Sòm 121 - 1998 Haïtienne

SÒM 121 (120) Senyè a se tout pwoteksyon mwen

(1a) Se yon chante pou yo chante lè y'ap moute lavil Jerizalèm.

¹ (1b) Mwen leve je m, mwen gade mòn yo, mwen di: — Ki bò m'a jwenn sekou?

² Sekou mwen sòti nan men Senyè a. Se li menm ki fè syèl la ak latè a.

³ Li p'ap kite pye ou chape, moun k'ap veye sou ou a p'ap janm dòmi.

⁴ Moun k'ap veye sou pèp Izrayèl la p'ap kabicha, li p'ap dòmi.

⁵ Se Senyè a k'ap veye sou ou, l'ap kanpe bò dwat ou tankou lonbray ou. Se li ki tout pwoteksyon ou.

⁶ Lajounen, solèy la p'ap fè ou anyen, lannwit, lalin lan p'ap fè ou anyen.

⁷ Senyè a ap pwoteje ou pou anyen pa rive ou, li p'ap kite anyen rive ou.

⁸ L'ap pwoteje ou kit w'ap antre, kit w'ap sòti, depi kounyeya ak pou tout tan.