Sòm 29 - 1998 Haïtienne

SÒM 29 (28) Vwa Senyè a

(1a) Se yon sòm David.

¹ (1b) Nou tout pitit Bondye yo, fè lwanj Senyè a! Fè lwanj Senyè a pou pouvwa ak fòs li genyen!

² Fè lwanj non Senyè ki gen pouvwa a! Adore Senyè a nan bèl kay ki apa pou li a!

³ Senyè a fè tande vwa li sou lanmè. Bondye ki gen pouvwa a fè loray yo gwonde. Senyè a ap mache sou tout lanmè a.

⁴ Vwa Senyè a se yon vwa ki gen pouvwa! Se yon vwa ki mande pou moun respekte l!

⁵ Vwa Senyè a kase pye sèd yo, li kase pye sèd peyi Liban yo.

⁶ Li fè mòn nan peyi Liban yo sote ponpe tankou ti gazèl bèf. Li fè mòn Siryon yo sote ponpe tankou jenn ti towo bèf.

⁷ Vwa Senyè a fè zèklè.

⁸ Vwa Senyè a fè dezè a tranble. Wi, li fè dezè Kadès la tranble.

⁹ Vwa Senyè a tòde pye chenn yo. Li fè tout fèy nan rakbwa tonbe. Nan Tanp li, tout moun ap fè lwanj pou li.

¹⁰ Senyè a te chita sou fòtèy li lè te gen gwo inondasyon an. L'ap gouvènen tankou wa pou tout tan.

¹¹ Senyè a va bay pèp li a fòs, l'a beni yo, l'a ba yo kè poze.