תהלים 99 - Masoretic Text 1524

¹ יהוה מלך ירגזו עמים ישׁב כרובים תנוט הארץ׃

² יהוה בציון גדול ורם הוא על כל העמים׃

³ יודו שׁמך גדול ונורא קדושׁ הוא׃

⁴ ועז מלך משׁפט אהב אתה כוננת מישׁרים משׁפט וצדקה ביעקב אתה עשׂית׃

⁵ רוממו יהוה אלהינו והשׁתחוו להדם רגליו קדושׁ הוא׃

⁶ משׁה ואהרן בכהניו ושׁמואל בקראי שׁמו קראים אל יהוה והוא יענם׃

⁷ בעמוד ענן ידבר אליהם שׁמרו עדתיו וחק נתן׃

⁸ יהוה אלהינו אתה עניתם אל נשׂא היית להם ונקם על עלילותם׃

⁹ רוממו יהוה אלהינו והשׁתחוו להר קדשׁו כי קדושׁ יהוה אלהינו׃