1 לדוד שׁפטני יהוה כי אני בתמי הלכתי וביהוה בטחתי לא אמעד׃ 2 בחנני יהוה ונסני צרופה כליותי ולבי׃ 3 כי חסדך לנגד עיני והתהלכתי באמתך׃ 4 לא ישׁבתי עם מתי שׁוא ועם נעלמים לא אבוא׃ 5 שׂנאתי קהל מרעים ועם רשׁעים לא אשׁב׃ 6 ארחץ בנקיון כפי ואסבבה את מזבחך יהוה׃ 7 לשׁמע בקול תודה ולספר כל נפלאותיך׃ 8 יהוה אהבתי מעון ביתך ומקום משׁכן כבודך׃ 9 אל תאסף עם חטאים נפשׁי ועם אנשׁי דמים חיי׃ 10 אשׁר בידיהם זמה וימינם מלאה שׁחד׃ 11 ואני בתמי אלך פדני וחנני׃ 12 רגלי עמדה במישׁור במקהלים אברך יהוה׃ |