תהלים 101 - Masoretic Text 1524

¹ לדוד מזמור חסד ומשׁפט אשׁירה לך יהוה אזמרה׃

² אשׂכילה בדרך תמים מתי תבוא אלי אתהלך בתם לבבי בקרב ביתי׃

³ לא אשׁית לנגד עיני דבר בליעל עשׂה סטים שׂנאתי לא ידבק׃

⁴ לבב עקשׁ יסור ממני רע לא אדע׃

⁵ מלושׁני בסתר רעהו אותו אצמית גבה עינים ורחב לבב אתו לא אוכל׃

⁶ עיני בנאמני ארץ לשׁבת עמדי הלך בדרך תמים הוא ישׁרתני׃

⁷ לא ישׁב בקרב ביתי עשׂה רמיה דבר שׁקרים לא יכון לנגד עיני׃

⁸ לבקרים אצמית כל רשׁעי ארץ להכרית מעיר יהוה כל פעלי און׃