Apocalipsis 16:17 - Alacatlatzala Mixtec New Testament

¹⁷ Ta saá ñaángel ñau̱xa̱ na̱ndiso ndee ña copa níꞌi ña no̱o̱ ndáchí ta̱chi̱ kua̱ꞌa̱n ña. Ta veꞌe ño̱ꞌo káꞌno ñoyívi ni̱no no̱o̱ ñíndichi táyi̱ yi̱i̱ tón to̱ꞌó káꞌno, ke̱e to̱ꞌon ña ndeé ní káꞌa̱n, káchí ña saá: ―¡Vitin xa ku̱ndivi ndiꞌi ña! ―káchí ña.

Apocalipsis 16:17 הפניות הצלבה

Apocalipsis 21:6

Ta tuku ni̱ka̱ꞌa̱n ra xíꞌin i̱, káchí ra saá: ―Vitin xa ku̱ndivi ndiꞌi chiño ña chi̱tóni̱ i̱ kundivi ñoyívi no̱o̱ ñoꞌo̱. Ta yi̱ꞌi̱, na̱ní i̱ “Alfa xíꞌin Omega” chi yi̱ꞌi̱ kúu ta̱no̱ó, ta yi̱ꞌi̱ kúu ta̱sondíꞌí no̱o̱ ndiꞌi ña yóo. Ta ndiꞌi ni̱vi na yíchi̱ takuií, taxi si̱i̱ i̱ takuií koꞌo na. Ta takuií yóꞌo kómí rá ndee̱ ña taxi rá kutaku̱ ni̱vi ndiꞌi saá ki̱vi̱ ña va̱xi.

San Juan 19:30

Tá ndi̱ꞌi xi̱ꞌi ra loꞌo vino yiyá yóꞌo, ta saá ni̱ka̱ꞌa̱n ta̱Jesús: ―Ni̱xi̱no̱ chiño i̱ ―káchí ra. Ta saá na̱kuiko si̱ni̱ ra ta ni̱xiꞌi̱ ra.

Efesios 2:2

Saá ni̱xi̱yo ndó xi̱na̱ꞌá chi xi̱ndiko̱n ndó yichi̱ o̱n váꞌa ñii káchí xíꞌin inka̱ ni̱vi ñoyívi yóꞌo, ta chi̱kaa̱ so̱ꞌo ndó ña nda̱to̱ꞌon níma̱ ndiva̱ꞌa káꞌno xíꞌin ndó saá. Ta níma̱ ndiva̱ꞌa káꞌno yóꞌo kúu ña xáꞌnda chiño no̱o̱ ndiꞌi níma̱ ndiva̱ꞌa, ta saá tuku kúu ña níma̱ ña kísa chiño ini ni̱vi na toon ní ini, na o̱n vása xi̱in chikaa̱ so̱ꞌo ña káꞌa̱n Ndios.

Efesios 6:12

Saá chi ndixa o̱n si̱ví ni̱vi kuiti kúu na káni táꞌan xíꞌin yó, ta ndixa ña káni táꞌan xíꞌin yó kúu ña o̱n kúchiño koto yó xíꞌin nduchu̱ no̱o̱ yó, chi kúu ña kua̱ꞌa̱ ní ñaníma̱ ndiva̱ꞌa náꞌno ta kúu ña inka̱ no̱o̱ ndee̱ ndiva̱ꞌa. Ta ñaníma̱ ndiva̱ꞌa xíꞌin ndee̱ ndiva̱ꞌa yóꞌo kúu ña xáꞌnda chiño vitin no̱o̱ yichi̱ o̱n váꞌa ña naa ní ñoyívi yóꞌo. Ta kua̱ꞌa̱ ní ñaníma̱ ndiva̱ꞌa ña káni táꞌan xíꞌin yó kúu ña xíka no̱o̱ síkón ñoyívi yóꞌo.

Apocalipsis 16:1

Ta saá xi̱ni̱ so̱ꞌo i̱ to̱ꞌon ña ndeé ní ni̱ka̱ꞌa̱n. To̱ꞌon yóꞌo ki̱xi ini veꞌe ño̱ꞌo káꞌno ñoyívi ni̱no, ta ni̱ka̱ꞌa̱n ña xíꞌin u̱xa̱ naángel, káchí ña saá: ―Kua̱ꞌa̱n ndó ta nandiso ndee ndó no̱o̱ ñoyívi ñoꞌo̱ ña u̱xa̱ copa no̱o̱ ñóꞌo ña sáa̱ ini Ndios.

Apocalipsis 14:17

Ta saá ke̱ta inka̱ ñaángel no̱o̱ yóo Ndios ñoyívi ni̱no, ta níꞌi ña inka̱ ka̱a si̱i̱n, ña chikíꞌí no̱o̱. Tá káa ñii kiꞌi̱ káꞌno ní, saá káa ña.

Apocalipsis 14:15

Ta inka̱ ñaángel ke̱ta ña no̱o̱ yóo Ndios ñoyívi ni̱no. Ta xíꞌin ndiꞌi ndee̱ ña, ni̱ka̱ꞌa̱n ña xíꞌin ta̱ yóo no̱o̱ vi̱ko̱ yaa yóꞌo, káchí ña saá: ―Vitin xíꞌin ka̱a si̱i̱n níꞌi ún, kixáꞌá ún kaꞌnda ún ndiꞌi ña xa yóo tiꞌva nakaya ún, chi vitin xa ki̱xaa̱ ki̱vi̱ ña kixáꞌá ún nakaya ún ñayóꞌo no̱o̱ ñoꞌo̱ ―káchí ñaángel xíꞌin ra.

Apocalipsis 11:19

Ta saá na̱no̱na̱ yéꞌé veꞌe ño̱ꞌo káꞌno ña yóo ñoyívi ni̱no no̱o̱ yóo Ndios, ta xi̱ni i̱ ini veꞌe ño̱ꞌo yóꞌo nákaa̱ tón xa̱to̱n yi̱i̱. Tón yóꞌo káꞌa̱n xa̱ꞌa̱ ña chi̱ndúꞌu̱ Ndios ndixa kasa ndivi ra xa̱ꞌa̱ nañoo ra na kúu na ndíko̱n ñaꞌá. Ta saá xi̱ni i̱ kua̱ꞌa̱ ní náyeꞌe ta̱xa̱, ta xi̱ni̱ so̱ꞌo i̱ ña ndeé ní ndáꞌyi sa̱vi̱, ta ndeé ní síso̱, nda̱tán kua̱ꞌa̱ ní ni̱vi káꞌa̱n, saá kúu. Ta ndeé ní kóon ñíí, ta ndeé ní táan no̱o̱ ñoꞌo̱ ñoyívi.

Apocalipsis 11:15

Ta ñaángel ñau̱xa̱ ti̱vi ña tón trompeta, ta xi̱ni̱ so̱ꞌo i̱ to̱ꞌon ña káꞌa̱n kua̱ꞌa̱ ní na yóo ñoyívi ni̱no, ta xíꞌin ndiꞌi ndee̱ na káchí na, káꞌa̱n na saá: Vitin Jesucristo, ta̱a ta̱ ti̱ꞌví Ndios saka̱ku ni̱vi, ki̱xáꞌá ra xáꞌnda chiño ra xíꞌin Ndios no̱o̱ ñoyívi no̱o̱ ñoꞌo̱. Ta ndiꞌi saá ki̱vi̱ ña va̱xi kaꞌnda chiño ra no̱o̱ ndiꞌi ni̱vi xíꞌin ndiꞌi ña ki̱sa va̱ꞌa ra, káchí kua̱ꞌa̱ ní to̱ꞌon ña ki̱xi ñoyívi ni̱no ña xi̱ni̱ so̱ꞌo i̱.