תהלים 41 - Masoretic Text 1524

¹ למנצח מזמור לדוד׃ (41:2) אשׁרי משׂכיל אל דל ביום רעה ימלטהו יהוה׃

² (41:3) יהוה ישׁמרהו ויחיהו יאשׁר בארץ ואל תתנהו בנפשׁ איביו׃

³ (41:4) יהוה יסעדנו על ערשׂ דוי כל משׁכבו הפכת בחליו׃

⁴ (41:5) אני אמרתי יהוה חנני רפאה נפשׁי כי חטאתי׃

⁵ (41:6) אויבי יאמרו רע לי מתי ימות ואבד שׁמו׃

⁶ (41:7) ואם בא לראות שׁוא ידבר לבו יקבץ און לו יצא לחוץ ידבר׃

⁷ (41:8) יחד עלי יתלחשׁו כל שׂנאי עלי יחשׁבו רעה׃

⁸ (41:9) דבר בליעל יצוק בו ואשׁר שׁכב לא יוסיף לקום׃

⁹ (41:10) גם אישׁ שׁלומי אשׁר בטחתי בו אוכל לחמי הגדיל עלי עקב׃

¹⁰ (41:11) ואתה יהוה חנני והקימני ואשׁלמה להם׃

¹¹ (41:12) בזאת ידעתי כי חפצת בי כי לא יריע איבי עלי׃

¹² (41:13) ואני בתמי תמכת בי ותציבני לפניך לעולם׃

¹³ (41:14) ברוך יהוה אלהי ישׂראל מהעולם ועד העולם אמן ואמן׃