תהלים 92 - Masoretic Text 15241 מזמור שׁיר ליום השׁבת׃ (92:2) טוב להדות ליהוה ולזמר לשׁמך עליון׃ 2 (92:3) להגיד בבקר חסדך ואמונתך בלילות׃ 3 (92:4) עלי עשׂור ועלי נבל עלי הגיון בכנור׃ 4 (92:5) כי שׂמחתני יהוה בפעלך במעשׂי ידיך ארנן׃ 5 (92:6) מה גדלו מעשׂיך יהוה מאד עמקו מחשׁבתיך׃ 6 (92:7) אישׁ בער לא ידע וכסיל לא יבין את זאת׃ 7 (92:8) בפרח רשׁעים כמו עשׂב ויציצו כל פעלי און להשׁמדם עדי עד׃ 8 (92:9) ואתה מרום לעלם יהוה׃ 9 (92:10) כי הנה איביך יהוה כי הנה איביך יאבדו יתפרדו כל פעלי און׃ 10 (92:11) ותרם כראים קרני בלתי בשׁמן רענן׃ 11 (92:12) ותבט עיני בשׁורי בקמים עלי מרעים תשׁמענה אזני׃ 12 (92:13) צדיק כתמר יפרח כארז בלבנון ישׂגה׃ 13 (92:14) שׁתולים בבית יהוה בחצרות אלהינו יפריחו׃ 14 (92:15) עוד ינובון בשׂיבה דשׁנים ורעננים יהיו׃ 15 (92:16) להגיד כי ישׁר יהוה צורי ולא עלתה׃ |