Ñemohenda
107 Versíkulo bíblico Año Nuevo rehegua
Ko áño opaha ára jave ningo tuicha mba’e ñane retépe, jahechakuaa opa mba’e oikova’ekue ko’ã doce mésepe. Jahecha py’ỹi ha ñañamindu’a umi mba’e jajapóvare, umi mba’e ñane konseguívare ha umi mba’e ñaaprendévare.
Ñandejára Ñe’ẽme heta mba’e oĩ ñanemomandu’áva ko’ã árape. Salmo 90:12-pe he’i: “Eremombyky ñambopaha ñande árakuéra, ikatu hag̃uáicha ñaneakãguapy”. Upéva ñanemomandu’a tekotevẽha ñamomba’e ñande rekove ha jaiporu porã.
Ko áño opakuévo, ikatu jahecha mba’éichapa ñaime ñande py’aite guive ha mba’éichapa ñaime Ñandejárandi. Efesios 5:15-16-pe he’i ñandéve: “Peñemotenonde porãke... peiporu porã pe tiempo, ko’ã ára ivai niko”. Upévare, ñañeporandumiva’erã jaiporúramo ñande tiempo umi mba’e ñanemoag̃uivátava Ñandejárare ha ñande rapicháre.
Ha katu, ndaha’éi jahechakuaa añónte umi mba’e ohasava’ekue. Avei ñanekyre’ỹ va’erã umi mba’e porã oútava rehe. Jeremías 29:11-pe he’i Ñandejára: “Che aikuaa porã umi mba’e ajapótava penderehehápe; ha’e mba’e porã ha ndaha’éi mba’e vai, ikatu hag̃uáicha peguereko peteĩ futuro ha peteĩ esperanza”. Umi mba’e ñanemombarete jaikuaa vove Ñandejára orekoha plan ñanendive g̃uarã.
Upévare upe oikóva Hesu Cristopype oñemoingo pyahúma, oñemboheko ambuéma (nacimiénto pyahu), pe teko tuja opáma (pe teko tuja nomandavéima hekovépe). Peikuaa porãke, pe teko pyahu oñepyrũma hague.
Ani peñemomandu’átei umi mba’e ohasamava’ekue rehe, ha ani peguerútei pene akãme umi mba’e ymaveguare. Pema’ẽ porãke, Che ajapo mba’e ipyahúva; pya’ete ojekuaáta, ndapehechakuaái piko. Ambohape jevýta tape yvy perõ rupi ha ysyry, heñoi’ỹháme mba’eve.
Che aikuaa porã pe pensamiénto aguerekóva che py’apýpe penderehe, he’i pende Ruete, che akãme aguereko py’aguapy, ha ndaha’éi py’aro, ame’ẽ jevy hag̃ua peẽme umi mba’e peha’ãrõva ha peiko hag̃ua py’aguapýpe pene retãteépe.
Péicha tohesape avei pende resape pende rapichakuéra apytépe, ohecha hag̃ua hikuái pene rembiapo porã ha omomba’eguasu hag̃ua pende Ruetépe oĩva yvagakuérape.
Nda’eséi ag̃uahẽmaha hu’ã meve, ni che reko hekoitepemaha, añeha’ãmba katu ahupitypa peve, Hesu Crísto mborayhu cherupity ha chejokóguima. Che hermanokuéra, che ningo nda’eséi ahupitypáma hague, peteĩ mba’e año ajapo, cheresarái umi mba’e tapykuépe opytava’ekuégui ha añeha’ãmba ahupity hag̃ua umi mba’e oĩva che renonderãme. Aguata ahávo ag̃uahẽ meve hu’ãme ha ahupity hag̃ua che rembiapo repy, Ñanderuete ome’ẽtava opavave umi Ha’e ohenoiva’ekuépe Hesu Crístope g̃uarã.
Ñanderuete poriahuvereko ningo ndopái, iporiahuvereko araka’eve ndoguéi. Iporiahuvereko oñembopyahu ko’ẽ ko’ẽre, ituichaite ningo imborayhu.
Ejapomína chepype Nde, che Ruete, peteĩ py’a ipotĩva, ha embopyahu chepype peteĩ pytu imbaretéva. Aníkena chemosẽtei ne renondégui, ha ani reipe’átei chehegui nde Pytu Porãmbáva.
Opaite ko’ã mba’e ári pemonde mborayhu, péva ningo ombojoaju porã añetetehápe. Hesu Crísto py’aguapy toisãmbyhy pende py’apýpe, upevarã avei peẽ peñehenói peiko hag̃ua peteĩ tete añóme, ha peagradece ichupe.
Che hermanokuéra, che ningo nda’eséi ahupitypáma hague, peteĩ mba’e año ajapo, cheresarái umi mba’e tapykuépe opytava’ekuégui ha añeha’ãmba ahupity hag̃ua umi mba’e oĩva che renonderãme. Aguata ahávo ag̃uahẽ meve hu’ãme ha ahupity hag̃ua che rembiapo repy, Ñanderuete ome’ẽtava opavave umi Ha’e ohenoiva’ekuépe Hesu Crístope g̃uarã.
Che katu ajerovia nderehe, che Ruete, che ningo ha’e: Nde, che Jára. Nde pópe oĩmba che arakuéra, cheguenohẽmína umi cherehe ija’e’ỹva ha chemuñáva pógui.
Mba’érehe piko nde che ánga nekangy, ha mba’érehe piko rekyhyjereína chepype. Ejerovia Ñanderuete rehe. Amomba’eguasu jevýta ichupe, Nde ningo che pytyvõhára ha che Jarateetéva.
Pepurahéi joáke Ñanderuetépe peteĩ purahéi pyahu, Ha’e ojapo haguére mba’e techapyrãva, ipu’aka imbarete iterei ombopoguypa hag̃ua.
Ha’e ojapo porãmbaitékuri hi’árape; ha omoĩkuri apyre’ỹ reko yvyarigua py’apýpe; yvyariguakuéra ndoikuaái katu Ñanderuete ojapovahína iñepyrũ guive ipaha peve.
Ha anítei pende reko ojogua kuimba’e térã kuña ko’ag̃agua rekópe, upéva rãngue peheja pende reko oñemoambue hag̃ua ohóvo (Pytu Porãmbáva rupi) pende py’apy rembipotapype, peikuaa hag̃ua Ñanderuete rembipota iporãha, hekópe ha oporombohorýva.
Peñeha’ã ha pehecháta Ñanderuete ipy’a porãha, ovy’aite upe kuimba’e ojeroviáva hese.
Pevy’a tapiákena. Ani pepoi pene ñembo’égui ni peẽ pendekangy, peñembo’e pehóvo uvei (Ñanderuete ome’ẽ meve pejeruréva térã Ha’e ombotove peve), (Lúcas 18,1-7; 2 Corintoyguakuérape 2,7-10). Peagradece opaite mba’e rehe, kóva ningo Ñanderuete rembipota ojeroviáva guivépe g̃uarã Hesu Crístore.
Che ánga omomba’eguasu Ñanderuetépe, che py’aite guive amboete héra porãite. Nomyengoviái ñandéve ñane rembiapo vai ojerure háicha, ha ndohepyme’ẽi ñandéve ñane ñañangue ojerure háicha. Umi yvága ijyvate háicha ko yvy árigui, peichaite iporiahuvereko ituicha umi ichugui okyhyjévape g̃uarã. Kuarahyresẽ imombyry háicha kuarahyreikégui, péicha Ha’e omomombyry ñandehegui ñande reko ñaña rembiapo vai. Pe túva oiporiahuvereko háicha ita’yrakuérape, péicha Ñanderuete oiporiahuvereko umi ichugui okyhyjévape. Ha’e oikuaa voi mba’eichaguaitépa hína ñande, ha oikuaa porã voi ñande yvy timbonteha. Kuimba’e ha kuñakuéra arakuéra ha’ete ku ñanáicha, ha ipoty ku yvoty ñu rupiguáicha. Oipeju hatã ramo pe yvytu opa reíta pe yvoty, ha hendague jepe ndojekuaavéima. Ñanderuete mborayhu katu oĩ peteĩ ára atyguasu guive ambue ára atyguasu peve umi okyhyjéva ichugui ndive, ha ijustícia opyta iñemoñarenguéra peve, umi ojapóva guivénte iñe’ẽme’ẽ, ha umi imandu’áva hembiapoukapy rehe ojapo hag̃ua hekoitépe. Ñanderuete omohenda hatã iguapyhaguasu yvágape ha imburuvicha pu’aka oisãmbyhy opaite mba’e ojapóva guive. Emomba’eguasu nde, che ánga, che Ruetépe, ha ani nderesarái imba’e porãitégui. Pemomba’eguasu Ñanderuetépe, peẽ angelkuéra imba’éva guive, peẽ pendepy’aguasu mbaretéva ha pejapóva guive iñe’ẽ, peẽ peneñe’ẽrendu porã hembiapoukapy he’ívape. Pemboete Ñanderuetépe, mayma peẽ ángel atykuéra, peẽ mburuvichakuéra ha peẽ pejapóva guive hekoitépe hembipota. Pemomba’eguasu Ñanderuetépe, hembiapokue guive, opaite tenda rupi Ha’e oisãmbyhýva. Emboete, che ánga, Ñanderuetépe. Ha’e omopotĩ ne rembiapo vai, Ha’e omonguerapa ne mba’asykuéra. Ha’e oguenoh… nde rekove ñemanógui, Ha’e neñu’ã imborayhu ha iporiahuverekópe. Ha’e omyenyhẽ nde rekove mba’eporãgui ha Ha’e nemomitã jevy ku ñapykanícha.
Ejeroviáke nde py’aite guive Ñanderuete rehe, ha ani rejejoko ne arandu rehe. Nemandu’áke hese opaite nde rape rehe, ha Ha’e omyesakãta ne raperã.
Añetehápe oujevyva’erã ndéve g̃uarã peteĩ ko’ẽ porã, ha nde jerovia noñembyaimo’ãi.
Ani rekyhyje, Che voi aĩgui nendive, aníke nde py’akangy, che ha’égui nde Jára, nemombaretéva, tapiaite roipytyvõta, ha añangarekóta nderehe che pu’aka rupive.
Evy’aite Ñanderuete ndive, Ha’e tome’ẽ ndéve nde py’apy ojeruréva. Ñanderuete oipytyvõ ha oguenohẽ ichupekuéra ijejopy vaígui, ha’ekuéra ojerovia haguére hese. Emoĩna Ñanderuete pópe nde rekove rape, Ha’e nemboguata porã hag̃ua; ha hesénte ejerovia, Ha’e oñangareko porã hag̃ua nderehe.
Ñanderuete he’i: Che rohekombo’éta ndéve ha ahechaukáta ndéve pe tape moõrupípa nde reguatava’erã, Che ahechaukáta ndéve che rembipota ha ajesarekóta nderehe.
Chéverõ g̃uarã umi jehasa asy ko’ag̃agua jahasavañaína, ndaha’éi mba’eve, ñambojoja ramo pe teko jajaipáva rehe ojehechaukava’erã ñande rekoverãme.
Anítei pejepy’apy mba’eve rehe, pemombe’u uvei opaite mba’e pene ñembo’e rupi Ñanderuetépe, pembohasa ichupe g̃uarã pene rembijerure pene agradecimiénto reheve. Ha Ñanderuete py’aguapy, ituichaitevéva opaite yvyarigua arandúgui, ha ko py’aguapy kóva oñangarekóta pene remiandu ha pene pensamientokuéra rehe Hesu Cristopype.
Jaikuaa porã ningo opaite mba’e ojehúva guive Ñanderuete ra’y ha itajyrakuéra rekovépe, oipytyvõ porãtaha ichupekuéra (oñemboheko porãmive hag̃ua ohóvo), umi Ha’e ohenóimavape yma guive ita’ýra ha itajýra ramo.
Pema’ẽ umi tetã rehe, ha penepy’andýita, Che ajapótagui peteĩ tembiapo tuichaitéva pende árape, ha oñemombe’u ramojepe peẽme ndapegueroviamo’ãi.
Upévagui orembo’e toroipapa ore rekove arakuéra, ore rohupity hag̃ua pe aranduteéva (ndehegui).
Nde remyenyhẽ ko áño kóva nde poriahuvereko tuichágui, ha nde rape omondyky mba’eporãgui.
Ha Ñanderuete he’i: Pema’ẽ porãke: Che ambopyahu opaite mba’e. Ehai ko’ã mba’e, oikopava’erã Che ha’éva guive, ipype oĩgui añetegua ha pu’aka tapia g̃uarãva.
Hesu Crísto ningo naiñambuéi, peteĩchánte kuehe, ko ára ha ára atyguasurãme g̃uarã (por los síglos).
Toñemomba’eguasu Ñandejára Ñanderuete ha Hesu Crísto Rúpe iporiahuvereko rupi omoingove jevyva’ekue Hesu Crístope omanomava’ekue apytégui, péva ñanepytyvõ porã ñande ñaha’ãrõ hag̃ua avei Ha’e ñanemoingove jevy peve,
Mba’eporã ha nde poriahuvereko añetehápe oĩta chendive aikove aja pukukue, che aikose Ñanderuete roga guasúpe aikove aja pukukue.
Ñanderuete oĩhína nde apytépe, ipu’aka nemo’ãta, Ha’e ovy’áta nendive, nderayhúgui okirirĩta, vy’apópe osapukáita nderehe.
Umi ojeroviáva Ñanderuete rehe katu oñemombarete jevýta, oveve yvateva’erã ku ñapykanícha, oñaniva’erã hikuái ha ndaijuku’amo’ãi, ha oguata pukuva’erã hikuái ha naikane’õmo’ãi.
Peñeha’ã ha peñemombaretéke; ani pekyhyjétei, ha ani peñemondýi ichuguikuéra, Ñanderuete, Ñandejára, ohóta penendive; Ha’e ndopoimo’ãi pendehegui ha napenemotyre’ỹmo’ãi.
Upévare jagradece Ñanderuetépe, Ha’e ñanembopu’aka haguére ñemano rehe, Ñandejára Hesu Crísto rupi.
Anítei peku’e, ha peikuaa Che ha’eha pende Ruete, tetãnguéra chemomba’eguasúta ha che poguýpe opytapa ko yvy ha opaite tetãnguéra.
Peheka raẽ Ñanderuete rembipota ha hetãguasu, ha opaite ko’ã mba’e oñeme’ẽmbáta peẽme. Upévare anive pejepy’apy ko’ẽ ramo g̃uarã rehe, pe ko’ẽ ramogua ára ogueru jevýtama ijehe ijepy’apyrã, péva iporãma (ovaléma) jaisu’u hag̃ua ko ára pegua jepy’apy.
Ñanderuete oñangarekóta nderehe resẽ ramo nde rógagui térã reike ramo ipype, ko’ág̃a guive ha opaite ára peve.
Ore Ruete, Nde, che Jára: Che amomba’eguasúta ha amboetéta nde réra, rejapo haguére tembiapo ndetuicháva; ymaite guive Nde rehekombo’e hekoitépe ha añetehápe.
Che ánga, ejerovia Ñanderuete rehe, toñemokyre’ỹ ha toñemombarete che py’apy ojerovia porã hag̃ua Ñanderuete rehe.
Heta jepy’amongeta oĩ ñande py’apýpe Ñanderuete rembipotánte katu ojehuva’erã ñande rekovépe.
Ojehu ningo ojehai haguéicha Ñanderuete kuatiañe’ẽme: Kuimba’e ha kuña resa ndohechaiva’ekue, ijapysa nohenduiva’ekue ha ipy’apýpe naheñoiriva’ekue, Ñanderuete ombosako’íma umi ichupe ohayhúvape g̃uarã, (Isaías 64,4).
Pe esperánza Ñanderuete ome’ẽva tomyenyhẽ pende jerovia, vy’águi ha py’aguapýgui, ha pende esperánza tokakuaave ohóvo Pytu Porãmbáva pu’aka rupi.
Ore roha’ãrõ Ñanderuete omoñepyrũva’ekue pe tembiapo iporãva pendepype, Ha’e voi penemog̃uahẽtaha hu’ãme, Hesu Crísto ou jevyha árape.
Pe py’aguapy ame’ẽta peẽme, che py’aguapy añeteguáva ningo, ndaha’éinte pe py’aguapy yvyarigua ome’ẽva, upévare anítei peñemondýi ni peneangekõitei.
Peju che rendápe opaite peẽ peñeha’ãmbáva pehupity hag̃ua pe tekove tapia g̃uarãva, ha ani peẽ voi peñeha’ã reive pepoi hag̃ua pene angaipa cárga pendejopývagui. Chémante ikatu pomombytu’u porã. Peñemoĩ che cangálla guýpe (yúgo guýpe) ha peheja Che tapohekombo’e porã, chepy’a porãgui ha che añemomirĩgui, péichamante pejohúta pe pytu’u añeteguáva pene ángape g̃uarã.
Pepoi pende reko tujágui, pe yvy arigua reko tuja oñembyaihína heko vai rembipota rupi. Peẽ peñembopyahupeína pende pytu porãme ha pende py’apýpe. Pemondéma pe tekove pyahu ha teko pyahúpe, Ñanderuete omoingovemava’ekue pendepype, peiko hag̃ua teko porãme pe Pytu Porãmbáva oisãmbyhy háicha pende rekove.
Ag̃uiete oĩ Ñanderuete mayma ohenóiva guive ichupe, umi ohenóiva jeroviapópe ichupe. Umi okyhyjévape ichugui Ha’e ojapo mba’eporã, ha ohenduhína avei isapukái asykuéra, ha oguenohẽ ichupekuéra ijejopy vaígui.
Aníkena ñanekane’õ jajapo hag̃ua ñane rembiapo iporãva, hi’árape ñamono’õva’erã, katuete nañaneate’ỹi ramo.
Og̃uahẽ ramo pe ára che akyhyjeha, nderehe katu ajerovia. Ñanderuete ñepytyvõ amombe’úta, iñe’ẽ oikóta katuete, Ñanderuete rehe ajerovia ha ndakyhyjemo’ãi. Mba’épa yvyarigua ikatúne ojapo cherehe.
Añetehápe, vy’apópe ha torypápe pesẽ joáta, ha py’aguapy reheve peju jevýta; umi cérro ha umi cerrorusu opurahéi joáta pene renondépe, ha umi yvyra ñu rupigua ojepopete joáta.
Jaiko mbaretépe ñande jeroviápe ñamyi’ỹre, Ñanderuete katuete ojapopava’erã he’imava’ekue guive,
Ñanderueténte omboguata porãkuaa yvyariguakuérape, oguata ramo hape porãre. Ha’e oñepysãnga ramojepe ndo’apamo’ãi, Ñanderuete ojokótare ichupe ipógui.
Ñanderuete ojapova’erã mba’e iporãitéva chéve g̃uarã, ne mborayhu ndopamo’ãi araka’eve, ani repoi ne rembiapokuégui.
Pema’ẽ porãke, mba’éichapa peikopeína, ani peiko iñarandu’ỹvaicha, iñarandúvaichante uvei peiko. Peiporu porãke umi oportunidad ko ára kóvape Ñanderuete ome’ẽva peẽme, ko’ã ára ningo ivaieterei.
Hesu Crísto py’aguapy toisãmbyhy pende py’apýpe, upevarã avei peẽ peñehenói peiko hag̃ua peteĩ tete añóme, ha peagradece ichupe. Hesu Crísto ñe’ẽ tomyenyhẽ pende py’apy opaite árape peñohekombo’e opaite arandúpe ha peñomokyre’ỹ Salmokuéra, purahéi ha ñembo’e rupi, ha peagradece Ñanderuetépe pende py’aite guive. Ha opaite mba’e pejapóva guive pene ñe’ẽ térã pene rembiapo rupi, pejapo Ñandejára Hesu Crísto rérape ichuperõguáicha ha peagradece Ñandejára Ñanderuetépe Hesu Crísto rupi.
Peha’ãrõ vy’apópe ani penekangy ou ramo pe jepy’ara’ã, peropu’akakuaákena, peñembo’epeína uvei.
Ñanderuete ningo che rekove resape ha che salvador, mávagui piko akyhyjéta. Ñanderuete che rekove mombaretehára, mávagui piko añemondýita.
Jaikuaágui péva, ha og̃uahẽtahágui pe ára Hesu Crísto ou jevy hag̃ua, pepáykena pekehágui ha pejohayhu avei, ñande salvacionrã ko’ág̃a hi’ag̃uiveháre ñande jajerovia ypy ramoguarégui Hesu Crísto rehe. Iko’ẽmbátama, ha pe ára og̃uahẽmbotáma, upévare tekotevẽ jaheja pe tembiapo vai ha jajapyhy pe ñorãirõ rembiporu tesape rendy reheguáva.
Ha pe ojeroviáva hese ha ojerure ramo peteĩ mba’e, Ha’e oipotáva avei, katuete Ha’e ohendúta imba’ejerure.
Upe oikóva pe Jára Ijyvatetéva ãme ha pe Ipu’akapáva poguýpe, Ndéve ndojehumo’ãi mba’evaietéva, ha mba’asy iñasãiva ndojamo’ãi nde róga rehe. Ñanderuete he’íta hi’angelkuérape oñangareko hag̃ua opaite nde raperã rehe. Hi’angelkuéra ndererahava’erã ipopekuéra ani hag̃ua ita rehe reñepysãnga. Nde rehasa ramo jepe leõ ha mbói ári, nde rehundipáta ichupekuéra. Ñanderuete voi ningo he’i: Ha’e ojejoko hatãgui cherehe, Che aguenohẽta ichupe ijejopy vaígui, ha Che añangarekóta hese ha’e oikuaágui che réra. Ha’e ohenói ramo che réra Che ambohováita ichupe, Che aĩta hendive ijepy’apyha árape, aguenohẽ hag̃ua ichupe ijejopy vaígui ha upéi Che ambotuicháta ichupe. Ambopukúta hekove, ha ahechaukáta ichupe che pu’aka (ha ha’e oikóta chendive tapia guarã). he’ikuaa Ñanderuetépe: Nde, che Ruete, ne rendápe akañykuaa ha Nde che mo’ãha, Nde, che Ruete, nderehe ajerovia.
Upéicha ramo nde resakuéra oma’ẽ porãta ne renonderãme ha nde ropepikuéra ohecha porãta oĩva guive nde resa renondépe. Ema’ẽ porãke nde pykuéra rape rehe, ani hag̃ua re’a karuguápe (tuju vaípe). Ani repiátei nde akatúa gotýo ni nde asu gotýo, emboyke nde py mba’evaígui.
Ha justíciagui heñóita tapia g̃uarã py’aguapy, angapyhy ha kyhyje’ỹ. Ha che retã ryepýpe oĩta py’aguapy ha che retãygua rogakuérape pytu’u kyhyje’ỹre.
Che ningo pe parral máta, ha peẽ ningo che rakãnguéra. Pe cherehe ojoajúva, ha Che hese, upévamante hi’a porã. Peẽ ndaikatúi pejapo mba’evete cherehe’ỹ.
Ha’e katu ombohovái chéve: Iporãntema (ovaléma) ndéve che poriahuvereko pu’aka. Che pu’aka ojehechauka porãmbáre ikangývape g̃uarã. Upévare che py’aite guive añembotuichase che kangykue rehe uvei, omba’apo porãve hag̃ua chepype Hesu Crísto pu’aka.
Peike hokẽnguéra rupi pemomba’eguasu hag̃ua ichupe, peg̃uahẽ pepurahéivo ichupe hogaguasu korapýpe, pehechakuaa hembiapokue ha pemboete héra porãite. Ñanderuete ipy’a porãite, opaite árape oiporiahuvereko, ha iñe’ẽ añeteguáva oiko tapia ñande tuvakuéra ára guive iñemoñarenguéra jevy jey peve.
Ema’ẽ porãke, Che ha’éma ndéve eñeha’ãmba ha eñembopy’aguasu; ani rekyhyjétei ha ani ndepy’akangýtei, pende Ruete, pende Jára, oĩta nendive mamo rehoha rupi.
Peñopytyvõ pe Pytu Porãmbáva me’ẽmby rupi, Ñanderuete ome’ẽ haguéicha peteĩteĩme umi hemime’ẽmby juavymbyréva apytégui. Peiporu hekópe umi me’ẽmby peteĩ capataz iporãvaicha ambuekuérape g̃uarã. Oimérõ peteĩ ojeroviáva oñe’ẽ, toñe’ẽ Ñanderuete oñe’ẽrõ guáicha ha’érupi; oimérõ peteĩ ojeroviáva oporopytyvõ, toipytyvõ hapichápe Ñanderuete pu’aka rupi; opaite me’ẽmby rupi toñemomba’eguasúnte Ñanderuetépe, Hesu Crísto rupi. Imba’e ningo pe teko jajaipa ha pu’aka, ára atyguasukuéra rupi, taupéicha (amen).
upévare ñag̃uahẽ jeroviapópe iguapyhaguasúpe, jahupity hag̃ua iporiahuvereko ha jajohu hag̃ua ipy’aporã, Ha’e ñanepytyvõ hag̃ua ñaikotevẽha árape.
Ne mborayhu iporãve jeikovégui, che juru nemomba’eguasu manteva’erã. Che jurúpe che romboetéta, nde rérape añembo’éta ahupívo che pokuéra (yvága gotýo).
Che Ruete, nderehénte che ajejoko che mitã guive ha Nde reñangareko porã cherehe. Nde reme’ẽmba che remikotevẽ che sy rye guive, Nde voi cherenohẽva’ekue che sy ryepýgui, upévare che romomba’eguasu tapiaite.
Che katu aikuaa porã mba’evete ndaikatuiha ñandepe’a Hesu Crísto mborayhúgui, ni ñemano térã tekove, niangelkuéra térã demoniokuéra (añanguéra), ni yvy arigua térã ouva’erãva rehegua, ni Satana rembijokuái, ni yvategua térã yvy guypegua, ni ambue pu’aka ndaikatúi ñandepe’a Ñanderuete mborayhúgui, ojehechaukámava Ñandejára Hesu Crísto rupi.
Ñande rekoharã ningo oĩ yvágape, upégui ñaha’ãrõ avei ñane salvacion Ñandejára Hesu Crísto rupi. Ha’e voi ningo omoambuéta ñande rete poriahu ojogua hag̃ua hete ojajaipávape, ha ipu’akaguasu rupi ombopoguypáta umi oñemoĩvape hese, opytapa hag̃ua ipoguýpe opaite mba’e ojejapomava’ekue guive.
Rehasa ramojepe hi’y hetaite rupi, Che aĩta nendive, ha ysyry ndetuicháva nderupity ramojepe nanembojahogamo’ãi. Rehasa ramojepe tata mbyte rupi, nderekaimo’ãi, ha pe tata rendy nanderapymo’ãi.
Ñande jaguerekógui ñande jerekuévo ku araícha heta techahare ojeroviaitéva, upévare jaipe’a ñandejehegui opaite mba’e ñandejopýva ha ñandejokoséva, ha avei pe angaipa ñanemoñuhãséva, ha ñañani paciéncia reheve pe carréra oñemoĩva ñane renonderãme. Umíva ningo mbovy ára ñandehavira hi’ã háichante ichupekuéra, kóva katu ñanerekombo’e ha ñandehavira ñande reko iporãve hag̃ua ha ñande reko ojoguave hag̃ua Hesu Crísto reko porãme. Añetehápe opaichagua jehavira jahasa asy aja, nañanembovy’amo’ãi, hasy uvei; upéi katu hi’a justícia ha py’aguapy, umi ojepokuaávape g̃uarã. Upévare pemombarete jevy pende jyva ikane’õva ha pene renypy’ã ikangýva. Pemyatyrõ pende rape ikarẽva, ani hag̃ua pende pykuéra ikaráu, tokuera uvei. Peñeha’ãke peiko hag̃ua py’aguapýpe opavave ndive ha peñemboheko porã, ko’ãva’ỹre avave ndohechamo’ãi Hesu Crístope, ha peñangareko porãke ani hag̃ua avave pende apytépe omboyke Ñanderuete mborayhu ni ijopói (Hesu Crísto) ha péva ojehúta peiko ramo py’arópe pende rapicha ndive, koichagua teko ningo penemongy’a ha penemyangekõi ha ováta heta hapicha rehe. Anítei oime pende apytépe peteĩ opoíva Ñanderuetégui, ojehu haguéicha Esau ndive; okaru porã hag̃uánte ha’e, ovende ta’ýra ypykue reko, (Génesis 25,31). Peikuaa voi ningo uperire, Esau ohupityse hague avei itúva jehovasa, itúva katu ombotove ichupe. Heta tesay reheve oheka itúva ohovasa peve ichupe avei; pe jehovasa iporãvéva katu oñeme’ẽmba jepéma, (Jacóbope). Peẽ napeñembojaiva’ekue pe cérro rehe (Israelguakuéraicha), ikatúva rehe ojepoko oĩháme tata hendýva, arai hũetéva, pytũmby ha yvytu jepoka. Ha napehendúi avei pe turu (trompéta) pu ni Ñanderuete ñe’ẽ. Upéramo Israelguakuéra ojerure asy anive hag̃ua Ha’e oñe’ẽ ichupekuéra. Ha ñama’ẽ Hesu rehe, Ha’e voi ñande jerovia apohare, hendive ñañepyrũ jajerovia ha hendive ñag̃uahẽ ñande jerovia ru’ãme. Hesu oha’ãrõ pe vy’a outavahína ichupe g̃uarã, upévare Ha’e ohasa asy ha omano ikurusúre otĩ’ỹre. Ha ko’ág̃a Ha’e oguapyhína Ñanderuete yke akatúape.
Upévare che hermanokuéra ahayhúva, peñembo’y hatãkena, pemỹi’ỹre (akatúape ni asúpe, Deuteronómio 28,14), pemba’apo katu kyre’ỹme pene rembiapópe, ha peikuaa porãke opaichagua tembiapo pejapóva guive Ñanderuetépe g̃uarã ndareiriha (ndojeitymo’ãiha tesaráipe).
Ñanderuete nome’ẽi ñandéve peteĩ Pytu Porãva ñanemokangýva, ome’ẽ uvei ñandéve peteĩ Pytu Porãva ipu’akáva, oporohayhúva ha iñarandúva.
Opaite pejapóva guive, pejapo pende py’aite guive pejapórõ guáicha Ñanderuetépe g̃uarã, ha ani yvyariguápente. Peikuaa porã voi Ñanderuete ome’ẽtaha peẽme pe yvága remime’ẽ (tekove opa’ỹva) pene rembiapo porã repykue ramo, upévare pemba’apo tembiguái porãva ramo Ñanderuetépe g̃uarã.
Oñembyai ramojepe che ro’o ha che py’a, Nde, che Ruete repytava’erã che mba’erepyetéva.
Upévare ningo ndaorepy’akangýi, omano ramojepe ohóvo ore kuimba’e oka peguáva, ore kuimba’e pypeguáva katu oñembopyahuve ohóvo ko’ẽ ko’ẽ rehe. Umi mba’e ore rohasavaroína ivevúi, rohasa asy ramojepe, roikuaágui uperire roguerekotaha hetave teko mimbipa ha vy’a añeteguáva. Ore noroma’ẽi umi mba’e ojehecháva rehe, umi ojehecha’ỹva rehe uvei; umi mba’e ojehecháva ndahi’aréi, umi mba’e ojehecha’ỹva katu oikotahína tapia g̃uarã.
Mborayhupype ndaipóri kyhyje, pe mborayhu oĩmbáva hekópe omosẽ uvei pe kyhyje, pe kyhyje oguerúgui jehasa asy; upévare upe okyhyjéva ne’ĩra gueteri oguereko mborayhu oĩmba heko peguáva.
Upévare ñamomba’eguasu Ñanderuetépe, Ha’e voi ñanemombareteiteve hag̃ua, ñande jajeruréva térã ñapensakuaávagui, ipu’aka rupi, ha omba’apóva ñandepype. Upéicharamo Hesu Crísto iglesiaygua tomomba’eguasu Ñanderuetépe Hesu Crísto rupi, ko ára atyguasúpe ha opaite ára atyguasurãme, péva he’ise tapia g̃uarã, taupéicha (amen).
Che ha’égui nde Ruete, nde Jára, Che rojapyhýma nde po akatúagui ha ha’e ndéve: Ani rekyhyje, Che roipytyvõta.
Pejerure ha oñeme’ẽva’erã peẽme; peheka ha pejohuva’erã; pembota ha ojepe’ava’erã peẽme. Upe ojerurévape oñeme’ẽva’erã; upe ohekáva ojohuva’erã; ha upe ombotávape ojepe’ava’erã (pe okẽ).
Aníke peiko umi hakate’ỹvaicha, oikóva pirapire rekávonte, pevy’a uvei peguerekomíva reheve; Ñanderuete voi he’i: Che ndapoimo’ãi araka’eve pendehegui ha araka’eve Che ndapohejamo’ãi tyre’ỹ ramo, (1 Timotéope 6,6; Josue 1,5).
Ñanderuete ñanemo’ã ha ñanemombaretéta jajejopy vai jave, Anítei peku’e, ha peikuaa Che ha’eha pende Ruete, tetãnguéra chemomba’eguasúta ha che poguýpe opytapa ko yvy ha opaite tetãnguéra. Ñanderuete, yvága atykuéra Jára, oĩ ñanendive, Jacóbo Jára ningo ñane mo’ãhára. Selah upévarupi ndajakyhyjeiva’erã, jepémo ko yvy ojeipa hendágui ha cerrokuéra ho’apa ramo yguasúpe.
Umi jepy’ara’ã pehupitýva ndaipohyietereíri, yvy arigua reheguánte, Ñanderuete ndohejamo’ãi ipohyieterei pegueropu’aka’ỹ hag̃uáicha, hendivénte voi oĩ pe pohã pegueropu’aka hag̃ua ha Ha’e ome’ẽta peteĩ tape peropu’akapa hag̃ua.
Py’aguapypópe aha’ãrõ Ñanderuetépe, ha Ha’e oñemboja cherehe ha ohendu che mba’ejerure asy. Nañomíri nde justícia che py’apýpe, aikuaauka uvei nde reko hekoitépe ha ne mborayhu. Nañomíri ne añetegua ni nde poriahuvereko, amyasãi uvei atyguasúpe. Che Ruete, anína rejoko chehegui nde poriahuvereko, nde poriahuvereko ha ne añetegua tapia toñangareko cherehe. Ojere cherehe mba’evaieta ojepapakuaave’ỹ meve, che rembiapo vaieta cherupitýma, ha ndaikatúi ajesaupi. Umía hetave che akã raguekuéragui, ha che py’a ndoiko porãvéi, ho’áma yvýre. Tahi’ãite ndéve chepytyvõmi hag̃ua, Nde, che Jaraite. Che Ruete, pya’emína eju chepytyvõ hag̃ua. Toñemotĩ ha tojesarea joaite peteĩcha umi ohekáva ohundi hag̃ua che rekove. Tokañy hapykue gotýo ha toñemotĩ opaite umi chehundiséva. Toñemotĩ ha toñemondyipa umi oñembohorýva cherehe, ha chehundiséva. Tovy’a ha tahory opaite umi nderekáva, ha opaite ojeroviáva guive nderehe te’i: Ñanderuete ningo ituichaiterei voi. Ajepy’apy ha ahasa asy ramojepe, (aikuaa porã) Ñanderuete oñangarekotaha cherehe. Nde voínte che pytyvõhára, Nde, che Ruete, eju pya’e chesalva hag̃ua che jejopy vaígui. Ha’e cherenohẽma pe yvykuágui, ahasa vai haguégui pe tuju karugua vaietégui; chepe’a ha emoĩ che pykuéra itaguasu ári chemboguata porã jevy hag̃ua. Ha upéi omoĩ che jurúpe peteĩ purahéi pyahu, amomba’eguasu hag̃ua che Ruetépe. Heta oĩta ohechátava ko’ã mba’e, okyhyjéta Ñanderuetégui ha ojeroviáta hese.
Ha ndaupévai año, javy’a katu jahasa asy ramojepe, jaikuaa porãgui pe jehasa asy hi’aha paciéncia, ha pe paciéncia ñanemokyre’ỹ jagueropu’akapa hag̃ua, ha jagueropu’akapa rire pe jepy’ara’ã, okakuaave ohóvo ñane esperánza,
Emoĩna Ñanderuete pópe nde rekove rape, Ha’e nemboguata porã hag̃ua; ha hesénte ejerovia, Ha’e oñangareko porã hag̃ua nderehe.
Ñanderuete nomoambuemo’ãi iñe’ẽ, ha opaite ñe’ẽ Ha’e oprometemava’ekue katuete oikóta avei pende rekovépe, Ha’e voi penerenóigui.
Ko’ã mba’e ko’ãva Che ha’éma peẽme che vy’a oĩ hag̃ua pendepype, ha penerenyhẽ hag̃ua vy’águi.
Peteĩ mitãkuimba’e onacéta ñandéve ko yvy apére, peteĩ ta’ýra oñeme’ẽta ñandéve, ha ijati’y ári oĩta mburuvicha pu’aka, ha oñembohérata ichupe: Mbojovakehára heko peguáva, Jára ipu’akapáva, Ipy’aguasúva, Túva tapia g̃uarãva ha Mburuvicha py’aguapy reheguáva. Hetã pu’aka ituichaiterei ha ipy’aguapy ndaijapyramo’ãi, Ha’e oguapýta David guapyhaguasu ári ha Ha’e oisãmbyhýta hetãme, oguenohẽvo oimeraẽvape tape porãme ha ombojovakéta hekoitépe, upe ára upéva guive opaite ára peve g̃uarã, yvága atykuéra Jára, ojapopáta ko’ã mba’e.