תהלים 95 - Masoretic Text 1524

¹ לכו נרננה ליהוה נריעה לצור ישׁענו׃

² נקדמה פניו בתודה בזמרות נריע׃

³ כי אל גדול יהוה ומלך גדול על כל אלהים׃

⁴ אשׁר בידו מחקרי ארץ ותועפות הרים׃

⁵ אשׁר לו הים והוא עשׂהו ויבשׁת ידיו יצרו׃

⁶ באו נשׁתחוה ונכרעה נברכה לפני יהוה עשׂנו׃

⁷ כי הוא אלהינו ואנחנו עם מרעיתו וצאן ידו היום אם בקלו תשׁמעו׃

⁸ אל תקשׁו לבבכם כמריבה כיום מסה במדבר׃

⁹ אשׁר נסוני אבותיכם בחנוני גם ראו פעלי׃

¹⁰ ארבעים שׁנה אקוט בדור ואמר עם תעי לבב הם והם לא ידעו דרכי׃

¹¹ אשׁר נשׁבעתי באפי אם יבאון אל מנוחתי׃