Filemónpe 1 - Ñandeyara Ñe'ẽ

Apóstol Pablo kuatia ñe'ẽ Filemón peguarã

¹ Che, Pablo, aiméva aína preso Cristo Jesús rayhupápe, ñande ryvy Timoteo ndive, ajapo ko kuatiañe'ẽ Filemón, ore mba'apo irũ rohayhuetéva,

² ha ore reindy Apia rohayhuetéva peguarã, ha Arquípo ore ñeha'ã irũme, ha pe iglésia nde rógape oñembyatývape.

³ Tupã Ñandejára ñande Ru, ha Ñandejára Jesucristo, ta pende rovasa ha tome'ẽ peẽme py'aguapy.

Pe Filemón mborayhu ha pe ijerovia

⁴ Ame'ẽ tapia las gracias Tupã Ñandejárape, che mandu'ávo nde rene che ñembo'épe,

⁵ ahendu rehe rejeroviaha Ñandejára Jesús rehe ha rehayhuha opavave umi imba'éva kuérape.

⁶ Ajerure Tupã Ñandejárape, umi nde rupi ogueroviáva toikuaa porãve umi mba'e porãita jarekóva Cristo Jesús rupi.

⁷ Rovy'a eterei ha ore kyre'ỹ ne mborayhu rupi, che ryvy, nde rupi niko umi Jesús rehe ojeroviáva ipy'apytu'u.

Pablo imba'e jerure Onésimo peguarã rehe

⁸ Upéva rehe, ija ramo jepe chéve, Cristo apóstol pype che, ha'e haguã ndéve pe rejapo vaerã,

⁹ ajerureseve uvei ndéve mborayhu rupi, che Pablo niko che tujáma ha ko'ãga aiméva aína preso Cristo Jesús rayhupápe.

¹⁰ Che mba'e jerure ndéve Onésimo peguarã, ha'e niko ou va'ekue oiko chéve che ra'ýicha ko'a cárcelpe.

¹¹ Ymave niko Onésimo tembiguái mba'everã va'ekue ndéve, ko'ãga katu jevaleha ndéve ha chéve avei.

¹² Amondo jevy niko ndéve, emoguahẽkena, chevete voi ramoguáicha.

¹³ Che aipota vaerã mo'ã opyta chendive, oñangareko haguã che rehe nde rekovia aime aja preso evangelio rehe.

¹⁴ Opáichavo ndajaposéi mba'eve ha'e'ỹ rehe ndéve, ndaipotáigui pe rejapóva oiko mbaretépe, nde reipotáguinte uvei.

¹⁵ Ikatu niko kovarãnte ra'e ojei nde hegui sapy'ami, ko'ãga opyta haguã nendive tapia guarã,

¹⁶ ha na tembiguaivéima ramo, tembiguái ramo rangue nde ryvy rehayhúva ramo uvei. Che niko ahayhu Onésimope, opáichavo, nde oime vaerã rehayhueteve reína ichupe, ndaha'éi katuete nde rapicha kuimba'e hague rehe ñande ryvyha rehe avei Ñandejára rupi.

¹⁷ Upéva rehe, che rereko ramo ne irũ ramo, omoguahẽ ichupe cheveichaite.

¹⁸ Oime ramo hembiapo vai hague ndéve, terã oime ramo ombyekovia vaerã ndéve, emoĩ che rérape.

¹⁹ Che, Pablo, amoĩ ko kuatia rehe ko ñe'ẽ che po rupi ete voi, che ambuekoviáta ndéve ikatu ramo jepe romomandu'a ndéve voi rembyekovia va'erãha chéve nde jehe voi.

²⁰ Néikena che ryvy, che rendumi ojoryvyha rehe ñande Ñandejára rupi, emombytu'umi che corazõ Cristo rayhupápe.

²¹ Amoĩ niko kuatia rehe ndéve jeroviapópe, aikuaa porãgui rejapotaha katuete ko che rembipota, ha rejapovetaha avei ko che ajerurévagui ndéve.

²² Ha upéi embosako'i avei chéve che rendaguã, aha'arõite niko Tupã Ñandejára che mondóne haguã pohechávo ohendu rupi pene ñembo'e.

Ñemomaitei ipaha pegua

²³ Ñemomaiteiuka Epafras, che irũ cárcelpe Cristo Jesús rayhupápe,

²⁴ ha Marcos, Aristarco, Demas ha Lucas, che mba'apo irũ kuéra.

²⁵ Ñandejára Jesucristo gracia toĩ pene corazõme. Amén.