pa K'ubultzij

Tzob'ajil ke i achiyab' ajch'oj xaq i aj-atzil re i rajawinik ma David

¹ Iri are kib'i i aj-atzil ke i alk'uwalil, je aj-atzil ke i tzob'aj re lajujwinaq kamo' (1,000) xaq re jo'winaq (100) achiyab' chi je yij che i ch'oj xaq jub'an chik aj-ok'al utzam chke i achiyab' chi je yij che i ch'oj. Xki'an jalajuj taq tzob'aj re oxchiy (24,000) achiyab' chi ik' ik' o u'ijlal kichak, anb'al re kipatan chrij i ajawinel.

² I aj-atzil ke ajchajinel re i nab'e ik', are ma Jasobeam, chi uk'ojol ma Zabdiel,

³ chi umuq uxikin ma Fares, ire xaq aj-atzil chke konojel aj-atzil chi kechajin che i nab'e ik' le.

⁴ I aj-atzil ke ajchajinelab' re ukab' ik', are ma Dodai, chi aj Ahohi.

⁵ I aj-atzil ke ajchajinelab' re urox ik', are ma Benaía uk'ojol ma Joiada chi atz laj ajsujul sipon,

⁶ i ma Benaía le are jun chke i je lajuj juwinaq (30) achiyab' chi lik ko kiwach, xaq are aj-atzil pkiwi ike le. Xwiri uk'ojol, chi ma Amisabad, are kyaw i taqanik pkiwi i ajchajinelab' le.

⁷ I aj-atzil ke i ajchajinelab' che ukaj ik', are ma Asael, chi ucha' ma Joab; i ma Asael le xkanaj uk'ojol puk'exel, chi ma Zebadías.

⁸ I aj-atzil ke i ajchajinelab' che ujo' ik', are ma Samhut chi aj Izraíta.

⁹ I aj-atzil ke i ajchajinelab' che uwaq ik', are ma Ira, chi uk'ojol ma Iques, aj pa tinimit Tecoa.

¹⁰ I aj-atzil ke i ajchajinelab' che uwuq ik', are ma Heles chi aj Pelonita, umuq uxikin ma Efraín.

¹¹ I aj-atzil ke i ajchajinelab' che uwajxaq ik', are ma Sibecai chi aj Husa, umuq uxikin ma Zera.

¹² I aj-atzil ke i ajchajinelab' che ub'elej ik', are ma Abiezer chi aj Anatot, umuq uxikin ma Benjamín.

¹³ I aj-atzil ke i ajchajinelab' che ulajuj ik', are ma Maharai chi aj Netofa, umuq uxikin ma Zera.

¹⁴ I aj-atzil ke i ajchajinelab' che ujulajuj ik', are ma Benaía chi aj Piratón, umuq uxikin ma Efraín.

¹⁵ I aj-atzil ke i ajchajinelab' che ukab'lajuj ik', are ma Heldai chi aj Netofa, umuq uxikin ma Otoniel.

¹⁶ I aj-atzil ke i jalajuj taq tzob'ajil aj Israel je are iri: Che utzob'ajil ma Rubén o ma Eliezer, chi uk'ojol ma Zicri; che utzob'ajil ma Simeón, o ma Sefatías chi uk'ojol ma Maaca;

¹⁷ che utzob'ajil ma Leví are ma Hasabías, chi uk'ojol ma Kemuel, chi umuq uxikin ma Aarón xaq ma Sadoc;

¹⁸ che utzob'ajil ma Judá, o ma Eliú chi katz kicha' kib' ru' ma David; che utzob'ajil ma Isacar, o ma Omri, chi uk'ojol ma Micael;

¹⁹ che utzob'ajil ma Zabulón, o ma Ismaías, chi uk'ojol ma Abdías; che utzob'ajil ma Neftalí, o ma Jerimot chi uk'ojol ma Azriel;

²⁰ che utzob'ajil ma Efraín, o ma Oseas, chi uk'ojol ma Azazías; che nik'aj utzob'ajil ma Manasés, o ma Joel, chi uk'ojol ma Pedaías;

²¹ che nik'aj chik utzob'ajil ma Manasés le chi je o pa tinimit Galaad, o ma Iddo chi uk'ojol ma Zacarías; che utzob'ajil ma Benjamín, o ma Jaasiel chi uk'ojol ma Abner;

²² che utzob'ajil ma Dan, o ma Azareel, chi uk'ojol ma Jeroham. Je are aj-atzil ile ke i jalajuj taq tzob'ajil aj Israel.

²³ Ma David xerajlaj ti konojel ni'pa k'amaja juwinaq junab' chke, man i Ajwal ub'im chi kupaxsaj ni kiwach aj Israel pacha i ch'umil chi je o chwa taq kaj.

²⁴ Ma Joab xujeq te'eq kajlaxik i winaq, xwiri xuk'is ti chik, man rumal i ajlanik le, xpe jun itzel laj k'ax pkiwi aj Israel. Rumali chi tz'ib'tal ti chupam uwuj ma David chi ajawinel, je ni'pa aj Israel.

²⁵ Ma Azmavet, chi uk'ojol ma Adiel, are kk'olow mer, i ma Jonatán, chi uk'ojol ma Uziel, are aj-atzil che i jalajuj taq k'olb'al chi o pa jalajuj taq komon, i jalajuj taq k'olb'al chi o pa nimaq taq tinimit xaq ni'pa je o pa taq tinimit ch'utiq xaq ni'pa je o chila ipa kk'is wi uchi' i tinimit.

²⁶ I aj-atzil chke i achiyab' chi ketikan chwach ulew, are ma Ezri, chi uk'ojol ma Quelub.

²⁷ I aj-atzil chke i achiyab' ajyitz'ol i uva, are ma Simei, chi aj Ramat, xwiri i kk'olow i uwa'al uva muqb'am le pa jalajuj taq k'olb'al, are ma Zabdi, chi aj Sefam.

²⁸ I kok'aw utzam che i tikonb'al uva xaq che i jalajuj taq nimaq che' higuera chi o chila chwa ta'aj, are ma Baal-hanán, chi aj Gedera, xaq i kok'aw utzam che i k'olb'al i aceite, are ma Joás.

²⁹ I aj-ok'al utzam chke i aj-ilol chikop chi ke'esan chila chwach ulew Sarón, are ma Sitrai, chi aj Sarón. I aj-ok'al utzam chke i aj-ilol chikop chi ke'esan chila chwa ta'aj, are ma Safat, chi uk'ojol ma Adlai.

³⁰ I aj-ok'al utzam chke i aj-ilol kamey, are ma Obil, chi aj Ismael. I aj-ok'al utzam chke i aj-ilol axna, are ma Jehedías, chi aj Meronot.

³¹ Xaq i aj-ok'al utzam chke i aj-ilol chij, are ma Jaziz, chi aj Agar. Konojel ike le je are keok'aw utzam i ub'itaq re ma David, chi ajawinel.

³² Ma Jonatán, chi rikan ma David, chi lik o uno'oj xaq lik yijilik, are kpixb'aw ma David. Ma Jehiel, chi uk'ojol ma Hacmoni, are kerachnimaw i rak'al i ajawinel.

³³ I ma Ahitofel xaq are jun ajpixb'anel re i ajawinel; i ma Husai, chi aj Arquita, are jun achi chi lik kul uk'ux i ajawinel che.

³⁴ I xekanaj puk'exel ma Ahitofel, je are ma Joiada, chi uk'ojol ma Benaía xaq ma Abiatar. I aj-atzil chke uwinaq i ajawinel chi je yij che i ch'oj, are ma Joab.