149 Versículos Bíblicos para pedir Fortaleza en la Prueba

Opaite mba’e ikatu chéve g̃uarã, Ha’e chemombaretégui.

Ani rekyhyje, Che voi aĩgui nendive, aníke nde py’akangy, che ha’égui nde Jára, nemombaretéva, tapiaite roipytyvõta, ha añangarekóta nderehe che pu’aka rupive.

Ñanderuete ñanemo’ã ha ñanemombaretéta jajejopy vai jave,

Ha’e omombarete ikane’õvape ha omokyre’ỹ avei ikangypávape. Ha oĩ peteĩ oñe’ẽ hatãva desiértope ha he’i peẽme: Pembosako’i peteĩ tape Ñanderuetépe g̃uarã ha pembojojáke pe tape Ñanderuetépe g̃uarã desiértope. Umi mitã ikane’õ, umi mitãrusu ikangypa ha ho’apávape. Umi ojeroviáva Ñanderuete rehe katu oñemombarete jevýta, oveve yvateva’erã ku ñapykanícha, oñaniva’erã hikuái ha ndaijuku’amo’ãi, ha oguata pukuva’erã hikuái ha naikane’õmo’ãi.

Aguata ramojepe ka’aguy iñypytũha rupi ndakyhyjemo’ãi mba’eveichagua mba’evaígui, Nde repytágui chendive ha nde yvyra po’i ha nde yvyra puku chemoangapyhy.

Ñanderuete nome’ẽi ñandéve peteĩ Pytu Porãva ñanemokangýva, ome’ẽ uvei ñandéve peteĩ Pytu Porãva ipu’akáva, oporohayhúva ha iñarandúva.

Ñanderuete ningo che rekove resape ha che salvador, mávagui piko akyhyjéta. Ñanderuete che rekove mombaretehára, mávagui piko añemondýita.

Ajesaupíta umi cérro rehe, upégui oúta chepytyvõtava. Ñanderuete ningo chepytyvõta, Ha’e ningo yvagakuéra ha yvy apohare.

Ema’ẽ porãke, Che ha’éma ndéve eñeha’ãmba ha eñembopy’aguasu; ani rekyhyjétei ha ani ndepy’akangýtei, pende Ruete, pende Jára, oĩta nendive mamo rehoha rupi.

Ñanderuete voi ningo chemombaretéva ha Ha’e oñangareko porã cherehe, che py’apýpe ajerovia hese, upévagui ahupity iñepytyvõ, ha vy’apópe che ñe’ã opurahéi, omomba’eguasu hag̃ua ichupe.

Umi jepy’ara’ã pehupitýva ndaipohyietereíri, yvy arigua reheguánte, Ñanderuete ndohejamo’ãi ipohyieterei pegueropu’aka’ỹ hag̃uáicha, hendivénte voi oĩ pe pohã pegueropu’aka hag̃ua ha Ha’e ome’ẽta peteĩ tape peropu’akapa hag̃ua.

Peñeha’ã ha peñemombaretéke; ani pekyhyjétei, ha ani peñemondýi ichuguikuéra, Ñanderuete, Ñandejára, ohóta penendive; Ha’e ndopoimo’ãi pendehegui ha napenemotyre’ỹmo’ãi.

upévare ñag̃uahẽ jeroviapópe iguapyhaguasúpe, jahupity hag̃ua iporiahuvereko ha jajohu hag̃ua ipy’aporã, Ha’e ñanepytyvõ hag̃ua ñaikotevẽha árape.

Ñanderuete, Nde ningo che itaguasu (ajesalva hag̃ua) ha che róga yvate oñemombaretepyréva ha che pytyvõharaite; Nde, che pytu’u rendaitéva, nderehe ajerovia tapiaite; che mo’ãhára, Nde reñangareko porã cherehe, Nde reĩ chendive chesalva hag̃ua.

Hesu Crísto ndopoimo’ãi iñe’ẽ ome’ẽva’ekuégui, Ha’e voi penemombarete ha oñangarekohína penderehe mba’epochýgui.

Mba’épa ja’éta upéicharamo ko’ã mba’e ko’ãva rehe. Ñanderuete oĩ ramo ñanendive, máva piko ikatu oñemoĩ ñanderehe.

Ejeroviáke nde py’aite guive Ñanderuete rehe, ha ani rejejoko ne arandu rehe. Nemandu’áke hese opaite nde rape rehe, ha Ha’e omyesakãta ne raperã.

Umi hekopotĩva ojerure asy ramo Ñanderuetépe, katuete Ha’e ohendúta ichupekuéra ha oguenohẽta ijehasa asýgui. Ñanderuete hi’ag̃ui umi ohasa asývagui, ha oipytyvõ umi oñembyasývape ojapo vai haguére.

Ko’ã mba’e ko’ãva Che ha’éma peẽme, peẽ pendepy’aguapy hag̃ua chepype. Peẽ ningo pehasa asyva’erã ko yvy ape ári, pejerovia katu ko múndo kóva oĩmaha che poguýpe.

Eity umi mba’e ipohýiva ha ndejopýva Ñanderuete ári, Ha’e oñangarekóta nderehe, Ha’e ndohejamo’ãi heko potĩva oñehundi.

Rehasa ramojepe hi’y hetaite rupi, Che aĩta nendive, ha ysyry ndetuicháva nderupity ramojepe nanembojahogamo’ãi. Rehasa ramojepe tata mbyte rupi, nderekaimo’ãi, ha pe tata rendy nanderapymo’ãi.

Opaite pende jepy’apykuéra peity hi’ári, Ha’e ningo oñangarekohína penderehe.

Peju che rendápe opaite peẽ peñeha’ãmbáva pehupity hag̃ua pe tekove tapia g̃uarãva, ha ani peẽ voi peñeha’ã reive pepoi hag̃ua pene angaipa cárga pendejopývagui. Chémante ikatu pomombytu’u porã. Peñemoĩ che cangálla guýpe (yúgo guýpe) ha peheja Che tapohekombo’e porã, chepy’a porãgui ha che añemomirĩgui, péichamante pejohúta pe pytu’u añeteguáva pene ángape g̃uarã. Ndépa ha’ehína pe Crísto ouva’erãva térãpa roha’ãrõta gueteri ambuépe. Che cangálla ningo hu’ũ asy ha ivevúi pe cárga aguerahaukáva peẽme.

Upe oikóva pe Jára Ijyvatetéva ãme ha pe Ipu’akapáva poguýpe, Ndéve ndojehumo’ãi mba’evaietéva, ha mba’asy iñasãiva ndojamo’ãi nde róga rehe. Ñanderuete he’íta hi’angelkuérape oñangareko hag̃ua opaite nde raperã rehe. Hi’angelkuéra ndererahava’erã ipopekuéra ani hag̃ua ita rehe reñepysãnga. Nde rehasa ramo jepe leõ ha mbói ári, nde rehundipáta ichupekuéra. Ñanderuete voi ningo he’i: Ha’e ojejoko hatãgui cherehe, Che aguenohẽta ichupe ijejopy vaígui, ha Che añangarekóta hese ha’e oikuaágui che réra. Ha’e ohenói ramo che réra Che ambohováita ichupe, Che aĩta hendive ijepy’apyha árape, aguenohẽ hag̃ua ichupe ijejopy vaígui ha upéi Che ambotuicháta ichupe. Ambopukúta hekove, ha ahechaukáta ichupe che pu’aka (ha ha’e oikóta chendive tapia guarã). he’ikuaa Ñanderuetépe: Nde, che Ruete, ne rendápe akañykuaa ha Nde che mo’ãha, Nde, che Ruete, nderehe ajerovia.

Ha’émante che itaguasu ha che pytyvõharaguasu. Ha’e che mo’ãhára, ndachepysyrymo’ãi. Ñanderuete rupivénte ahupity ñepytyvõ porã ha che rerakuã porã, Ñanderueténte che itaguasu ha che mo’ãhára. Opaite árape pejerovia hese, peẽ che retãyguakuéra, henondépe peguenohẽ pende py’apýpe oĩva guive, Ñanderuete ningo ñane mo’ãhára. Selah

Che ajepy’apy heta ramo jepe añandu Nde chemoangapyhy ha Nde rembovy’a jevy che ánga.

Ñanderuete chemombarete ha chembopurahéi, chesalvaháre. Kóva voi ningo che Jára, ha che rukuéra Jára, che amomba’eguasu ha ambotuichaite ichupe.

Oñembyai ramojepe che ro’o ha che py’a, Nde, che Ruete repytava’erã che mba’erepyetéva.

Ñanderuete oipytyvõ heko potĩvape, ha Ha’e oñangarekóta hesekuéra ojejopy vai jave.

Che ahasa asy jave che rohenói ha Nde chemokyre’ỹ jevy ha remombarete che ánga.

Peikuaa porãke, Ñanderuete, che Jára chesalvataha; ajerovia hese ha ndakyhyjemo’ãi; Ha’e chemombarete, upévare apurahéita ichupe g̃uarã, Ha’e chesalvágui.

Ha ndaupévai año, javy’a katu jahasa asy ramojepe, jaikuaa porãgui pe jehasa asy hi’aha paciéncia, ha pe paciéncia ñanemokyre’ỹ jagueropu’akapa hag̃ua, ha jagueropu’akapa rire pe jepy’ara’ã, okakuaave ohóvo ñane esperánza, ha pe esperánza Ñanderuete rehe nombotavymo’ãi avavépe, Ñanderuete mborayhu omyhenyhẽgui ñande py’apy imborayhúgui, ha opaite ko’ã mba’e oñeme’ẽ ñandéve Pytu Porãmbáva rupi.

Añembyasyete ningo, eñangarekomína cherehe ne ñe’ẽ he’i háicha.

Nde, embopy’aguapy ichupekuéra ha py’aguapy porã rupi ha’ekuéra ojeroviáta nderehe. Pejerovia Ñanderuete rehe opaite árape, Ñanderuete, pe Jaraitéva ndivénte jajohu ñemo’ãha ijapyra’ỹva.

Upéi Nehemías he’ive ichupekuéra: Tapeho ha pe’u tembi’u ikyráva, ha pe’u víno he’ẽva, ha peguerahauka avei tembi’u umi mba’eve nombosako’iriva’ekuépe; ko ára kóvape oñemboykémagui Ñandejárape g̃uarã; ani peñembyasýtei, Ñanderuete vy’a tapenemyenyhẽ uvei pende py’apy.

Peñemokyre’ỹke Ñanderuete pu’akaguasu rupi, peẽ penembarete hag̃ua.

Pe esperánza Ñanderuete ome’ẽva tomyenyhẽ pende jerovia, vy’águi ha py’aguapýgui, ha pende esperánza tokakuaave ohóvo Pytu Porãmbáva pu’aka rupi.

Ore Ruete, oreporiahuvereko, nderehe rojerovia; Nde voi ningo ore jyva mbarete meme pyhareve, upévare oreguenohẽ ore jepy’apy vaígui og̃uahẽ vove.

Cheporiahuverekomína, Nde, che Ruete, eiporiahuverekomína, che ánga ojeroviágui nderehe ha añemo’ãta nde pepo guýpe ohasapa peve che jepy’apy vai.

Pekyhyjéke Ñanderuetégui, hogaguasúgui. Israel Jára ome’ẽ pu’aka ha mbarete hetãme, upévare pemomba’eguasu ichupe.

Chéverõ g̃uarã umi jehasa asy ko’ag̃agua jahasavañaína, ndaha’éi mba’eve, ñambojoja ramo pe teko jajaipáva rehe ojehechaukava’erã ñande rekoverãme.

Ore roha’ãrõ Ñanderuete omoñepyrũva’ekue pe tembiapo iporãva pendepype, Ha’e voi penemog̃uahẽtaha hu’ãme, Hesu Crísto ou jevyha árape.

Og̃uahẽ ramo pe ára che akyhyjeha, nderehe katu ajerovia. Ñanderuete ñepytyvõ amombe’úta, iñe’ẽ oikóta katuete, Ñanderuete rehe ajerovia ha ndakyhyjemo’ãi. Mba’épa yvyarigua ikatúne ojapo cherehe.

Py’aguapypópe aha’ãrõ Ñanderuetépe, ha Ha’e oñemboja cherehe ha ohendu che mba’ejerure asy. Nañomíri nde justícia che py’apýpe, aikuaauka uvei nde reko hekoitépe ha ne mborayhu. Nañomíri ne añetegua ni nde poriahuvereko, amyasãi uvei atyguasúpe. Che Ruete, anína rejoko chehegui nde poriahuvereko, nde poriahuvereko ha ne añetegua tapia toñangareko cherehe. Ojere cherehe mba’evaieta ojepapakuaave’ỹ meve, che rembiapo vaieta cherupitýma, ha ndaikatúi ajesaupi. Umía hetave che akã raguekuéragui, ha che py’a ndoiko porãvéi, ho’áma yvýre. Tahi’ãite ndéve chepytyvõmi hag̃ua, Nde, che Jaraite. Che Ruete, pya’emína eju chepytyvõ hag̃ua. Toñemotĩ ha tojesarea joaite peteĩcha umi ohekáva ohundi hag̃ua che rekove. Tokañy hapykue gotýo ha toñemotĩ opaite umi chehundiséva. Toñemotĩ ha toñemondyipa umi oñembohorýva cherehe, ha chehundiséva. Tovy’a ha tahory opaite umi nderekáva, ha opaite ojeroviáva guive nderehe te’i: Ñanderuete ningo ituichaiterei voi. Ajepy’apy ha ahasa asy ramojepe, (aikuaa porã) Ñanderuete oñangarekotaha cherehe. Nde voínte che pytyvõhára, Nde, che Ruete, eju pya’e chesalva hag̃ua che jejopy vaígui. Ha’e cherenohẽma pe yvykuágui, ahasa vai haguégui pe tuju karugua vaietégui; chepe’a ha emoĩ che pykuéra itaguasu ári chemboguata porã jevy hag̃ua. Ha upéi omoĩ che jurúpe peteĩ purahéi pyahu, amomba’eguasu hag̃ua che Ruetépe. Heta oĩta ohechátava ko’ã mba’e, okyhyjéta Ñanderuetégui ha ojeroviáta hese.

Peheka Ñanderuetépe ha ipu’aka; peheka py’ỹiete hova.

Nde katu, che Ruete, reiko che jerekuévo chemo’ã hag̃ua, nde reko jajaipa oĩ chendive chemoakãrapu’ã hag̃ua.

Upévare ningo ndaorepy’akangýi, omano ramojepe ohóvo ore kuimba’e oka peguáva, ore kuimba’e pypeguáva katu oñembopyahuve ohóvo ko’ẽ ko’ẽ rehe. Umi mba’e ore rohasavaroína ivevúi, rohasa asy ramojepe, roikuaágui uperire roguerekotaha hetave teko mimbipa ha vy’a añeteguáva. Ore noroma’ẽi umi mba’e ojehecháva rehe, umi ojehecha’ỹva rehe uvei; umi mba’e ojehecháva ndahi’aréi, umi mba’e ojehecha’ỹva katu oikotahína tapia g̃uarã.

Aiko ramo jepy’apy vaípe, Nde chemoangapyhy jevy, Nde chepytyvõ umi cherehe ija’e’ỹvagui ha Nde voi reipyso nde po akatúa chepytyvõ hag̃ua.

Ñanderuete réra katu peteĩ óga yvate oñemombarete porãva; hendápe oñaniva’erã pe heko potĩva ojesalva hag̃ua.

Ñanderuete poriahuvereko ningo ndopái, iporiahuvereko araka’eve ndoguéi. Iporiahuvereko oñembopyahu ko’ẽ ko’ẽre, ituichaite ningo imborayhu.

Hesu oma’ẽ hesekuéra ha he’i: Yvyariguakuérape g̃uarã ningo ndaikatúi voi, Ñanderuetépe g̃uarã katu opaite mba’e ikatu.

Ku ovecha rerekua oñangareko háicha hymba aty rehe; ijyva ári ogueraháta umi ovechara’y, ha ipyti’akuápe oñongatu ichupekuéra, mborayhupópe oñangarekóta umi imembyramóva rehe.

Nde ningo che mo’ãha, ha Nde reñangareko porã cherehe mba’evaígui; purahéi vy’a reheguávape Nde chembojere. Selah Ñanderuete he’i: Che rohekombo’éta ndéve ha ahechaukáta ndéve pe tape moõrupípa nde reguatava’erã, Che ahechaukáta ndéve che rembipota ha ajesarekóta nderehe.

Che ha’égui nde Ruete, nde Jára, Che rojapyhýma nde po akatúagui ha ha’e ndéve: Ani rekyhyje, Che roipytyvõta.

Umi cerrorusu oku’epa ramojepe, ha umi cérro oryryipa ramojepe che poriahuvereko katu noñemboykemo’ãi ndehegui, ha che ñembopy’apeteĩ nendive ndopamo’ãi, he’i nde Ruete, ndeporiahuverekóva avei.

Pe py’aguapy ame’ẽta peẽme, che py’aguapy añeteguáva ningo, ndaha’éinte pe py’aguapy yvyarigua ome’ẽva, upévare anítei peñemondýi ni peneangekõitei.

Ovy’aite ningo upe kuimba’e nderehe ojejokóva, ha ipy’apýpe oñemongetáva oguata jave nde rapekuérare. Ha ohasa asy ramojepe ñu perõ rupi ojehechaukáta ichupe yvu iporãva ha pe ama tenondeguáva ome’ẽ ichupe ijehovasa porã. Ha upéi ha’ekuéra oguata ohóvo pu’aka ipyahúva reheve og̃uahẽ meve Jerusalénpe ohecha hag̃ua Ñanderuetépe.

Ipepópe neñuãmbáta ha kyhyje’ỹme reiméta ipoguýpe, heko añete nemo’ãta ha Ha’e oñangarekóta nderehe.

Anítei pejepy’apy mba’eve rehe, pemombe’u uvei opaite mba’e pene ñembo’e rupi Ñanderuetépe, pembohasa ichupe g̃uarã pene rembijerure pene agradecimiénto reheve. Ha Ñanderuete py’aguapy, ituichaitevéva opaite yvyarigua arandúgui, ha ko py’aguapy kóva oñangarekóta pene remiandu ha pene pensamientokuéra rehe Hesu Cristopype.

Toñemomba’eguasu Ñandejára ha pe Jára Hesu Cristo Ru, Ha’e ningo pe Túva oiporiahuverekóva ha pe Jára oporomoangapyhýva. Ha’e voi oremoangapyhy opaite ore jehasa asýpe, ore roporomoangapyhy jevy hag̃ua Ha’e oremoangapyhy haguéicha.

Ñanderuete oĩ guive chendive ndakyhyjemo’ãi yvyarigua rembiapo vaígui.

Peha’ãrõ vy’apópe ani penekangy ou ramo pe jepy’ara’ã, peropu’akakuaákena, peñembo’epeína uvei.

Peñemombaretéke opavave peẽ pejeroviáva guive Ñanderuete rehe, ha pemokyre’ỹ pende py’apy.

Ja’e uvei jeroviapópe ha kyhyje’ỹre: Ñanderuete ningo che pytyvõhára ha ndakyhyjemo’ãi: Mba’e piko ikatúne ojapo cherehe che rapichakuéra, (Salmokuéra 118,6).

Ñanderuete tome’ẽ heko jajái mba’eitagui pe pu’aka penemombareteve hag̃ua pehóvo pendepype Ipytu Porãite rupi.

Che ajerovia ne ñe’ẽ rehe, Nde chemo’ã ha reñangareko porã haguére cherehe. Pejei che ypýgui, peẽ tekove ñaña, che ajapóta che Ruete rembiapoukapy.

Jaikuaa porã ningo opaite mba’e ojehúva guive Ñanderuete ra’y ha itajyrakuéra rekovépe, oipytyvõ porãtaha ichupekuéra (oñemboheko porãmive hag̃ua ohóvo), umi Ha’e ohenóimavape yma guive ita’ýra ha itajýra ramo.

Che aikuaa porã pe pensamiénto aguerekóva che py’apýpe penderehe, he’i pende Ruete, che akãme aguereko py’aguapy, ha ndaha’éi py’aro, ame’ẽ jevy hag̃ua peẽme umi mba’e peha’ãrõva ha peiko hag̃ua py’aguapýpe pene retãteépe.

Ndekaigue ramo nde ára porãme, nekangyva’erã avei nde ára vaípe.

Che jepy’apy vaiha árape rohenói, ha Nde cherendu porã.

Ñanderuete ndopoimo’ãi hetãgui ha nomboykemo’ãi hetã Israélpe.

Ani pejepy’apy ni peñemondýi pende py’apýpe, pejerovia uvei Ñanderuete rehe ha pejerovia avei cherehe.

Jaiko mbaretépe ñande jeroviápe ñamyi’ỹre, Ñanderuete katuete ojapopava’erã he’imava’ekue guive,

Mávapa pende apytépe okyhyje Ñanderuetégui, ha ohendu hembiguái ñe’ẽ. Ha nde reiko ramojepe pytũ guýpe térã nderehechái ramojepe pe arasakã, ejerovia Ñanderuete rehe, ha ejejoko nde Jára rehe.

Ema’ẽmína cherehe ha cheporiahuverekomína, aimégui che año ha jejopy vaípe. Ajepy’apyeterei ningo, cheguenohẽmína che jehasa asýgui.

Nde pópe amoĩ che pytu reñangareko hag̃ua hese, Nde, che Ruete, ha’égui che pytyvõhára, Nde che rerekua añeteguáva tapia g̃uarã.

Aníke peiko umi hakate’ỹvaicha, oikóva pirapire rekávonte, pevy’a uvei peguerekomíva reheve; Ñanderuete voi he’i: Che ndapoimo’ãi araka’eve pendehegui ha araka’eve Che ndapohejamo’ãi tyre’ỹ ramo, (1 Timotéope 6,6; Josue 1,5).

Che ánga, ejerovia Ñanderuete rehe, toñemokyre’ỹ ha toñemombarete che py’apy ojerovia porã hag̃ua Ñanderuete rehe.

Ñanderuete katu ohechaukáma imborayhu ñandéve, Hesu Crísto omanóvo ñanderehehápe, ñande jaiko ramojepe angaipa (Aña) poguýpe.

Ñande jaguerekógui ñande jerekuévo ku araícha heta techahare ojeroviaitéva, upévare jaipe’a ñandejehegui opaite mba’e ñandejopýva ha ñandejokoséva, ha avei pe angaipa ñanemoñuhãséva, ha ñañani paciéncia reheve pe carréra oñemoĩva ñane renonderãme. Umíva ningo mbovy ára ñandehavira hi’ã háichante ichupekuéra, kóva katu ñanerekombo’e ha ñandehavira ñande reko iporãve hag̃ua ha ñande reko ojoguave hag̃ua Hesu Crísto reko porãme. Añetehápe opaichagua jehavira jahasa asy aja, nañanembovy’amo’ãi, hasy uvei; upéi katu hi’a justícia ha py’aguapy, umi ojepokuaávape g̃uarã. Upévare pemombarete jevy pende jyva ikane’õva ha pene renypy’ã ikangýva. Pemyatyrõ pende rape ikarẽva, ani hag̃ua pende pykuéra ikaráu, tokuera uvei. Peñeha’ãke peiko hag̃ua py’aguapýpe opavave ndive ha peñemboheko porã, ko’ãva’ỹre avave ndohechamo’ãi Hesu Crístope, ha peñangareko porãke ani hag̃ua avave pende apytépe omboyke Ñanderuete mborayhu ni ijopói (Hesu Crísto) ha péva ojehúta peiko ramo py’arópe pende rapicha ndive, koichagua teko ningo penemongy’a ha penemyangekõi ha ováta heta hapicha rehe. Anítei oime pende apytépe peteĩ opoíva Ñanderuetégui, ojehu haguéicha Esau ndive; okaru porã hag̃uánte ha’e, ovende ta’ýra ypykue reko, (Génesis 25,31). Peikuaa voi ningo uperire, Esau ohupityse hague avei itúva jehovasa, itúva katu ombotove ichupe. Heta tesay reheve oheka itúva ohovasa peve ichupe avei; pe jehovasa iporãvéva katu oñeme’ẽmba jepéma, (Jacóbope). Peẽ napeñembojaiva’ekue pe cérro rehe (Israelguakuéraicha), ikatúva rehe ojepoko oĩháme tata hendýva, arai hũetéva, pytũmby ha yvytu jepoka. Ha napehendúi avei pe turu (trompéta) pu ni Ñanderuete ñe’ẽ. Upéramo Israelguakuéra ojerure asy anive hag̃ua Ha’e oñe’ẽ ichupekuéra. Ha ñama’ẽ Hesu rehe, Ha’e voi ñande jerovia apohare, hendive ñañepyrũ jajerovia ha hendive ñag̃uahẽ ñande jerovia ru’ãme. Hesu oha’ãrõ pe vy’a outavahína ichupe g̃uarã, upévare Ha’e ohasa asy ha omano ikurusúre otĩ’ỹre. Ha ko’ág̃a Ha’e oguapyhína Ñanderuete yke akatúape.

Ko’ág̃a peve ne’ĩra pejerure mba’eve che rérape, pejerure katu ha pehupityva’erã, peẽ pevy’aite hag̃ua.

Ag̃uiete oĩ Ñanderuete mayma ohenóiva guive ichupe, umi ohenóiva jeroviapópe ichupe. Umi okyhyjévape ichugui Ha’e ojapo mba’eporã, ha ohenduhína avei isapukái asykuéra, ha oguenohẽ ichupekuéra ijejopy vaígui.

Oñemoherakuã ramo mba’evai ndokyhyjemo’ãi, ojeroviágui ipy’aite guive Ñanderuete rehe.

Ñanderuetépe g̃uarã ndaipóri mba’eve ikatu’ỹva ojapo.

Nde reguenohẽ haguére che ánga ñemanógui ha che py ñepysãngágui, aguata porã hag̃ua che Ruete renondépe, pe oikovéva resapépe.

Peĩ yvagakuéra pepurahéike, ha nde yvy evy’aitéke, peẽ cerrokuéra pesapukái puraheipópe, Ñanderuete omoangapyhýgui hetãme, ha oiporiahuvereko jevy umi ohasa asývape.

Upévare che hermanokuéra ahayhúva, peñembo’y hatãkena, pemỹi’ỹre (akatúape ni asúpe, Deuteronómio 28,14), pemba’apo katu kyre’ỹme pene rembiapópe, ha peikuaa porãke opaichagua tembiapo pejapóva guive Ñanderuetépe g̃uarã ndareiriha (ndojeitymo’ãiha tesaráipe).

Aníkena ñanekane’õ jajapo hag̃ua ñane rembiapo iporãva, hi’árape ñamono’õva’erã, katuete nañaneate’ỹi ramo.

Ñanderuete tapia oĩ che resa renondépe; ha Ha’e oĩgui che akatúape nda’amo’ãi.

Péicha he’i Ñanderuete, Israel Jára Heko Porãitéva: Peñembyasy ramo pejapo vai haguére ha pejevy che rendápe, pejesalva hag̃ua, peñemomirĩ ha pejerovia ramo cherehe peẽ penembarete jevýta, peẽ katu ndapeipotáikuri,

Ko’ã Ñanderuete promésa rupi ñane ánga ojohu pytu’u añeteguáva ku barcoguasu oñeñapytĩ háicha sã mbaretépe ty’ãiguasúpe (áncla), upéicha ñande jajejoko hatãva’erã avei isã rehe (ipromésa rehe) oñeñapytĩvahína pe óga jojohuha aosãingo kupépe, oĩva yvágape.

Peñeha’ã ha pehecháta Ñanderuete ipy’a porãha, ovy’aite upe kuimba’e ojeroviáva hese.

Upévare ningo umi ohasa asýva Ñanderuete oipotágui, tomoĩ hi’ánga Ñanderuete pópe ha oñemomirĩvo tojapo mba’eporã.

Ha’ekuéra ojejopy vaiete jave, Ha’e ojepy’apy avei, upévagui Ñanderuete ombou ijyvága rembijokuái oipytyvõ hag̃ua ichupekuéra, Ha’e ipy’aporã ohay’úgui ichupekuéra. Ha’e ojogua ichupekuéra ha omopu’ã jevy jey ha ohupi ichupekuéra ijyva ári ymaite guive.

Che ra’ykuéra ha che rajykuéra, peẽ ningo Ñanderuete reheguáva, ha peẽ pembopoguy umi proféta ijapúvape; ituichavégui pe oĩva pendepype, upe oĩva yvy apére.

Opaite ko’ã mba’evai ñande jagueropu’akapa Hesu Crísto rupi, ñanderayhúgui. Che katu aikuaa porã mba’evete ndaikatuiha ñandepe’a Hesu Crísto mborayhúgui, ni ñemano térã tekove, niangelkuéra térã demoniokuéra (añanguéra), ni yvy arigua térã ouva’erãva rehegua, ni Satana rembijokuái, ni yvategua térã yvy guypegua, ni ambue pu’aka ndaikatúi ñandepe’a Ñanderuete mborayhúgui, ojehechaukámava Ñandejára Hesu Crísto rupi.

Upévare peiporu porãke opaite Ñanderuete ñorãirõ rembiporukuéra peẽ ikatu hag̃ua peropu’akapa, og̃uahẽ ramo pe ára vai ha Satana pende reityse ramo iñuhãme.

Pevy’a tapiákena. Ani pepoi pene ñembo’égui ni peẽ pendekangy, peñembo’e pehóvo uvei (Ñanderuete ome’ẽ meve pejeruréva térã Ha’e ombotove peve), (Lúcas 18,1-7; 2 Corintoyguakuérape 2,7-10). Peagradece opaite mba’e rehe, kóva ningo Ñanderuete rembipota ojeroviáva guivépe g̃uarã Hesu Crístore.

Sapy’aitemínte hi’are ipochy, ijeporiahuvereko katu oiko kuimba’e ha kuñakuéra rekove pukukue. Ka’aru pytũme og̃uahẽ jahe’o, iko’ẽvo katu opa, ha hendaguépe og̃uahẽma vy’a tuicháva.

Che, Che voi ningo, pomoangapyhýva. Mba’érehepa rekyhyje yvyarigua omanótavagui, iñemoñarẽnguéra ojogua umi kapi’ípe.

Ñanderuete reko noñemoambuéi, Ha’e nopyrũi iñe’ẽ rehe araka’eve, Ha’e ningo penerenoiva’ekue peñembopy’apeteĩ hag̃ua ita’ýra, Ñandejára Hesu Crísto ndive.

David opurahéi Ñanderuetépe oguenohẽ rõguare ichupe hese ija’e’ỹva, Saul pógui, he’ívo: Che rohayhu, Nde, che Ruete, chemombarete haguére. Ha’e ojupi ha oveve querubin (ángel ruvichaguasu) ári, ha oveve pe yvytu pepo ári. Ha omoĩ pytũ imo’ãha ramo, ijerekue rehe oĩ pytũ yguiguáva ha arai ára peguáva. Ha’e oñeñu’ãmba ypytũme, ha oiko arai ha tatatĩna apytépe. Yvate Ñanderuete omosunu, ha pe Ijyvatetéva ñe’ẽ ningo: Sunu, amandáu ha aratiri. Opa rupiete opoi ihu’ykuéragui, oity hi’aratiri ohundi hag̃ua ichupekuéra. Ore Ruete, Nde reja’o ha reipeju haguére nde pochy ojekuaa pe yeta ruguaite ha ojehechakuaa yvy pyendakuéra. Ha’e oipyso ipo yvágagui cheguenohẽ hag̃ua yguasúgui. Upéicha Ha’e cheguenohẽ umi cherehe ija’e’ỹva pógui, cherayhu’ỹva imbaretevégui chehegui. Oko’i hikuái cherehe che aime vai jave, Ñanderuete katu chemo’ã. Cheguenohẽ yvy inandi porãháme, Ha’e ningo chepytyvõ porã cherayhúgui. Ñanderuete, Nde ningo che itaguasu (ajesalva hag̃ua) ha che róga yvate oñemombaretepyréva ha che pytyvõharaite; Nde, che pytu’u rendaitéva, nderehe ajerovia tapiaite; che mo’ãhára, Nde reñangareko porã cherehe, Nde reĩ chendive chesalva hag̃ua.

Tojekuaa pende jerovia, ohasáva jepy’ara’ã rupi, iporãve órogui, oñehundikuaáva tatápe. Ha pembopoguy ramo pende jepy’ara’ã, peẽ pemomba’eguasu ha pemboete Ñanderuetépe Hesu Crísto ou jevy ramo g̃uarã.

Ha’e oñangarekóta cherehe hogaguasúpe og̃uahẽ jave pe ára ivaipáva, Ha’e cheñu’ãta hekoha ijyvatehápe.

Ñanderuete resa oma’ẽ hekopotĩva rehe, Ha’e ojapysaka porã imba’ejerure asy rehe.

Ñane ánga toha’ãrõ Ñanderuete ojapóva rehe, Ha’e ñanepytyvõta ha Ha’e ñanemo’ãta. Upéicha Ñanderuete ñanembopy’arory jajerovia porãgui héra porãite rehe. Nde poriahuvereko toĩ orendive, Nde, ore Ruete, ore rojeroviágui nderehe.

Añetehápe pende Ruete voi omoangapyhýma Siónpe, oiporiahuverekóta itaperekuérape ha ijyvy perõgui ojapóta Eden, ha iñuguasúgui Ñanderuete ojapóta kokue porã, ipype ojejohu hag̃ua vy’a, tory, purahéi ha ñemomba’eguasu avei.

Upévare anive pejepy’apy ko’ẽ ramo g̃uarã rehe, pe ko’ẽ ramogua ára ogueru jevýtama ijehe ijepy’apyrã, péva iporãma (ovaléma) jaisu’u hag̃ua ko ára pegua jepy’apy.

Ha’e chemoangapyhy, Ha’e chesãmbyhy ijustícia rape rehe, héra rayhupápe.

Nde ha’égui che itaguasu (mo’ãha) ha che róga oñemombaretéva, Nde réra rehehápe chesãmbyhy ha chemboguata nde rapére.

Ha pe ojeroviáva hese ha ojerure ramo peteĩ mba’e, Ha’e oipotáva avei, katuete Ha’e ohendúta imba’ejerure. Ha jaikuaárõ, Ha’e ñanerendutaha oimeraẽ mba’e jajerurérõ, jaikuaa jarekomaha umi mba’e jajerureva’ekue ichupe.

Opaite umi mba’e yma guive oĩva Ñanderuete kuatiañe’ẽme ojehaiva’ekue ñanembo’e hag̃ua, okakuaa hag̃ua ñane paciéncia ha ñanemokyre’ỹ hag̃ua iñemoangapyhy rupi, aipórõ jajejoko hatãkena pe esperánza rehe.

Che Ruete, ehechaukamína chéve nde rapekuéra, chembo’emína nde rapekuéra rehe aikuaa porãve hag̃ua. Chemboguatamína nde justícia rupive, ha chembo’emína, Nde ha’égui ore Ruete, che salvador, nderehe che ajerovia opaite árape.

Ñanderuete he’íta hi’angelkuérape oñangareko hag̃ua opaite nde raperã rehe. Hi’angelkuéra ndererahava’erã ipopekuéra ani hag̃ua ita rehe reñepysãnga.

Peñeñangarekóke! Pepyta hatãkena pende jeroviápe, peñomokyre’ỹ ha peñomombaretéke.

Peẽ penembareteve hag̃ua pende py’apýpe, ha pende reko ta’ipotĩve hag̃ua pehóvo Ñandejára Ñanderuetépe g̃uarã ha Ñandejára Hesu Crísto oúrõ g̃uarã opaite heseguakuéra ndive, taupéicha (amén).

Che katu añemboja ramo Ñanderuete ypýpe avy’aitéta, che ajeroviágui Ñanderuete rehe, amombe’u hag̃ua hembiapo tuichaitéva.

Ñanderuete, yvága aty Jára oĩ ñanendive, Jacóbo Jára voi ningo ñane mo’ãhára. Selah

Che aháta ne renonderãme ambojoja hag̃ua umi tape ojoja’ỹva, ajoka hag̃ua umi okẽ bronceguiguáva, ha amopẽ hag̃ua iñembotyha hierroguiguáva;

Hesu Crísto voi oñangareko porã cherehe opaichagua mba’evaígui ha chemog̃uahẽ porãta hetãguasu yvága peguápe. Toñemomba’eguasu ichupe ára atyguasukuéra guive ára atyguasukuéra peve (tapia g̃uarã), taupéicha.

Ñanderuete ipu’aka rupi, oñangareko penderehe pejeroviaháre hese ha pehupity hag̃ua pe salvacion ojehechaukátava ára pahápe.

Ñanderuete ojoko umi ho’ávape, ha omopu’ã jevy umi ikangývape.

Ñanderuete ipy’aporãgui penerenoiva’ekue Hesu Crísto rupi heko jajaipa tapia g̃uarãvape. Pehasa asy rire sapy’ami, Ha’e voi penemboheko porãta, penemombaretéta, penemohatãta ha penemohenda porãta.

ha pende Ruete pomboguatáta opaite árape ha penemohyg̃uatã porãta pende yvy ikangy ramojepe ha Ha’e omombaretéta pende rete ha pejoguaitéta ku ka’avoty oñembohykuévape meme árape, ha yvu hi’y hetávape, ndahypáiva araka’eve.

Eiko chéve g̃uarã peteĩ itaguasu ramo, ikatu hag̃ua che aju tapiaite hendápe. Nde chepytyvõukava’ekue. Nde ha’égui che itaguasu chemombytu’úva.

Ha’e ohenói ramo che réra Che ambohováita ichupe, Che aĩta hendive ijepy’apyha árape, aguenohẽ hag̃ua ichupe ijejopy vaígui ha upéi Che ambotuicháta ichupe.

pe kusuviru’ũ (torbellíno) ohasa háicha, péicha avei pe iñañáva ndahi’areiva’erã, ha pe heko potĩva katu oiko tapiáta;

Jaikovérõ, jaikove Ñanderuetépe g̃uarã; ha ñamanórõ, ñamano avei Ñanderuetépe g̃uarã. Upéicha ningo jaikovérõ térã ñamanórõ, ñande ningo Ñanderuete mba’e voi.

Hesu Crístope oñemoĩ kurusúre Ha’e ikangy jave, ko’ág̃a katu oikove jevy Ñanderuete pu’aka rupi. Upéicha ore kangy ramojepe avei, orembarete hendive Ñanderuete pu’aka rupi peẽme g̃uarã.

Ñanderuete ne mo’ãha ymaite guive, Ha’e oipyso ijyva mbarete nde guýpe; Ha’e omosẽ ne renonderãgui umi nderehe ija’e’ỹvape, ha he’i: Pembopoguy.

Che ndapohejamo’ãi tyre’ỹ peẽme, aju jevýta pene rendápe.

Pyharevépe tañandu ne mborayhu, nderehe ajeroviágui, ehechaukamína chéve che raperã aguata porã hag̃ua, che ánga nderehénte ojerovia.

Ñanderuetémante pe ombopy’aguapýva, voiete amongu’íta Satanáme pende py guýpe. Hesu Crísto poriahuvereko toĩ pende apytépe.

Upéicha ramo ovy’aite mayma ojeroviáva guive nderehe, tovy’a joaite hikuái opaite ára peve, Nde remo’ã porãgui ichupekuéra, ha tahory ndereheve umi ohayhúva guive nde réra. Nde ningo, che Ruete, rehovasa pe heko potĩvape, ha reñu’ãmba ichupekuéra nde poriahuvereko rupi.

Ndereikuaái ha nerehendúi piko Ñanderuete, yvága atykuéra Jára ningo tapia g̃uarã voi. Ha’e oikohína, Ha’e ojapo ypyva’ekue ko yvy ijapýra paha peve. Ndaipy’akangýi, naikane’õi ha ndaipóri avave ohupitýva ikuaapy arandu.

Pema’ẽna umi guyra ovevéva ára rehe, ha’ekuéra noñemitỹi ni nomono’õi mba’e ra’ỹinguéra iñongatuhápe, upeichavéramo jepe pende Ruete, yvágape oĩva, omongaru ichupekuéra. Ha peẽ ningo mba’eguasuve ichuguikuéra.

Che katu ajerovia nderehe, che Ruete, che ningo ha’e: Nde, che Jára. Nde pópe oĩmba che arakuéra, cheguenohẽmína umi cherehe ija’e’ỹva ha chemuñáva pógui.

Ne ñe’ẽ chemoangapyhy ajepy’apy jave, ne ñe’ẽ chemoingove jevy.

Ajepy’apy ha ahasa asy ramojepe, (aikuaa porã) Ñanderuete oñangarekotaha cherehe. Nde voínte che pytyvõhára, Nde, che Ruete, eju pya’e chesalva hag̃ua che jejopy vaígui.

Ñanderuete ningo oñangarekóta nderehe ha Ha’e ndohejamo’ãi re’a peteĩ ñuhãme.

Pema’ẽ porãke, pende Ruete po naikangýi oporopytyvõ hag̃ua, ni ijapysa ohendu hag̃ua.

Ha’e oñepysãnga ramojepe ndo’apamo’ãi, Ñanderuete ojokótare ichupe ipógui.

Ñanderuete voi omoĩmbava’erã imba’eitágui opaite peikotevẽva guive, Hesu Crísto reko jajaipa rupi.

Nde ningo yvága atykuéra Jára, nde py’a porã ha reiporiahuvereko opaite nerenóivape.

Ndohejamo’ãi ndepysyrỹi ha pe oñangarekóva nderehe ndokemo’ãi.

Ñanderuete nahakate’ỹiva’ekue ita’yratee rehe jepe, ome’ẽvo ichupe ñanderehehápe, mba’éicha piko nome’ẽmo’ãi avei hendive opaite ambue mba’e (ñaikotevẽteéva).

Ha’e ningo ñande Apohare ha Ha’e ñanemoingoveva’ekue Hesu Crísto rupi jajapo hag̃ua Ha’érupi ñane rembiapo porã, Ha’e ombosako’ipamava’ekue voi ñandepype, jajapokuaa hag̃ua ipu’aka rupi ñane rembiapo porã, ha jaguata hag̃ua ipype.