Juan 3 - Ñandeyara Ñe'ẽ

Jesús Nicodemo ndive

¹ Oĩ va'ekue peteĩ fariseo hérava Nicodemo, Israelita kuéra ruvicha peteĩva.

² Upe Nicodemo oho peteĩ pyharépe ohechávo Jesúspe, ha he'i ichupe: --Mbo'ehára, roikuaa niko Tupã Ñandejára ete voi ne mbou hague ore mbo'e haguã, ndaipórigui ikatúva ojapo ko'ã milagro nde rejapóva Tupã Ñandejára oĩ'ỹ ramo hendive.

³ Upérõ Jesús he'i ichupe: --Añetehápe ha'e ndéve, pe onace jevy pyahu'ỹva, ndaikatúi ohecha pe Tupã Ñandejára reino.

⁴ Nicodemo oporandu ichupe: --¿Mba'éicha piko peteĩ kuimba'e tuichapa rire onace jevy pyahúta? ¿Ikatu nga'u piko oike jevy isy retepýpe onace jevy haguã?

⁵ Ha Jesús he'i ichupe: --Añetehápe ha'e ndéve, pe onace'ỹva ý ha Espíritugui, ndaikatúi oike Tupã Ñandejára réinope.

⁶ Umi onacéva túva kuéra yvypóravagui niko yvypóra; umi onacéva Espíritugui katu espíritu.

⁷ Ani reñemondýi ha'e hague rehe ndéve: “Opavave tekotevẽ onace jevy pyahu.”

⁸ Pe yvytu niko oipeju oipejusehápe; rehendu pe hyapu, upéicharamo jepe ndereikuaái mamóguipa ou terã mamópa oho. Upéicha avei opa umi onacéva Espíritugui.

⁹ Upémaramo Nicodemo oporandu jevy Jesúspe: --¿Mba'éicha piko ikatu oiko upéva?

¹⁰ Jesús he'i ichupe: --Nde niko mbo'ehára herakuã guasúva Israélpe, ha ¿piko ndereikuaái ko'ã mba'e?

¹¹ Añetéko ha'e ndéve ore roñe'ẽha upe roikuaávagui, ha ro'eha peẽme upe rohecha va'ekue; upéicharamo jepe peẽ ndaperoviái ore ñe'ẽ.

¹² Perovia'ỹ ramo gueteri, añe'ẽ ramo jepe peẽme mba'e ko yvy arigua rehe, ¿piko mba'éicha peroviáta añe'ẽ ramo peẽme mba'e yvága pegua rehe?

¹³ ‘Avave ndojupíri yvágape, pe oguejy va'ekue upéguinte; pe kuimba'éicha ou va'ekue yvy ári pe yvága peguáva.

¹⁴ Ha Moisés omopu'ã haguéicha yvate pe mbói ra'anga desiértope, upéicha avei pe kuimba'éicha ou va'ekue yvy ári oñemopu'ã vaerã yvate,

¹⁵ opa umi hese ojeroviáva ani haguã oñehundi, oguerekónte haguã uvei pe tekove tapia guarãva.

Tupã Ñandejára mborayhu yvypóra kuéra peguarã

¹⁶ ‘Tupã Ñandejára ohayhu etereígui yvypóra kuérape, ome'ẽ va'ekue Ta'ýra peteĩete, opa umi hese ojeroviáva ani haguã oñehundi, oguereko haguã uvei pe tekove tapia guarã.

¹⁷ Tupã Ñandejára nomboúi Ta'ýrape yvy ári ocondena haguã yvypóra kuérape, ojesalvánte haguã uvei ha'e rupi.

¹⁸ ‘Pe ojeroviáva Tupã Ñandejára Ra'y rehe, noñecondenái; pe ojerovia'ỹva katu, oñecondenáma, ndojeroviái hague rehe pe Tupã Ñandejára Ra'y peteĩetéva rehe.

¹⁹ Umi ojerovia'ỹva oñecondena, pe tesapeha ou ramo jepe yvy ári ha'e kuéra oiporavógui pe pytũ pe tesapeha rangue, hembiapo vaígui.

²⁰ Opa umi ojapóva ivaíva ndohayhúi pe tesapeha, ha noñemo'aguĩséi pe tesapehágui ani haguã ojehecha pe hembiapo vaikue.

²¹ Pe añetegua ojapóva katu oñemo'aguĩ pe tesapehágui, ojehecha haguã Tupã Ñandejára oiha opa upe ha'e ojapóvape.

Juan Bautista oñemoñe'ẽ jevy Jesús rehe

²² Ko'ã mba'e rire Jesús oho hemimbo'e kuéra ndive Judéape ha opyta sapy'a upépe hendive kuéra ha oporobautiza.

²³ Juan oporobautiza avei upe jave Enónpe, Salim ypýpe, hetágui ý upépe; ha umi gente oguahẽ ha ojebautizauka.

²⁴ Ko'ã mba'e oiko Juan oñemondo mboyve cárcelpe.

²⁵ Upérõ oĩ Juan remimbo'e kuérava ojuavy va'ekue Israelita kuérava ndive pe ñemopotĩ ireligión kuéra rehegua rehe.

²⁶ Ha oho hikuái he'i Juánpe: --Mbo'ehára, ku oĩ va'ekue nendive Jordán ysyry mboypýri, ku nde reñe'ẽ porã hague oréve hese, ko'ãga oime oporobautiza ha ojehopa hapykuéri.

²⁷ Upérõ Juan he'i ichupe kuéra: --Pe máva ikatu oguereko pe Tupã Ñandejára ome'ẽ va'ekue ichupe mante.

²⁸ Peẽ voi che rendu va'ekue ha'e ramo che ndaha'eiha pe Cristo, peteĩ henonderã oñembou va'ekuénte.

²⁹ Mendahápe niko pe menarã pe hembirekorãva; ha pe menarã rayhupára oĩva upépe ha ohendúva ichupe, ovy'a ohendu ramo ichupe oñe'ẽ. Upéicha avei ko'ãga che avy'a.

³⁰ Ha'e niko oñembotuicha tuichave vaerã ohóvo, che katu añemomichĩ michĩve vaerã ahávo.

Pe yvágagui ou va'ekue

³¹ Pe ou va'ekue yvágagui, oĩ opavave ári. Pe yvy arigua katu yvypóra ha yvy arigua rehe oñe'ẽ. Pe yvágagui ou va'ekue katu oĩ opavave ári,

³² ha oñe'ẽ pe ohecha ha ohendu va'ekue rehe; upéicharamo jepe avave nohendúi ichupe.

³³ Oime ramo ohendúva ichupe, upéva omoañete pe Tupã Ñandejára he'íva;

³⁴ pe Tupã Ñandejára ombou va'ekue oñe'ẽgui pe Tupã Ñandejára ñe'ẽ teete voi, ha Tupã Ñandejára ome'ẽ va'ekue ichupe Ijespíritu takate'ỹ'ỹ rehe.

³⁵ Pe Túva ohayhu pe Ta'ýrape, ha opaite mba'e omoĩ va'ekue ipoguýpe.

³⁶ Pe ojeroviáva pe Ta'ýra rehe oguerekóma pe tekove tapia guarãva; pe ojeroviase'ỹva pe Ta'ýra rehe katu, ndoguereko mo'ãi upe tekove, ohupity vaerã uvei pe Tupã Ñandejára castigo ipohyietéva.