Juan 2 - Ñandeyara Ñe'ẽ

Menda Canáme

¹ Tres días uperire oiko casamiento Caná pueblo Galilea peguápe. Ha Jesús sy oĩ upépe upe jave,

² ha oñeconvida avei Jesús ha hemimbo'e kuéra.

³ Ha opa sapy'a pe vino oguereko va'ekue hikuái upe casamientorã, ha Jesús sy he'i ichupe: --Opáma ichugui kuéra vino.

⁴ Jesús katu he'i ichupe: --Kuñakarai, ¿mba'ére piko ere chéve upéva? Noguahẽi gueteri che hora.

⁵ Isy upérõ he'i umi tembijokuái upépe oĩvape: --Pejapókena opa pe ha'e he'íva peẽme.

⁶ Oĩ upépe seis itaguigua ý ryru Israelita kuéra oiporúmiva oñemopotĩ haguã ireligión kuérape ojejapo háicha. Ijáva peteĩ teĩme ochenta terã cien litros ý rupi.

⁷ Ha Jesús he'i umi tembijokuáipe: --Pemyanyhẽ ýgui umi ý ryru. Ha omyenyhẽte hikuái,

⁸ ha upéi Jesús he'i ichupe kuéra: --Ko'ãga penohẽ michĩmí ha peraha pe karuguasu rehe oñangarekóvape. Ha ojapo hikuái upéicha,

⁹ ha pe karuguasu rerekua oha'ã pe ý oiko va'ekue ichugui vino, oikuaa'ỹ rehe ha'e mamoguarépa upe vino, oikuaa ramo jepe umi tembijokuái, ko ha'e kuéra voi oguenohẽ va'ekue pe ý pe ý ryrúgui. Upéva rehe pe karuguasu rehe oñangarekóva ohenói pe menarãme,

¹⁰ ha he'i ichupe: --Opavave niko omoĩ pe vino iporãvéva pe karuguasu oñepyrũvo, ha umi oñeconvida va'ekue ho'u heta rire katu omoĩ pe ivaivéva. Nde katu reñongatu pe vino iporãvéva ko'ãga peve.

¹¹ Ko milagro ypykue rupi, Jesús ojapo va'ekue Caná Galilea peguápe, ohechauka iglória, ha hemimbo'e kuéra ojerovia hese.

¹² Kóva rire Jesús oho pe ciudad Capernaum héravape, ha omoirũ ichupe isy, tyvýra kuéra ha hemimbo'e kuéra; ha opyta hikuái upépe mbovy arami.

Jesús omosẽ tupaógui umi upépe oñemúvape

¹³ Hi'aguĩmagui pe Israelita kuéra arete guasu Pascua, Jesús oho Jerusalén ciudádpe.

¹⁴ Ha upépe ojuhu pe tupaópe umi oñemúvape hína guéi, ovecha ha pykasu rehe. Ambue kuéra katu oguapýva hína ocambia haguã plata umi upépe oguahẽvape.

¹⁵ Jesús ohechávo upéva ojapo peteĩ tukumbo joyvy ha omosẽmba pe tupaógui ichupe kuéra hymba ovecha ha guéi kuéra reheve. Ombojaparo umi plata ocambiáva mesa kuéra ha oitypa iplata kuéra yvýpe;

¹⁶ ha he'i umi pykasu rehe oñemúvape: --¡Peraha ko'ã mba'e ko'águi! Ha ani pejapo che Ru rógagui óga ñeñemuha.

¹⁷ Upérõ hemimbo'e kuéra imandu'a pe Tupã Ñandejára Kuatiañe'ẽ he'íva rehe: “Che mbyai pe che rakate'ỹngue nde róga rehe.”

¹⁸ Upérõ umi Israelita kuéra oporandu ichupe: --¿Mba'e milágropa rehechaukáta oréve roikuaa haguã ijaha ndéve rejapo haguã ko'ã mba'e?

¹⁹ Jesús he'i ichupe kuéra: --Pembyai ko tupao, ha mbohapy arahápe che amopu'ã jevy pyahúne.

²⁰ Upérõ umi Israelita he'i ichupe: --Cuarenta ý seis años hi'are va'ekue oñemopu'ã haguã ko tupao; ha ¿piko nga'u nde mbohapy arahápe remopu'ãta?

²¹ Pe tupao Jesús oñe'ẽ hague niko heténte.

²² Upéva rehe Jesús oikove jevy ramo omano va'ekue apytégui, hemimbo'e kuéra imandu'a ko he'i va'ekue rehe ha oguerovia pe Tupã Ñandejára Kuatiañe'ẽ ha umi ñe'ẽ Jesús he'i va'ekue ichupe kuéra.

Jesús oikuaa opavavépe

²³ Jesús oĩ ramo Jerusalénpe pe Pascua arete jave, heta oĩ ojerovia va'ekue hese ohechávo umi milagro ha'e ojapóva.

²⁴ Jesús katu ndojeroviái hese kuéra oikuaágui opavavépe.

²⁵ Noikotevẽi avave he'i ichupe mba'eichaguápa umi gente, ha'e voi oikuaágui pe yvypóra py'apýpe oĩva.