Sòm 75 - 1998 Haïtienne

SÒM 75 (74) Se Bondye ki jij

(1) Pou chèf sanba yo. Se pou yo chante l sou menm lè ak chante ki di: Pa detwi. Sòm Asaf sa a se yon chante li ye.

¹ (2) N'ap fè lwanj ou, Bondye! N'ap fè lwanj ou! Se tout tan n'ap nonmen non ou! N'ap fè konnen bèl mèvèy ou fè yo!

² (3) Bondye di: — Mwen fikse yon dat pou jijman an. Lè sa a, m'a jije jan sa dwe fèt.

³ (4) Nou te mèt wè latè a ansanm ak tout sa k'ap viv sou li yo pran tranble, m'ap kenbe fondasyon li yo byen fèm.

⁴ (5) M'ap di moun k'ap fè grandizè yo: Sispann gonfle lestonmak nou! M'ap di mechan yo: Sispann fè awogans!

⁵ (6) Pa gonfle lestonmak nou konsa! Pa fè awogans konsa sou Bondye ki anwo nan syèl la!

⁶ (7) Jijman an pa sòti bò kote solèy leve a, ni bò kote solèy kouche a. Li pa sòti nan nò ni nan sid.

⁷ (8) Non. Se Bondye k'ap jije: L'ap bese yonn, l'ap leve yon lòt.

⁸ (9) Senyè a kenbe yon gode nan men l. Gode a plen divès kalite tranpe ki fèt ak diven. L'ap vide diven bay tout mechan ki sou latè, y'ap bwè, y'ap bwè san yo pa kite yon ti tak.

⁹ (10) Mwen menm, mwen p'ap janm sispann nonmen non Bondye Jakòb la. Mwen p'ap janm sispann chante pou fè lwanj li.

¹⁰ (11) L'a kraze fòs kouray mechan yo. Men, l'ap bay moun ki mache dwat yo plis kouray ankò!