Jeremías 26:2

Ñanderuete Ñe’ẽ Porã 2015

Péicha he’i pende Ruete: Eñembo’y che rogaguasu korapýpe, ha eñe’ẽ opaite Juda tavayguakuérape oúva guive chemomba’eguasu hag̃ua ha ere ichupekuéra, opaite ñe’ẽ Che ha’éva ndéve ha anítei hemby peteĩ ñe’ẽ nde erese’ỹva.

Referencias Cruzadas

Jeremías 1:17

Ndékena, ejeku’a jokua ha eñembosako’i, epu’ã ha ere ichupekuéra opaite mba’e Che ha’étava guive ndéve. Ani rekyhyje ichuguikuéra, ỹrõ Che roipy’apy asýta henondepekuéra.

Jeremías 1:7

Ha Ñanderuete he’i chéve: Ani erétei, che mitãitereiha, rehóta mamo rojokuaihápe, ha eréta opaite mba’e Che ha’éva guive ndéve.

Jeremías 19:14

Ha Jeremías oho jevy Tofétgui, Ñanderuete omondo haguépe ichupe omomarandu hag̃ua, ha ou oñembo’y Ñanderuete rogaguasu korapýpe ha he’i mayma hetãyguakuérape,

Jeremías 23:28

Pe proféta ohecháva iképe, tomombe’u ike peguare ramo; ha che ñe’ẽ ame’ẽva’ekue, tomyasãi hekoitépe che ñe’ẽ ramo. Pe trígo ra’ỹi piko ojogua pe kapi’i pirúpe, he’i pende Ruete.

Jeremías 25:2

Jeremías ombohasa mayma Juda ha Jerusalenguápe ko ñe’ẽ kóva, he’ívo:

Jeremías 28:5

Upéramo proféta Jeremías he’i pe proféta Hananíaspe, umi pa’i ha maymaite tetãygua renondépe oĩva guive Ñanderuete rogaguasúpe.

Jeremías 36:10

Upérõ Baruc oho Ñanderuete rogaguasúpe ha oike pe haihára Gemarías kotýpe, itúva réra Safan, ha pe koty opyta pe korapy yvateoguápe, Ñanderuete róga rokẽ pyahu ypýpe.

Jeremías 42:4

Ha Jeremías he’i ichupekuéra: Iporã ningo. Che añembo’éta Ñanderuete, Ñandejárape, peje haguéicha, ha opaite mba’e Ñanderuete he’iukáva guive peẽme, che nañomimo’ãi mba’evete pendehegui.

Jeremías 7:2

Eñembo’y pende Ruete rogaguasu rokẽme, ha emyasãi upépe ko ñe’ẽ kóva, ha péicha eréta: Pehendúke pende Ruete ñe’ẽ, Judayguáva guive, ha peikéva guive ko okẽ rupi peñemomirĩ pejeitývo pende Ruete renondépe.

Jeremías 7:27

Ha nde, Jeremías, erepaitéta ichupekuéra ko’ã ñe’ẽ ko’ãva, naneñe’ẽrendumo’ãi ramojepe, ha nopenamo’ãi ramojepe nderehe eavisa porã katu ichupekuéra.

Ezequiel 3:10

Ha Ñanderuete he’ive chéve: Kuimba’e ra’y, emoĩ nde py’apýpe opaite mba’e Che ha’étava guive ndéve, ha nde apysakuéra tacherendu porã.

Ezequiel 33:7

Kuimba’e ra’y, Che romoĩma Israel ñangarekohára (guárdia) ramo ha opaichagua ñe’ẽ rehendúva guive che jurúgui embohasa ichupekuéra.

Ezequiel 40:4

Ha ha’e oñe’ẽ chéve, ha he’i: Kuimba’e ra’y, ema’ẽ porã nde resa rupi, ha ejapysaka porã nde apysa rupi, ha eñongatu nde py’apýpe opaite mba’e ahechaukátava guive ndéve, upévagui rejegueru ko’ápe, ahechauka hag̃ua ndéve umi mba’e; nde rembohasa hag̃ua ne retãyguakuérape, opaite mba’e ojehechaukáva guive ndéve.

Matéo 28:20

Ha pembo’e ichupekuéra ojapo hag̃ua opaite mba’e Che ha’eva’ekue peẽme pejapo hag̃ua. Ha peikuaa porãke, Che aĩha penendive opaite ára opa peve ko ára atyguasu (ko múndo).

Lúcas 19:47

Hesu oporombo’e opaite ára Ñanderuete rogaguasúpe. Pa’i ruvichakuéra, kuatia haihára ha umi karai anciáno katu oñeha’ã ojuka hag̃ua ichupe.

Juan 18:20

Hesu ombohovái ichupe: Che ningo aporombo’e’aína opavave rovake Ñanderuete rogakuéra Israel retãme ha Ñanderuete rogaguasúpe oĩva Jerusalénpe ha mba’eve nambo’éi ñemiháme.

Juan 8:2

Ko’ẽjúvo Ha’e ou jevy Ñanderuete rogaguasúpe ha Israelguakuéra oñembyaty hendápe, ha Hesu oguapy ohekombo’e hag̃ua ichupekuéra.

Apostolkuéra 20:20

Opaichagua mba’eporã peikotevẽva amombe’upa peẽme taha’e pende atyguasúpe térã pende rógape.

Apostolkuéra 20:27

Che ningo amombe’u peẽme opaite Ñanderuete rembipota añomi’ỹre mba’eve.

Apostolkuéra 5:25

Upevove peteĩ kuimba’e ou hendápe ha he’i ichupekuéra: Umi kuimba’e peẽ pemoingeva’ekue cárcelpe oĩ jevýma Ñanderuete rogaguasúpe, oñembo’y ha oporombo’e jevymahína.

Apostolkuéra 5:42

Ha opaite árape oporombo’e ha omombe’u hikuái Hesu Crísto evangélio Ñanderuete rogaguasúpe ha hetãyguakuéra róga rupi avei.

Deuteronómio 12:32

Peñangarekóke pejapo hag̃ua hekoitépe opaite mba’e Ñanderuete he’imava’ekue guive peẽme; napemoĩveiva’erã ni ndapeipe’aveiva’erã mba’eve iñe’ẽgui.

Deuteronómio 12:5

Pe yvy pehẽngue Jahve, pende Ruete, oiporavóma oñemomba’eguasu hag̃ua héra porãite, upépente peẽ pehóta pemomba’eguasu hag̃ua ichupe.

Deuteronómio 4:2

Anítei pembojoajuve térã peipe’a mba’eve che ha’éva guive peẽme, pejapopa uvei hekoitépe Ñanderuete rembiapoukapy che ha’e hagueichaite peẽme.

Josué 8:35

Upéicha Josue omoñe’ẽ opaite ko’ã tembiapoukapy Moises ohaiva’ekue, mokõi Israel atyguasúpe, opaite kuimba’e, kuña, mitã ha tetã ambueyguáva renondépe.

Apocalípsis 22:19

ha oimeraẽ oipe’áva ñe’ẽ ko kuatiañe’ẽgui Ñanderuete oipe’áta avei héra pe tekovete kuatiañe’ẽgui ha pe távagui oñemboykéva Ñanderuetépe g̃uarã, ojehai háicha ko kuatiañe’ẽ kóvape.