Apocalipsis 18:10 - Alacatlatzala Mixtec New Testament

¹⁰ Ta narey yóꞌo xíká va̱ꞌa nakuita na no̱o̱ yóo ñoo yóꞌo, saá chi kuyi̱ꞌví ní na ki̱vi̱ koto na ña yo̱ꞌvi̱ ní xo̱ꞌvi̱ ña, ta ka̱ꞌa̱n na, kachí na saá: ―¡Ay! ¡Ay! ¡Ndáꞌví ní yóꞌó ñoo káꞌno Babilonia! ¡Ñoo ndeé ní, ta ñoo káꞌno ní xi̱kuu ún! ¡Ta ñii kama kuiti ki̱xi ña yo̱ꞌvi̱ ní xo̱ꞌvi̱ ún! ―saá ka̱ꞌa̱n narey ñoyívi ki̱vi̱ va̱xi.

Apocalipsis 18:10 הפניות הצלבה

Apocalipsis 18:19

Ta chiso na yaa̱ si̱ni̱ na, chi kuchuchú ní ini na, ta kuaku ní na, ta chuchú ní ka̱ꞌa̱n na, kachí na saá: ―¡Ay! ¡Ay! ¡Ndáꞌví ní ún ñoo káꞌno Babilonia, xíꞌin ndiꞌi ñakuíká ún! Chi ki̱sa kuíká ní ún ndiꞌi ni̱vi na kómí tón barco xíꞌin ndiꞌi ni̱vi na ni̱si̱kó ñakíaꞌvi ña ndíso tón barco, tón xíka no̱o̱ takuií mi̱ni. ¡Ta ñii kama kuiti ki̱xi ña ndi̱ꞌi xa̱ꞌa̱ ún! ―kachí ni̱vi yóꞌo xíꞌin ñoo káꞌno Babilonia ñii ki̱vi̱ ña va̱xi.

Apocalipsis 18:8

Ta saá ni, ñii ki̱vi̱ ña va̱xi nakutáꞌan ndiꞌi ña kini ní xo̱ꞌvi̱ nañoo yóꞌo, ta kixaa̱ ña kuaku na, kixaa̱ so̱ko kundoꞌo na, ta kixaa̱ ndee̱ ña xáꞌni ni̱vi, ta ko̱ko̱ na xíꞌin ñoꞌo̱ ña xíxi̱, ta saá kivi̱ nayóꞌo. Saá kundoꞌo na, chi ta̱a ta̱ndeé kúu Ndios, ta̱a ta̱ xáꞌnda chiño no̱o̱ yó kúu ra, ta Ndios kasa nani ra xa̱ꞌa̱ kua̱chi nañoo o̱n váꞌa yóꞌo, ta saxo̱ꞌvi̱ ní ra na ―káchí to̱ꞌon ki̱xi ñoyívi ni̱no xi̱ni̱ so̱ꞌo i̱.

Apocalipsis 14:8

Ta inka̱ ñaángel ñao̱vi̱ ña ndíko̱n sa̱ta̱ ñaángel yóꞌo, ndáchí ña ma̱ꞌñó ñoyívi ni̱no, ta káꞌa̱n ña káchí ña saá: ―Vitin ñoo káꞌno Babilonia xa na̱kava ña, ta ndu̱u ña ñoo ndáꞌví ní, ña o̱n ko̱ó ka̱ ndee̱ kómí, chi ñayóꞌo kúu yaꞌvi ña xa̱ꞌa̱ ña sa̱ndáꞌví ní ña ni̱vi ñoyívi. Nda̱tán yóo ñáñaꞌa̱ ñá kísi̱n xíꞌin kua̱ꞌa̱ ní nata̱a saá ni̱xi̱yo ñoo káꞌno Babilonia, chi ni̱vi nañoo yóꞌo na̱taxi xíꞌin mi̱i na ña keꞌé na kua̱ꞌa̱ ní no̱o̱ ña o̱n váꞌa. Ta ni̱vi na ñoo káꞌno Babilonia yóꞌo kéꞌé na nda̱tán kéꞌé ñii ñaꞌa̱ ñá ndeé ní chu̱ꞌu ndiꞌi ni̱vi ñoyívi ña koꞌo ní na vino xa̱ꞌa̱ ña saxíini rá na, ta keꞌé na kua̱ꞌa̱ ní no̱o̱ ña o̱n váꞌa, ñii ki̱ꞌva nda̱tán ke̱ꞌé mi̱i ñá ―káchí ñaángel.

Apocalipsis 17:12

’Ta ña u̱xu̱ ndi̱ki̱ tí yi̱yo ní káa, tí xi̱ni ún, káꞌa̱n ña xa̱ꞌa̱ u̱xu̱ narey na o̱n ta̱ꞌán kixáꞌá kaꞌnda chiño. Ta ki̱vi̱ kixáꞌá na kaꞌnda chiño na, ta kukomí na nda̱yí xíꞌin kiti̱ tí yi̱yo ní káa ña kuchiño kaꞌnda chiño na ñii hora kuiti.

Apocalipsis 11:8

Ta yi̱kí ko̱ñu ndi̱í na o̱vi̱ ta̱a yóꞌo kundo̱o ña yichi̱ káꞌno ña yáꞌa ma̱ꞌñó ñoo káꞌno Jerusalén. Ta ñoo káꞌno yóꞌo kúu no̱o̱ xa̱ꞌni na Jesucristo Ta̱a ta̱Káꞌno no̱o̱ yó, chi ka̱takaa̱ ndaa na ra ndaꞌa̱ tón cruz. Ta ni̱vi na o̱n váꞌa na táku̱ ñoo káꞌno yóꞌo, ñii ki̱ꞌva yóo na nda̱tán ni̱xi̱yo ni̱vi na o̱n váꞌa na xi̱taku̱ ñoo Sodoma án ñoo Egipto kui̱ya̱ xi̱na̱ꞌá.

Apocalipsis 16:19

Ta ñoo Babilonia ña sa̱kunaní ni̱vi “ñoo káꞌno” ni̱ta̱ꞌvi̱ ña u̱ni̱ xiiña xíꞌin ña ni̱ndiva no̱o̱ ñoꞌo̱ xa̱ꞌa̱ ña ni̱ta̱an ní. Ta ndiꞌi ñoo náꞌno ña yóo ñoyívi ndiꞌi xa̱ꞌa̱ ndiꞌi ña. Ta Ndios o̱n vása ní‑nandoso ra ña yóo kua̱ꞌa̱ ní ña o̱n váꞌa ke̱ꞌé ni̱vi ñoo káꞌno Babilonia, ta sáa̱ ní ini ra xíni ra ña o̱n váꞌa yóꞌo. Ta saá Ndios ta̱xi ra ña ndeé ní xo̱ꞌvi̱ ni̱vi nañoo yóꞌo xa̱ꞌa̱ ña o̱n váꞌa ke̱ꞌé na.

Apocalipsis 18:18

Ki̱vi̱ koto na ndasaá kua̱ꞌa̱n ndaa ñi̱ꞌma̱ ña kée no̱o̱ xíxi̱ ñoꞌo̱ ña xáꞌmi ñoo yóꞌo, ta ka̱ꞌa̱n na xíꞌin ndiꞌi ndee̱ na, kachí na saá: ―O̱n vása ní‑xiyo inka̱ ñoo nda̱tán ni̱xi̱yo ñoo káꞌno yóꞌo ―kachí na.

Apocalipsis 18:21

Ta saá ñii ñaángel ña kómí ndee̱ káꞌno ní ti̱in ña ñii yu̱u̱ káꞌno ña veé ní, ña káa nda̱tán yóo yu̱u̱ ña xíni̱ ñóꞌó ni̱vi no̱o̱ ndikó na trigo, saá káa ña. Ta nda̱níꞌi ña yu̱u̱ yóꞌo, ta sa̱kana ña yu̱u̱ yóꞌo ini takuií mi̱ni, ta ni̱ka̱ꞌa̱n ñaángel, káchí ña saá: ―Nda̱tán ndeé ní sa̱kana i̱ yu̱u̱ yóꞌo ini takuií, saá koo ña ndeé ní sakana Ndios yóꞌó ñoo Babilonia, ta o̱n kóo ka̱ ún nda̱ ñii ki̱vi̱ ñoyívi.