Apocalípsis 1:6

Ñanderuete Ñe’ẽ Porã 2015

Ha’e ojapo ñandehegui mburuvichakuéra ha pa’ikuéra ñamba’apo hag̃ua Ñandejára Ñanderuetépe g̃uarã. Ñemomba’eguasu ha pu’aka topyta ichupe g̃uarãnte ára atyguasukuéra guive umi ára atyguasurã meve, taupéicha (amen).

Referencias Cruzadas

Éxodo 19:6

Ha peẽ peikóta chéve g̃uarã tetãguasu pa’i reheguáva, heko potĩva ha oñemboykéva chéve g̃uarã. Ko’ã ñe’ẽ eréta Israel ñemoñarenguérape.

Isaías 61:6

Ha peẽ peñembohérata Ñanderuete pa’ikuéra, ha pende rérata Ñanderuete rembiguaikuéra, oñeme’ẽta peẽme ambue tetãnguéra mba’erepy ha peñembojeguakáta imba’ekuerakuére.

Daniel 4:34

Ha ohasapávo umi áño, che, Nabucodonosor, ajesaupi yvága rehe, ha che akã porã jevýma, upéi agradece pe Ijyvatetévape, amomba’eguasu ha amboete pe tapia Oikovévape, ha ipu’akapa ndaijapýrai, ha hetãguasu ndopamo’ãi araka’eve.

Daniel 7:14

Ha oñeme’ẽ ichupe pu’aka, teko jajaipa, tetãguasu, opaite tetãnguéra, tribukuéra ha opaichagua ñe’ẽ oiko hag̃ua ipoguýpe, hembiguaikuéra ramo, ipu’aka opyta hag̃ua tapiaite g̃uarã, ndohasaiva’erã, ha hetãguasuete noñehundiriva’erã araka’eve.

Matéo 6:13

Ha ani reheja rojepy’ara’ã, orepe’a uvei mba’evaígui (añágui).

Juan 5:23

Opavave omomba’e hag̃ua pe Ta’ýrape, oñemomba’e háicha Ñanderuetépe. Upe omomba’e’ỹva Ta’ýrape, nomomba’éi avei Ñanderuetépe, Ha’e voi ombou Ita’ýrape ko yvy ape ári.

Romayguakuérape 11:36

Opaite mba’e oĩva guive ou voi ichugui, ojejapo Ha’érupi ha oiko ichupe g̃uarã, upévare toñemomba’eguasu Ñanderuetépe opaite ára atyguasukuéra pukukue.

Romayguakuérape 15:6

Oñondive pemomba’eguasu peteĩ py’ápe ha peteĩ jurúpe Ñandejárape ha Hesu Crísto Rúpe.

Filipoyguakuérape 2:11

Ha opaite juru he’iva’erã Hesu Crísto ha’eha Ñandejára ha upéicha omomba’eguasu hikuái Ñanderuetépe, pe Túva Añeteguávape.

1 Timotéope 6:16

Ha’eñoite oguereko pe tekove tapia g̃uarãva, Ha’e oikóva tesape ojeike’ỹháme: Ndaipóri yvyarigua apytépe ohecháva ichupe ha ndaikatúi voi ohecha ichupe; toñemomba’eguasu ha toñembotuicha ichupe tapia g̃uarã, taupéicha (amen).

hebreoyguakuerape 13:21

Hesu Crísto tapenembokatupyry opaite tembiapo porãme, pejapóvo hembipota, ha Ha’e toiporu ore rekove Ha’e oipota háicha. Toñemomba’eguasu Ñanderuetépe ára atyguasukuéra guive ára atyguasukuerarã meve, amen.

1 Pédro 4:11

Oimérõ peteĩ ojeroviáva oñe’ẽ, toñe’ẽ Ñanderuete oñe’ẽrõ guáicha ha’érupi; oimérõ peteĩ ojeroviáva oporopytyvõ, toipytyvõ hapichápe Ñanderuete pu’aka rupi; opaite me’ẽmby rupi toñemomba’eguasúnte Ñanderuetépe, Hesu Crísto rupi. Imba’e ningo pe teko jajaipa ha pu’aka, ára atyguasukuéra rupi, taupéicha (amen).

1 Pédro 5:11

Ichupe g̃uarã oñeme’ẽma pu’aka ára atyguasukuérape g̃uarã, amen.

2 Pédro 3:18

Peikuaa porãve pehóvo uvei Ñandejára ha ñande Salvador Hesu Crístope ha pekakuaa pehóvo imborayhúpe. Toñemomba’eguasu ichupe ko’ág̃a ha pe ára atyguasurãme, taupéicha (amen).

Júdas 1:25

upévare ñamomba’eguasu ichupe, Ha’e ome’ẽ haguére ñanderehehápe ita’ýra Hesu Crísto, Ñandejárape, Ha’émante pe mburuvichaguasuetevéva, pe imbaretevéva, pe ipu’akapáva; Ha’e oikomava’ekue opaite ára atyguasukuéra ohasamava’ekuépe, Ha’e oikohína ko’ag̃aguápe ha Ha’e oikova’erãva opaite ára atyguasu oútavape, upévare ñamomba’eguasu ichupe, taupéicha (amen).

Apocalípsis 1:9

Che, Juan, che avei pene hermáno ha pene irũ umi jepy’ara’ã jahasáva Hesu Crísto ha hetãguasu rehehápe. Ko’ág̃a che aĩ préso pe ypaũ (ísla) Pátmospe, yguasu pa’ũme, ajeroviágui Hesu Crístore ha amyasãi haguére Hesu Crísto evangélio.

Apocalípsis 20:6

Ovy’aite ha heko potĩma upe oñemoingove jevýva ko ñemoingove tenonderãguápe, pe ñemano mokõiha ningo ndaipu’akái hesekuéra, oikova’erã uvei Ñanderuete ha Hesu Crísto ndive pa’ikuéra ramo, ha oisãmbyhýta hendive 1.000 áño pukukue.

Apocalípsis 4:11

Ore Jára ha ore Ruete, ndéve añoite ija opaite ñemboete, ñembotuicha ha ñemomba’eguasu, Nde remoingo haguére opaite mba’e, ha ne rembipota rupi oikopaitégui, ha nde pu’aka rupi oñemoingopa haguére.

Apocalípsis 5:10

Ha rejapo orehegui ore Ruetépe g̃uarã mburuvicha ha pa’ikuéra, ore roisãmbyhy hag̃ua avei hendive ko yvy ári.