1 למנצח על השׁמינית מזמור לדוד׃ (12:2) הושׁיעה יהוה כי גמר חסיד כי פסו אמונים מבני אדם׃ 2 (12:3) שׁוא ידברו אישׁ את רעהו שׂפת חלקות בלב ולב ידברו׃ 3 (12:4) יכרת יהוה כל שׂפתי חלקות לשׁון מדברת גדלות׃ 4 (12:5) אשׁר אמרו ללשׁננו נגביר שׂפתינו אתנו מי אדון׃ 5 (12:6) משׁד עניים מאנקת אביונים עתה אקום יאמר יהוה אשׁית בישׁע יפיח׃ 6 (12:7) אמרות יהוה אמרות טהרות כסף צרוף בעליל לארץ מזקק שׁבעתים׃ 7 (12:8) אתה יהוה תשׁמרם תצרנו מן הדור זו לעולם׃ 8 (12:9) סביב רשׁעים יתהלכון כרם זלות לבני אדם׃ |