תהלים 81 - Masoretic Text 15241 למנצח על הגתית לאסף׃ (81:2) הרנינו לאלהים עוזנו הריעו לאלהי יעקב׃ 2 (81:3) שׂאו זמרה ותנו תף כנור נעים עם נבל׃ 3 (81:4) תקעו בחדשׁ שׁופר בכסה ליום חגנו׃ 4 (81:5) כי חק לישׂראל הוא משׁפט לאלהי יעקב׃ 5 (81:6) עדות ביהוסף שׂמו בצאתו על ארץ מצרים שׂפת לא ידעתי אשׁמע׃ 6 (81:7) הסירותי מסבל שׁכמו כפיו מדוד תעברנה׃ 7 (81:8) בצרה קראת ואחלצך אענך בסתר רעם אבחנך על מי מריבה סלה׃ 8 (81:9) שׁמע עמי ואעידה בך ישׂראל אם תשׁמע׃ 9 (81:10) לא יהיה בך אל זר ולא תשׁתחוה לאל נכר׃ 10 (81:11) אנכי יהוה אלהיך המעלך מארץ מצרים הרחב פיך ואמלאהו׃ 11 (81:12) ולא שׁמע עמי לקולי וישׂראל לא אבה׃ 12 (81:13) ואשׁלחהו בשׁרירות לבם ילכו במועצותיהם׃ 13 (81:14) לו עמי שׁמע לי ישׂראל בדרכי יהלכו׃ 14 (81:15) כמעט אויביהם אכניע ועל צריהם אשׁיב ידי׃ 15 (81:16) משׂנאי יהוה יכחשׁו לו ויהי עתם לעולם׃ 16 (81:17) ויאכילהו מחלב חטה ומצור דבשׁ אשׂביעך׃ |