1 לכו נרננה ליהוה נריעה לצור ישׁענו׃ 2 נקדמה פניו בתודה בזמרות נריע׃ 3 כי אל גדול יהוה ומלך גדול על כל אלהים׃ 4 אשׁר בידו מחקרי ארץ ותועפות הרים׃ 5 אשׁר לו הים והוא עשׂהו ויבשׁת ידיו יצרו׃ 6 באו נשׁתחוה ונכרעה נברכה לפני יהוה עשׂנו׃ 7 כי הוא אלהינו ואנחנו עם מרעיתו וצאן ידו היום אם בקלו תשׁמעו׃ 8 אל תקשׁו לבבכם כמריבה כיום מסה במדבר׃ 9 אשׁר נסוני אבותיכם בחנוני גם ראו פעלי׃ 10 ארבעים שׁנה אקוט בדור ואמר עם תעי לבב הם והם לא ידעו דרכי׃ 11 אשׁר נשׁבעתי באפי אם יבאון אל מנוחתי׃ |