1 Juan 1 - Ñandeyara Ñe'ẽ

Pe tekovete rehegua ñe'ẽ

¹ Romoĩ peẽme kuatia rehe pe tekovete rehegua ñe'ẽ, oikóma va'ekue voi opa mba'e oñepyrũ ramo guare guive. Rohendu va'ekue, ha rohecha va'ekue ore resa teete rupi voi; romaña va'ekue hese, ha ropoko va'ekue hese.

² Upe tekovete ojehechauka va'ekue ha ore rohecha va'ekue, ha péina romombe'u roikuaauka haguã peẽme ko tekovete tapiaguáva, oĩ va'ekue Túva ndive ha ojehechauka va'ekue oréve.

³ Roikuaauka peẽme upe rohecha ha rohendu va'ekue, peẽ peime haguã avei orendive, pe ore roime háicha añetete Tupã Ñandejárape Túva ha Ta'ýra Jesucristo ndive.

⁴ Romoĩ peẽme kuatia rehe ko'ã mba'e pene renyhẽ haguã vy'águi.

Tupã Ñandejára niko tesapehára

⁵ Kóva hína pe ñe'ẽ Jesucristo ore mbo'e va'ekue ha roikuaaukáva peẽme: Tupã Ñandejára tesapeharaha, ha ndaiporiha mba'eveichagua pytũ ipype.

⁶ Ja'e ramo ñaimeha hendive ha jaiko ave pytũnguýpe, ñande japu upe ja'éva ha jajapóvape.

⁷ Jaiko ramo tesapeha rendýpe katu, pe Tupã Ñandejára oĩ háicha tesape rendýpe, upéicharamo ñaime oñondive kuéra peteĩ py'ápe ha Ta'ýra Jesucristo ruguy ñane mopotĩ opa ñande pecádogui.

⁸ Ja'e ramo ndajarekoiha pecado ñañembotavy ñande jupe voi, ha ndaja'éi pe añetegua.

⁹ Ñamombe'u ramo Tupã Ñandejárape ñande pecado kuéra katu, ha'e ifiel ha ijusto operdona haguã ñande pecado kuéra ha ñane mopotĩ haguã opaite ñane rembiapo vaikuégui.

¹⁰ Ja'e ramo ndajapecái hague katu ñambojapu Tupã Ñandejárape, ha iñe'ẽ noĩri ñande pype.