תהלים 29 - Masoretic Text 1524

¹ מזמור לדוד הבו ליהוה בני אלים הבו ליהוה כבוד ועז׃

² הבו ליהוה כבוד שׁמו השׁתחוו ליהוה בהדרת קדשׁ׃

³ קול יהוה על המים אל הכבוד הרעים יהוה על מים רבים׃

⁴ קול יהוה בכח קול יהוה בהדר׃

⁵ קול יהוה שׁבר ארזים וישׁבר יהוה את ארזי הלבנון׃

⁶ וירקידם כמו עגל לבנון ושׂרין כמו בן ראמים׃

⁷ קול יהוה חצב להבות אשׁ׃

⁸ קול יהוה יחיל מדבר יחיל יהוה מדבר קדשׁ׃

⁹ קול יהוה יחולל אילות ויחשׂף יערות ובהיכלו כלו אמר כבוד׃

¹⁰ יהוה למבול ישׁב וישׁב יהוה מלך לעולם׃

¹¹ יהוה עז לעמו יתן יהוה יברך את עמו בשׁלום׃