תהלים 45 - Masoretic Text 15241 למנצח על שׁשׁנים לבני קרח משׂכיל שׁיר ידידת׃ (45:2) רחשׁ לבי דבר טוב אני מעשׂי אמר למלך לשׁוני עט סופר מהיר׃ 2 (45:3) יפיפית מבני אדם הוצק חן בשׂפתותיך על כן ברכך אלהים לעולם׃ 3 (45:4) חגור חרבך על ירך גבור הודך והדרך׃ 4 (45:5) והדרך צלח רכב על דבר אמת וענוה צדק ותורך נוראות ימינך׃ 5 (45:6) חציך שׁנונים עמים תחתיך יפלו בלב אויבי המלך׃ 6 (45:7) כסאך אלהים עולם ועד שׁבט מישׁר שׁבט מלכותך׃ 7 (45:8) אהבת צדק ותשׂנא רשׁע על כן משׁחך אלהים אלהיך שׁמן שׂשׂון מחבריך׃ 8 (45:9) מר ואהלות קציעות כל בגדתיך מן היכלי שׁן מני שׂמחוך׃ 9 (45:10) בנות מלכים ביקרותיך נצבה שׁגל לימינך בכתם אופיר׃ 10 (45:11) שׁמעי בת וראי והטי אזנך ושׁכחי עמך ובית אביך׃ 11 (45:12) ויתאו המלך יפיך כי הוא אדניך והשׁתחוי׃ 12 (45:13) ובת צר במנחה פניך יחלו עשׁירי עם׃ 13 (45:14) כל כבודה בת מלך פנימה ממשׁבצות זהב לבושׁה׃ 14 (45:15) לרקמות תובל למלך בתולות אחריה רעותיה מובאות׃ 15 (45:16) תובלנה בשׂמחת וגיל תבאינה בהיכל מלך׃ 16 (45:17) תחת אבתיך יהיו בניך תשׁיתמו לשׂרים בכל הארץ׃ 17 (45:18) אזכירה שׁמך בכל דר ודר על כן עמים יהודך לעלם ועד׃ |