1 Juan 3 - Ñandeyara Ñe'ẽ

Tupã Ñandejára ra'y kuéra

¹ Pema'ẽna mba'eichaitépa ñande rayhu Tupã ñande Ru ñane mbohéra haguã Tupã Ñandejára ra'y, ha ñande ha'e. Upéva rehe, yvypóra kuéra na ñande kuaái, ndoikuaáigui Tupã Ñandejárape.

² Che ryvy kuéra ahayhuetéva, ko'ãga voi ñande Tupã Ñandejára ra'ýma, ha ndojehechaukái gueteri mba'e va'erãpa gueteri ñande. Opáichavo, jaikuaa Jesucristo ojehechauka ha'ára ha'eichataha ñande jahecháta rehe ichupe ha'e ha'e haichaite.

³ Ha opa umi kóva oha'arõva ojerereko potĩ, pe ha'e ipotĩ háicha.

⁴ Opa umi opecáva katu na iñe'ẽrendúi Tupã Ñandejára léype, pecado he'ise ñe'ẽrendu'ỹ pe léype.

⁵ Peikuaáma háicha, Jesucristo ou hague oipe'a haguã ñande pecado, ha ha'e ndoguerekói ojehe mba'eveichagua pecado.

⁶ Upéicha avei opa upe oikóva peteĩ py'ápe hendive, ndopecáiri, umi opecáva katu, ndohechái ha ndoikuaái ichupe.

⁷ Che ra'y kuéra, ani peñembotavyka, upe ojapóva pe hekoite pegua heko potĩ Jesucrístoicha.

⁸ Pe oikóva opeca katu Aña mba'e, Aña opecágui iñepyrũmby guive. Pe Tupã Ñandejára Ra'y ou va'ekue ombyai haguã voi pe Aña rembiapokue.

⁹ Opa umi Tupã Ñandejára ra'ýva ndopecái, pe Tupã Ñandejára reko rehegua oĩgui ipype kuéra, ha ndaikatúi oiko opeca, Tupã Ñandejára ra'ýgui ha'e kuéra.

¹⁰ Upéicha ojekuaa mávapa umi Tupã Ñandejára ra'ýva ha mávapa umi Aña ra'ýva, opa umi ndojapóĩva pe hekopeteguáva terã ndohayhúiva iñehermánope ndaha'éi Tupã Ñandejára ra'y.

Jajohayhúkena

¹¹ Pe ñe'ẽ peẽ pehendu va'ekue iñepyrũha guive niko kóva: ta jajohayhu.

¹² Ha ani Caíncha, Aña mba'e va'ekue ha'e ha ojuka tyvýrape. ¿Ha mba'e rehe piko ojuka? Caín rembiapokue ivaígui, ha tyvýra rembiapokue iporãgui.

¹³ Che ryvy kuéra, ani pehecharamo yvypóra kuéra nda ija'éi ramo pende rehe.

¹⁴ Ñande jaikuaa jahasáma hague manógui pe tekovetépe jahayhu rehe ñane hermano kuérape. Pe ohayhu'ỹva iñehermano omano gueteri.

¹⁵ Oimeraẽva ija'e'ỹva iñehermano rehe, porojukahára ha peẽ peikuaa pe porojukahára ndoguerekoiha pe tekove tapia guarãva ipype.

¹⁶ Jaikuaa mba'épa pe mborayhu Jesucristo ome'ẽ pype hekove ñande rehe ha upéicha avei ñande ñame'ẽ vaerã ñande rekove ñane hermano kuéra rehe.

¹⁷ Pe oguerekóva upe hekotevẽrã ha ohecháva pe iñehermano ndoguerekoiha, ha ndoiporiahuverekóiri ichupe, ¿mba'éichapa ikatúne he'i pe Tupã Ñandejára mborayhu oiha ipype?

¹⁸ Che ra'y kuéra, japorohayhu vaerã ndaha'éi ñande jurúpente jahechauka vaerã uvei pe ñane mborayhu iñañeteha ñane rembiapokue rupi.

Jerovia Tupã Ñandejára rehe

¹⁹ Kóva rehe ikatu jaikuaa pe añete reheguaha ñande, ha ñande py'aguapy vaerã Tupã Ñandejára renondépe;

²⁰ pe ñande py'apy oñanduka ramo ñandéve oimeraẽva mba'e, Tupã Ñandejára tuichave mba'e pe ñande py'apýgui ha oikuaapa opa mba'e.

²¹ Upéicha rupi, che ryvy kuéra pohayhuetéva, ñande py'apy noñandukái ramo ñandéve mba'eve jajeroviakuaa Tupã Ñandejára rehe;

²² ha ome'ẽ vaerã ñandéve upe jajeruréva ichupe, jajapógui hembiapoukapy kuéra ha umi mba'e ichupe ombovy'áva.

²³ Ha upe hembiapoukapy niko kóva; ta jajerovia Ta'ýra Jesucristo rehe, ha ta jajohayhu ha'e ojerure haguéicha ñandéve.

²⁴ Pe ojapóva Tupã Ñandejára rembiapoukapy, oĩ Tupã Ñandejára ndive, ha Tupã Ñandejára oĩ ipype, ha jaikuaa Tupã Ñandejára oiha ñande pype pe Espíritu ome'ẽ va'ekue ñandéve rupi.