תהלים 137 - Masoretic Text 1524

¹ על נהרות בבל שׁם ישׁבנו גם בכינו בזכרנו את ציון׃

² על ערבים בתוכה תלינו כנרותינו׃

³ כי שׁם שׁאלונו שׁובינו דברי שׁיר ותוללינו שׂמחה שׁירו לנו משׁיר ציון׃

⁴ איך נשׁיר את שׁיר יהוה על אדמת נכר׃

⁵ אם אשׁכחך ירושׁלם תשׁכח ימיני׃

⁶ תדבק לשׁוני לחכי אם לא אזכרכי אם לא אעלה את ירושׁלם על ראשׁ שׂמחתי׃

⁷ זכר יהוה לבני אדום את יום ירושׁלם האמרים ערו ערו עד היסוד׃

⁸ בת בבל השׁדודה אשׁרי שׁישׁלם לך את גמולך שׁגמלת׃

⁹ אשׁרי שׁיאחז ונפץ את עלליך אל הסלע׃