1 Samuel 17:47

Ñanderuete Ñe’ẽ Porã 2015

Ha péicha avei ko’ã tetãygua aty toikuaa avei ore Ruete noikotevẽiha kyse puku rehe, térã yvyra puku akua rehe; ore Ruete ningo ñorãirõ Jára voi ha Ha’e penemoĩta ore pópe.

Referencias Cruzadas

2 Réyes 5:15

Upéi oho jevy Eliséo rendápe, ha’e iñirũnguéra ndive, ha oñemoĩ henondépe ha he’i: Péina ápe ko’ág̃a aikuaáma ndaiporiha ambue Jára ko yvy apére, Israel Jára añónte oĩ. Ajerure ndéve rejapyhy hag̃ua jopoimi ne rembiguáigui.

2 Crónicas 14:11

Ha Asa ojerure asy Ñanderuete, Ijárape, ha he’i: Che Ruete, ndéve g̃uarã ndaipóri ikatu’ỹva, reme’ẽkuaa ñepytyvõ ipu’akapáva térã ipu’aka’ỹvape g̃uarã. Orepytyvõmína, ore Ruete, ore Jaratee, nderehe ningo rojerovia ha nde rérape roju ko soldádo atýpe. Nde ningo ore Ruete, ore Jára, aníke yvyariguakuéra ipu’aka nderehe.

Salmokuéra 46:11

Ñanderuete, yvága atykuéra Jára, oĩ ñanendive, Jacóbo Jára ningo ñane mo’ãhára. Selah

Isaías 9:7

Hetã pu’aka ituichaiterei ha ipy’aguapy ndaijapyramo’ãi, Ha’e oguapýta David guapyhaguasu ári ha Ha’e oisãmbyhýta hetãme, oguenohẽvo oimeraẽvape tape porãme ha ombojovakéta hekoitépe, upe ára upéva guive opaite ára peve g̃uarã, yvága atykuéra Jára, ojapopáta ko’ã mba’e.

Oséas 1:7

Judayguakuérape katu aiporiahuverekovéta, che réra rehehápe aguenohẽgui ichupekuéra ijejopy vaígui Che ha’égui Ijára, naipytyvõséi katu ichupekuéra guyrapa, kyse puku, ñorãirõhára, kavajukuéra térã kavaju arigua rupi.

Zacarías 4:6

Upéramo ha’e oñe’ẽ chéve ha he’i: Kóva ningo Ñanderuete ñe’ẽ Zorobabélpe g̃uarã: Ndaha’éi soldádo aty rupi, ni yvyarigua pu’aka rupi, che Pytu Porãite rupínte katu ojehupahína, he’i ángel atykuéra Jára.

Romayguakuérape 8:31

Mba’épa ja’éta upéicharamo ko’ã mba’e ko’ãva rehe. Ñanderuete oĩ ramo ñanendive, máva piko ikatu oñemoĩ ñanderehe.

Romayguakuérape 8:37

Opaite ko’ã mba’evai ñande jagueropu’akapa Hesu Crísto rupi, ñanderayhúgui.

Josué 10:8

Ha Ñanderuete he’i Josuépe: Ani rekyhyjétei ichuguikuéra, Che amoĩma ichupekuéra nde pópe, ha’ekuéra ndaipu’akamo’ãi nderehe.

1 Samuel 14:6

Ha Jonatan he’i hembiguáipe: Eju jaha ko’ã kuimba’e ipire’i oñekytĩ’ỹva rendápe, ikatu Ñanderuete ojapo ñanderehehápe oimeraẽ mba’e, ndahasyiete ichupe g̃uarã oporopytyvõ heta térã mbovy (kuimba’e) rupi.

1 Samuel 18:17

Upémaramo Saul he’i Davídpe: Péina ápe che ame’ẽta ndéve Merab, che rajy tuichavéva ne rembirekorã, aipotánte reiko chéve soldádo ipy’aguasúva ramo, ha eñorãirõ Ñanderuete rehehápe, Saul katu he’i ipy’apýpe: Che po rupi ndojehumo’ãi mba’eve ichupe, Filisteayguakuéra po rupi katuete ha’e omanóta.