Números 2:3

Ñanderuete Ñe’ẽ Porã 2015

Ko’ã mbohapy tríbu opytáta kuarahyresẽ gotýo: Juda tríbu oñembyaty isoldádo aty reheve ipoyvi oĩháme; Naason, Aminadab ra’y, opyta itríbu ruvicha ramo.

Referencias Cruzadas

Genesis 35:22

Ha ojehu ningo Israel (Jacóbo) oiko aja pe tetãme, Ruben oñeno itúva kuña Bílha ndive; ha pe mba’e ojekaauka Israélpe. Israel ra’ykuéra ningo 12.

Genesis 35:23

Ko’ãva Léa memby: Ruben, Jacóbo ra’y ypykue, Simeon, Levi, Juda, Isacar ha Zabulon.

1 Crónicas 2:10

Ram ra’y, Aminadab; ha Aminadab ra’y, Naason, kóva ningo mburuvicha Juda ra’ykuéra apytépe.

1 Crónicas 5:2

Juda katu ou oñembohetave ityke’yrakuéra apytépe, ha oiko imburuvicha ramo ijapytepekuéra; Josépe katu oñeme’ẽ pe ta’ýra ypykue derécho.

Éxodo 6:23

Ha Aaron oñemohembireko Elisabet, Aminadab rajy, Nahson reindy rehe; ha ko’ãva imemby; Nadab, Abiu, Eleazar ha Itamar.

Números 1:5

Ko’ãvahína umi kuimba’e réra, Ruben tríbugui oĩta penendive, Elisur, Sedeur ra’y;

Números 1:7

Judatríbugui, Naason, Aminadab ra’y;

Números 10:5

Ha oñembopu hatã ha pya’e ramo oñemongu’e raẽva’erã umi aty oĩva kuarahyresẽ gotýo.

Números 2:4

Isoldádo atýpe ojepapa 74.600 kuimba’e.

Números 3:38

Pe óga jojohuha renondépe, kuarahyresẽ gotýo, oñemohendáta Moises ha Aaron ita’yrakuéra ndive, oñangareko hag̃ua pe tenda oñemboykéva rehe pende Ruetépe g̃uarã, Israel ñemoñarenguéra rekovia; ha hesegua’ỹva oñemboja ramo hóga jojohuha rembiapópe omanova’erã.

Números 7:12

Upéicharamo pe ára peteĩháme Naason, Aminadab ra’y, Juda tríbu ruvicha oikuave’ẽ.

Números 7:17

ha mokõi tóro, 5 ovecha mácho, 5 kavara mácho ha 5 ovechara’y oguerekóva peteĩ áño, kuave’ẽmby py’aguapy reheguáva. Ko’ãva Naason, Aminadab ra’y, jopói.

Matéo 1:4

Arámgui heñói Aminadab; Aminadábgui Naason; ha Naasóngui Salmon.

Rut 4:20

Aminadab ra’yre Naason, Naason ra’yre Salmon,