תהלים 38 - Masoretic Text 15241 מזמור לדוד להזכיר׃ (38:2) יהוה אל בקצפך תוכיחני ובחמתך תיסרני׃ 2 (38:3) כי חציך נחתו בי ותנחת עלי ידך׃ 3 (38:4) אין מתם בבשׂרי מפני זעמך אין שׁלום בעצמי מפני חטאתי׃ 4 (38:5) כי עונתי עברו ראשׁי כמשׂא כבד יכבדו ממני׃ 5 (38:6) הבאישׁו נמקו חבורתי מפני אולתי׃ 6 (38:7) נעויתי שׁחתי עד מאד כל היום קדר הלכתי׃ 7 (38:8) כי כסלי מלאו נקלה ואין מתם בבשׂרי׃ 8 (38:9) נפוגותי ונדכיתי עד מאד שׁאגתי מנהמת לבי׃ 9 (38:10) אדני נגדך כל תאותי ואנחתי ממך לא נסתרה׃ 10 (38:11) לבי סחרחר עזבני כחי ואור עיני גם הם אין אתי׃ 11 (38:12) אהבי ורעי מנגד נגעי יעמדו וקרובי מרחק עמדו׃ 12 (38:13) וינקשׁו מבקשׁי נפשׁי ודרשׁי רעתי דברו הוות ומרמות כל היום יהגו׃ 13 (38:14) ואני כחרשׁ לא אשׁמע וכאלם לא יפתח פיו׃ 14 (38:15) ואהי כאישׁ אשׁר לא שׁמע ואין בפיו תוכחות׃ 15 (38:16) כי לך יהוה הוחלתי אתה תענה אדני אלהי׃ 16 (38:17) כי אמרתי פן ישׂמחו לי במוט רגלי עלי הגדילו׃ 17 (38:18) כי אני לצלע נכון ומכאובי נגדי תמיד׃ 18 (38:19) כי עוני אגיד אדאג מחטאתי׃ 19 (38:20) ואיבי חיים עצמו ורבו שׂנאי שׁקר׃ 20 (38:21) ומשׁלמי רעה תחת טובה ישׂטנוני תחת רדופי טוב׃ 21 (38:22) אל תעזבני יהוה אלהי אל תרחק ממני׃ 22 (38:23) חושׁה לעזרתי אדני תשׁועתי׃ |