Ñemohenda
109 Umi versíkulo bíblico jajapo hag̃ua umi devosión
Añetehápe, káda día iñimportanteterei reme’ẽmi tiempo Ñandejára Ñe’ẽme. Upépe retopáta opa mba’e reikotevẽva, nde ánga pytyvõhara ha arandu opa mba’e ijetu’úvape guarã.
Remoñe’ẽramo Ñandejára Ñe’ẽme káda pyhareve, ndaha’éi añónte nepytyvõta nekangy hag̃ua Ñandejárandi, ikatúta avei remombarete hapichakuérape opa mba’e porã Ñandejára ome’ẽva ndéve reheve.
Epyta’imi sapy’ami rehechase Espíritu Santo ñe’ẽ Ñandejára Ñe’ẽ rupive, ha recháta mba’éichapa nde rekove okambia katuete iporãve gotyo.
Ndejeheguiete rejapose’ỹta rejapo hag̃ua opa mba’e ha reñepyrũta reikove Ñandejára oipotaháicha, revy’ávo Ijatyty porãite ndive.
Ko’ág̃a katu jajeráma Moises rembiapoukapykuéragui, ñandeguerekova’ekue ipoguýpe, jaiko hag̃ua kyre’ỹme Pytu Porãmbáva rembiguái ramo ha ndaha’evéima tembiapoukapy tujakuéra poguýpe.
Ani rekyhyje, Che voi aĩgui nendive, aníke nde py’akangy, che ha’égui nde Jára, nemombaretéva, tapiaite roipytyvõta, ha añangarekóta nderehe che pu’aka rupive.
Ñanderuete katu ohechaukáma imborayhu ñandéve, Hesu Crísto omanóvo ñanderehehápe, ñande jaiko ramojepe angaipa (Aña) poguýpe.
Upéicharamo opavave ñande, ahoja’ỹre ñama’ẽ Hesu Crísto reko jajaipa rehe espéjope ramoguáicha ha ñañemoambueve jahávo Hesu Crísto reko ojajaipávape, péva katu Ñanderuete rembiapo.
Ñanderuete voi omokãta tetãyguakuéra resay. Ha pe ñemano ndaiporimo’ãvéi, pe jejahe’o soro omanóva rehe ha mba’asykuéra opava’erã; umi mba’e tenondeguare ndaiporivéima, (ohasapáguima).
Ejeroviáke nde py’aite guive Ñanderuete rehe, ha ani rejejoko ne arandu rehe.
Nemandu’áke hese opaite nde rape rehe, ha Ha’e omyesakãta ne raperã.
Evy’aite Ñanderuete ndive, Ha’e tome’ẽ ndéve nde py’apy ojeruréva.
Ñanderuete oipytyvõ ha oguenohẽ ichupekuéra ijejopy vaígui, ha’ekuéra ojerovia haguére hese.
Emoĩna Ñanderuete pópe nde rekove rape, Ha’e nemboguata porã hag̃ua; ha hesénte ejerovia, Ha’e oñangareko porã hag̃ua nderehe.
Nde justícia katu omimbi kuarahýicha ha nde reko potĩ ku ára asaje pytéicha.
Anítei peku’e, ha peikuaa Che ha’eha pende Ruete, tetãnguéra chemomba’eguasúta ha che poguýpe opytapa ko yvy ha opaite tetãnguéra.
Añetehápe Ha’e ogueraha ñane mba’asykuéra, ha ohasa avei ñane rembiasa asy; ñande katu ñaimo’ã Ñanderuete omboyke, ohavira ha omotĩndy hague ichupe, (Hesu Crísto).
pembyaty uvei pirapireita yvágape, kupi’i ha ao raso ombyai’ỹ hag̃uáme, ha mondahakuéra omonda’ỹ hag̃uáme.
Che pensamientokuéra ndaha’éi pene pensamiéntoicha ha pende rapekuéra ndaha’éi ku che rapéicha, he’i pende Ruete.
Ñanderuete voi ningo chemombaretéva ha Ha’e oñangareko porã cherehe, che py’apýpe ajerovia hese, upévagui ahupity iñepytyvõ, ha vy’apópe che ñe’ã opurahéi, omomba’eguasu hag̃ua ichupe.
Anítei pejepy’apy mba’eve rehe, pemombe’u uvei opaite mba’e pene ñembo’e rupi Ñanderuetépe, pembohasa ichupe g̃uarã pene rembijerure pene agradecimiénto reheve.
Ha Ñanderuete py’aguapy, ituichaitevéva opaite yvyarigua arandúgui, ha ko py’aguapy kóva oñangarekóta pene remiandu ha pene pensamientokuéra rehe Hesu Cristopype.
Hesu Crísto ára og̃uahẽta ku mondaháicha, ha upe ára upévape yvagakuéra ohasapáta tyapu sununu ryapu ndetuichaitévape, ha umi mba’e imichĩetevéva (eleméntos) jepe oñehundiva’erã tata rendýpe ha opaite mba’e oĩva guive ko múndope okaipava’erã.
Pe Pytu Porãmbáva katu hi’a: Mborayhu añeteguáva, tory, py’aguapy, paciéncia, oporombohorýva, py’aporã, jerovia,
ñemomirĩ, jejokokuaa. Moises rembiapoukapykuéra katu noñemoĩri ko’ã Pytu Porãmbáva’a rehe.
Upévare umi oikuaáva nde réra ojerovia nderehe, Nde, ore Ruete, nderepoírigui umi nderekávagui.
Emoĩna Ñanderuete pópe nde rekove rape, Ha’e nemboguata porã hag̃ua; ha hesénte ejerovia, Ha’e oñangareko porã hag̃ua nderehe.
Jaikuaa porã ningo opaite mba’e ojehúva guive Ñanderuete ra’y ha itajyrakuéra rekovépe, oipytyvõ porãtaha ichupekuéra (oñemboheko porãmive hag̃ua ohóvo), umi Ha’e ohenóimavape yma guive ita’ýra ha itajýra ramo.
Umi ojeroviáva Ñanderuete rehe katu oñemombarete jevýta, oveve yvateva’erã ku ñapykanícha, oñaniva’erã hikuái ha ndaijuku’amo’ãi, ha oguata pukuva’erã hikuái ha naikane’õmo’ãi.
Ñande jaguerekógui ñande jerekuévo ku araícha heta techahare ojeroviaitéva, upévare jaipe’a ñandejehegui opaite mba’e ñandejopýva ha ñandejokoséva, ha avei pe angaipa ñanemoñuhãséva, ha ñañani paciéncia reheve pe carréra oñemoĩva ñane renonderãme.
Umíva ningo mbovy ára ñandehavira hi’ã háichante ichupekuéra, kóva katu ñanerekombo’e ha ñandehavira ñande reko iporãve hag̃ua ha ñande reko ojoguave hag̃ua Hesu Crísto reko porãme.
Añetehápe opaichagua jehavira jahasa asy aja, nañanembovy’amo’ãi, hasy uvei; upéi katu hi’a justícia ha py’aguapy, umi ojepokuaávape g̃uarã.
Upévare pemombarete jevy pende jyva ikane’õva ha pene renypy’ã ikangýva.
Pemyatyrõ pende rape ikarẽva, ani hag̃ua pende pykuéra ikaráu, tokuera uvei.
Peñeha’ãke peiko hag̃ua py’aguapýpe opavave ndive ha peñemboheko porã, ko’ãva’ỹre avave ndohechamo’ãi Hesu Crístope,
ha peñangareko porãke ani hag̃ua avave pende apytépe omboyke Ñanderuete mborayhu ni ijopói (Hesu Crísto) ha péva ojehúta peiko ramo py’arópe pende rapicha ndive, koichagua teko ningo penemongy’a ha penemyangekõi ha ováta heta hapicha rehe.
Anítei oime pende apytépe peteĩ opoíva Ñanderuetégui, ojehu haguéicha Esau ndive; okaru porã hag̃uánte ha’e, ovende ta’ýra ypykue reko, (Génesis 25,31).
Peikuaa voi ningo uperire, Esau ohupityse hague avei itúva jehovasa, itúva katu ombotove ichupe. Heta tesay reheve oheka itúva ohovasa peve ichupe avei; pe jehovasa iporãvéva katu oñeme’ẽmba jepéma, (Jacóbope).
Peẽ napeñembojaiva’ekue pe cérro rehe (Israelguakuéraicha), ikatúva rehe ojepoko oĩháme tata hendýva, arai hũetéva, pytũmby ha yvytu jepoka.
Ha napehendúi avei pe turu (trompéta) pu ni Ñanderuete ñe’ẽ. Upéramo Israelguakuéra ojerure asy anive hag̃ua Ha’e oñe’ẽ ichupekuéra.
Ha ñama’ẽ Hesu rehe, Ha’e voi ñande jerovia apohare, hendive ñañepyrũ jajerovia ha hendive ñag̃uahẽ ñande jerovia ru’ãme. Hesu oha’ãrõ pe vy’a outavahína ichupe g̃uarã, upévare Ha’e ohasa asy ha omano ikurusúre otĩ’ỹre. Ha ko’ág̃a Ha’e oguapyhína Ñanderuete yke akatúape.
Peju che rendápe opaite peẽ peñeha’ãmbáva pehupity hag̃ua pe tekove tapia g̃uarãva, ha ani peẽ voi peñeha’ã reive pepoi hag̃ua pene angaipa cárga pendejopývagui. Chémante ikatu pomombytu’u porã.
Peñemoĩ che cangálla guýpe (yúgo guýpe) ha peheja Che tapohekombo’e porã, chepy’a porãgui ha che añemomirĩgui, péichamante pejohúta pe pytu’u añeteguáva pene ángape g̃uarã.
Ndépa ha’ehína pe Crísto ouva’erãva térãpa roha’ãrõta gueteri ambuépe.
Che cangálla ningo hu’ũ asy ha ivevúi pe cárga aguerahaukáva peẽme.
Upévare upe oikóva Hesu Cristopype oñemoingo pyahúma, oñemboheko ambuéma (nacimiénto pyahu), pe teko tuja opáma (pe teko tuja nomandavéima hekovépe). Peikuaa porãke, pe teko pyahu oñepyrũma hague.
Umi ñe’ẽ he’íva guive che juru ha heñóiva che py’apýpe tahorýkena ne renondépe, che Ruete, Nde voi chemo’ã ha chesalváva.
Ñanderuete réra katu peteĩ óga yvate oñemombarete porãva; hendápe oñaniva’erã pe heko potĩva ojesalva hag̃ua.
Upévare che hermanokuéra, che ajerure asy peẽme, Ñanderuete poriahuvereko rehe, peme’ẽmba pende rekove Ñanderuetépe g̃uarã peteĩ kuave’ẽmby oikovévaicha, ipotĩva ha ombohorýva ichupe, kóva ningo pe cúlto añeteguáva ñame’ẽkuaáva Ñanderuetépe.
Pejohayhu oñohermánoicha, pejo’apo mba’e ramo, péva he’ise emomba’eve ne hermánope ndejehegui voi.
Ani peneate’ỹ pene rembiapópe, peñemokyre’ỹ katu pende pytu porãme, ha pejapopa Hesu Crísto he’íva guive peẽme.
Peha’ãrõ vy’apópe ani penekangy ou ramo pe jepy’ara’ã, peropu’akakuaákena, peñembo’epeína uvei.
Peipytyvõ hermanokuérape hemikotevẽme, peporombohupa porãkena.
Pehovasa umi ndaija’éiva penderehe, pehovasa ha ani pemaldeci.
Pevy’a umi ovy’áva ndive, ha pejahe’o umi ojahe’óva ndive.
Peiko peteĩ py’ápe oñondive; ani peñembotuicha, peñemomirĩ uvei; ani pejeguereko iñarandúva ramo.
Ani pemyengovia avavépe ivaíva ivaívare, peñeha’ãmba katu pejapo hag̃ua mba’e iporãva opavavépe g̃uarã.
Peñeha’ãmbáke, ijáva guive peẽme, peiko hag̃ua py’aguapýpe opavave ndive.
Che hermanokuéra pohayhúva, ani peñevenga peẽ voi pende rapicha rehe, pemoĩmba katu Ñanderuete pópe. Ojehai voi Ñanderuete kuatiañe’ẽme: Che avengáta ha amyengoviáta opavave rembiapo vaikue, (Deuteronómio 32,35).
Ha anítei pende reko ojogua kuimba’e térã kuña ko’ag̃agua rekópe, upéva rãngue peheja pende reko oñemoambue hag̃ua ohóvo (Pytu Porãmbáva rupi) pende py’apy rembipotapype, peikuaa hag̃ua Ñanderuete rembipota iporãha, hekópe ha oporombohorýva.
Ñanderuete hi’ag̃ui umi ohasa asývagui, ha oipytyvõ umi oñembyasývape ojapo vai haguére.
Upévare ñamomba’eguasu Ñanderuetépe, Ha’e voi ñanemombareteiteve hag̃ua, ñande jajeruréva térã ñapensakuaávagui, ipu’aka rupi, ha omba’apóva ñandepype.
Péicha tohesape avei pende resape pende rapichakuéra apytépe, ohecha hag̃ua hikuái pene rembiapo porã ha omomba’eguasu hag̃ua pende Ruetépe oĩva yvagakuérape.
Pekaru ramo térã pey’u ramo, térã pejapo ramo ambue mba’e, pejapopa pemomba’eguasu hag̃ua Ñanderuetépe.
Jerovia ningo he’ise jahupitytaha katuete umi mba’e ñaha’ãrõvañaína, ha he’ise avei ndajahechái ramojepe mba’eve, nañandepy’a mokõiri, jaikuaa porãgui (umi mba’e Ha’e oprometemava’ekue, katuete oikotaha avei).
Upe oikóva pe Jára Ijyvatetéva ãme ha pe Ipu’akapáva poguýpe,
Ndéve ndojehumo’ãi mba’evaietéva, ha mba’asy iñasãiva ndojamo’ãi nde róga rehe.
Ñanderuete he’íta hi’angelkuérape oñangareko hag̃ua opaite nde raperã rehe.
Hi’angelkuéra ndererahava’erã ipopekuéra ani hag̃ua ita rehe reñepysãnga.
Nde rehasa ramo jepe leõ ha mbói ári, nde rehundipáta ichupekuéra.
Ñanderuete voi ningo he’i: Ha’e ojejoko hatãgui cherehe, Che aguenohẽta ichupe ijejopy vaígui, ha Che añangarekóta hese ha’e oikuaágui che réra.
Ha’e ohenói ramo che réra Che ambohováita ichupe, Che aĩta hendive ijepy’apyha árape, aguenohẽ hag̃ua ichupe ijejopy vaígui ha upéi Che ambotuicháta ichupe.
Ambopukúta hekove, ha ahechaukáta ichupe che pu’aka (ha ha’e oikóta chendive tapia guarã).
he’ikuaa Ñanderuetépe: Nde, che Ruete, ne rendápe akañykuaa ha Nde che mo’ãha, Nde, che Ruete, nderehe ajerovia.
Pe esperánza Ñanderuete ome’ẽva tomyenyhẽ pende jerovia, vy’águi ha py’aguapýgui, ha pende esperánza tokakuaave ohóvo Pytu Porãmbáva pu’aka rupi.
Che romomba’eguasu Nde cheapo porãitégui, ne rembiapokuéra mba’e techapyrãva, ha che ánga oikuaa porã voi ko’ã mba’e.
Aníkena ñanekane’õ jajapo hag̃ua ñane rembiapo iporãva, hi’árape ñamono’õva’erã, katuete nañaneate’ỹi ramo.
Ñanderuete mborayhu rupi peẽ pejesalva ha pejerovia Hesu Crísto rehe ndaha’éi katu pendejehegui, Ñanderuete me’ẽmby rupínte.
Ndaha’éi yvyarigua rembiapo porã rupi, ani hag̃ua avave oñembotuicha.
Opaite pejapóva guive, pejapo pende py’aite guive pejapórõ guáicha Ñanderuetépe g̃uarã, ha ani yvyariguápente.
Peikuaa porã voi Ñanderuete ome’ẽtaha peẽme pe yvága remime’ẽ (tekove opa’ỹva) pene rembiapo porã repykue ramo, upévare pemba’apo tembiguái porãva ramo Ñanderuetépe g̃uarã.
ha pende Ruete pomboguatáta opaite árape ha penemohyg̃uatã porãta pende yvy ikangy ramojepe ha Ha’e omombaretéta pende rete ha pejoguaitéta ku ka’avoty oñembohykuévape meme árape, ha yvu hi’y hetávape, ndahypáiva araka’eve.
Ñanderuete nome’ẽi ñandéve peteĩ Pytu Porãva ñanemokangýva, ome’ẽ uvei ñandéve peteĩ Pytu Porãva ipu’akáva, oporohayhúva ha iñarandúva.
Che ánga omomba’eguasu Ñanderuetépe, che py’aite guive amboete héra porãite.
Nomyengoviái ñandéve ñane rembiapo vai ojerure háicha, ha ndohepyme’ẽi ñandéve ñane ñañangue ojerure háicha.
Umi yvága ijyvate háicha ko yvy árigui, peichaite iporiahuvereko ituicha umi ichugui okyhyjévape g̃uarã.
Kuarahyresẽ imombyry háicha kuarahyreikégui, péicha Ha’e omomombyry ñandehegui ñande reko ñaña rembiapo vai.
Pe túva oiporiahuvereko háicha ita’yrakuérape, péicha Ñanderuete oiporiahuvereko umi ichugui okyhyjévape.
Ha’e oikuaa voi mba’eichaguaitépa hína ñande, ha oikuaa porã voi ñande yvy timbonteha.
Kuimba’e ha kuñakuéra arakuéra ha’ete ku ñanáicha, ha ipoty ku yvoty ñu rupiguáicha.
Oipeju hatã ramo pe yvytu opa reíta pe yvoty, ha hendague jepe ndojekuaavéima.
Ñanderuete mborayhu katu oĩ peteĩ ára atyguasu guive ambue ára atyguasu peve umi okyhyjéva ichugui ndive, ha ijustícia opyta iñemoñarenguéra peve,
umi ojapóva guivénte iñe’ẽme’ẽ, ha umi imandu’áva hembiapoukapy rehe ojapo hag̃ua hekoitépe.
Ñanderuete omohenda hatã iguapyhaguasu yvágape ha imburuvicha pu’aka oisãmbyhy opaite mba’e ojapóva guive.
Emomba’eguasu nde, che ánga, che Ruetépe, ha ani nderesarái imba’e porãitégui.
Pemomba’eguasu Ñanderuetépe, peẽ angelkuéra imba’éva guive, peẽ pendepy’aguasu mbaretéva ha pejapóva guive iñe’ẽ, peẽ peneñe’ẽrendu porã hembiapoukapy he’ívape.
Pemboete Ñanderuetépe, mayma peẽ ángel atykuéra, peẽ mburuvichakuéra ha peẽ pejapóva guive hekoitépe hembipota.
Pemomba’eguasu Ñanderuetépe, hembiapokue guive, opaite tenda rupi Ha’e oisãmbyhýva. Emboete, che ánga, Ñanderuetépe.
Ha’e omopotĩ ne rembiapo vai, Ha’e omonguerapa ne mba’asykuéra.
Ha’e oguenoh… nde rekove ñemanógui, Ha’e neñu’ã imborayhu ha iporiahuverekópe.
Ha’e omyenyhẽ nde rekove mba’eporãgui ha Ha’e nemomitã jevy ku ñapykanícha.
Ñamombe’úrõ ñane rembiapo vaikue Ñanderuetépe, Ha’e ipy’aporã ha heko porãgui operdona ñane rembiapo vaikue ha ñanemopotĩ opaichagua mba’e heko pegua’ỹvagui.
Ko’ág̃a ñande jajerereko heko potĩva ramo jajeroviágui Hesu Crísto rehe, ha ñande py’aguapýma Ñanderuete ndive Ñandejára Hesu Crísto rupi.
Hiérrope oñehãimbe’e hiérro, ha péicha avei yvyariguakuéra oñohekombo’e oñomongeta porã hag̃ua.
Ag̃uiete oĩ Ñanderuete mayma ohenóiva guive ichupe, umi ohenóiva jeroviapópe ichupe.
Pejapo opaite mba’e peñe’ẽngururu’ỹre ha pejepy’apy’ỹre,
peiko hag̃ua Ñanderuete ra’y ha itajýra añeteguáva ramo ha avave anítei ojohu mba’evai pende rekovépe, oñe’ẽvai hag̃ua penderehe, peiko uvei heko potĩva ramo peikove ramojepe tekove vai ha iñañáva apytépe, pemimbi ha pehesape hag̃ua ko yvy apére ku jasytata omimbi háicha ára rehe.
Rehasa ramojepe hi’y hetaite rupi, Che aĩta nendive, ha ysyry ndetuicháva nderupity ramojepe nanembojahogamo’ãi. Rehasa ramojepe tata mbyte rupi, nderekaimo’ãi, ha pe tata rendy nanderapymo’ãi.
Ani pembyaty pirapireita ko yvy ári, kupi’i ha ao raso ombyai hag̃uáme, ha mondahakuéra omonda hag̃uáme,
Reme’ẽ jave pirapire imboriahúvape ani rembopuka turu, ne renondépe umi tova mokõi (fariseokuéra) ojapo háicha Ñanderuete rogakuérape ha táva cálle rupi, oñembotuicha hag̃uánte. Añetehápe Che ha’e peẽme ha’ekuéra ohupitýma hembiapo porã repy.
pembyaty uvei pirapireita yvágape, kupi’i ha ao raso ombyai’ỹ hag̃uáme, ha mondahakuéra omonda’ỹ hag̃uáme.
Nde pirapireita oĩháme, upépe oĩva’erã avei ne ñe’ã (korasõ).
upévare ñañeha’ãmba ñañomokyre’ỹ ha jajohayhu hag̃ua, jajapove jahávo tembiapo porã.
Ani hag̃ua japoi ñande iglésiagui, oĩ háicha umi ojapóva, ñañomokyre’ỹ uvei, pehechámagui oñemoag̃uiha ohóvo pe ára Hesu Crísto ou jevy hag̃ua.
Ñanderuete he’i: Che rohekombo’éta ndéve ha ahechaukáta ndéve pe tape moõrupípa nde reguatava’erã, Che ahechaukáta ndéve che rembipota ha ajesarekóta nderehe.
Pe mborayhu añetegua oha’arõkuaa, ipy’a porã, pe mborayhu noñemohakate’ỹi, pe mborayhu noñembotuichái ni ndojererovúi,
pe mborayhu naitie’ỹi (ndojapói mba’e iky’áva), ndohekái imba’évante, ndaipochýiri, ndaipy’a rasýi avave ndive,
ndovy’ái ohendúvo hapicha oikoha hekope’ỹ, ovy’a añetegua reheve uvei.
Pe mborayhu añeteguáva ogueropu’aka opaite mba’e ha opaite mba’e oguerovia, opaite mba’e oha’ãrõ ha ogueropu’akapa.
Ore roha’ãrõ Ñanderuete omoñepyrũva’ekue pe tembiapo iporãva pendepype, Ha’e voi penemog̃uahẽtaha hu’ãme, Hesu Crísto ou jevyha árape.
Mba’épa ja’éta upéicharamo ko’ã mba’e ko’ãva rehe. Ñanderuete oĩ ramo ñanendive, máva piko ikatu oñemoĩ ñanderehe.
Che aha’ãrõ Ñanderuete chepytyvõ hag̃ua, che ánga oha’ãrõ ne ñe’ẽ ojejapopa hag̃ua hekoitépe.
Hesu Crísto ñanerenói pe teko sãsóme g̃uarã, upévare pepyta hatãkena pe teko sãsóme ha anítei peñemoĩ jevy tembiguái cangálla poguýpe.
Ha he’i hemimbo’ekuérape: Pe kokue ningo ituicha ha umi omba’apóva ipype katu imbovy.
Pejerure pe kokue járape tombou umi omba’apova’erãva ikokuépe.
Peẽ katu pe tetã poravopyre, peteĩ tetã heko potĩmava, Ñanderuete ohenoimava’ekue pytũmbýgui peiko hag̃ua hesape porãitépe, pemyasãi hag̃ua ipa’ikuéra ramo Ñanderuete rembiapo tuichaitéva, (Éxodo 19,6).
Tapendepy’a porã uvei oñondive, peñopytyvõ, pejoporiahuvereko, peñoperdona, Ñanderuete peneperdona háicha avei Hesu Crísto ruguy rupive.
Heta jepy’amongeta oĩ ñande py’apýpe Ñanderuete rembipotánte katu ojehuva’erã ñande rekovépe.
Che katu aikuaa porã mba’evete ndaikatuiha ñandepe’a Hesu Crísto mborayhúgui, ni ñemano térã tekove, niangelkuéra térã demoniokuéra (añanguéra), ni yvy arigua térã ouva’erãva rehegua, ni Satana rembijokuái,
ni yvategua térã yvy guypegua, ni ambue pu’aka ndaikatúi ñandepe’a Ñanderuete mborayhúgui, ojehechaukámava Ñandejára Hesu Crísto rupi.
Péicha he’i Ñanderuete, Israel Jára Heko Porãitéva: Peñembyasy ramo pejapo vai haguére ha pejevy che rendápe, pejesalva hag̃ua, peñemomirĩ ha pejerovia ramo cherehe peẽ penembarete jevýta, peẽ katu ndapeipotáikuri,
Og̃uahẽ ramo pe ára che akyhyjeha, nderehe katu ajerovia.
Ñanderuete ñepytyvõ amombe’úta, iñe’ẽ oikóta katuete, Ñanderuete rehe ajerovia ha ndakyhyjemo’ãi. Mba’épa yvyarigua ikatúne ojapo cherehe.
Ha’e katu ombohovái chéve: Iporãntema (ovaléma) ndéve che poriahuvereko pu’aka. Che pu’aka ojehechauka porãmbáre ikangývape g̃uarã. Upévare che py’aite guive añembotuichase che kangykue rehe uvei, omba’apo porãve hag̃ua chepype Hesu Crísto pu’aka.
upévare ñag̃uahẽ jeroviapópe iguapyhaguasúpe, jahupity hag̃ua iporiahuvereko ha jajohu hag̃ua ipy’aporã, Ha’e ñanepytyvõ hag̃ua ñaikotevẽha árape.
Peẽ peiko hag̃ua hekópe ija háicha Hesu Crísto reheguávape, pembovy’a hag̃ua ichupe tapende’a opaite tembiapo porãme ha pekakuaa pehóvo Ñanderuete kuaapy arandúpe.
Ñanderuete voi omoĩmbava’erã imba’eitágui opaite peikotevẽva guive, Hesu Crísto reko jajaipa rupi.
Ñanderuete, pe Jaraite Pytu Porãitéva oĩ cheári, Ha’e cheporavo; Ha’e chemondo ambohasa hag̃ua iñe’ẽ porãva umi ohasa asývape, ha ambopy’aguapy hag̃ua umi ojepy’apývape, amombe’u hag̃ua umi oñeñapytĩvape ojejorapataha, ha ojepe’apataha cárcel rokẽnguéra;
Pe jerovia onace pe evangéliogui, ha pe evangélio ou Hesu Crísto ñe’ẽgui, (Isaías 53).
Eñorãirõ pe jerovia ñorãirõ porãme, eñemomba’e pe tekove tapia g̃uarãvare, upevarã Ñanderuete voi nerenoiva’ekue, ha reme’ẽmava’ekue avei peteĩ testimónio porã nde jerovia rekovégui heta hermanokuéra renondépe.
Che añembokurusúmagui Hesu Crísto ndive, ndaikovéima che, Hesu Crísto oikógui chepype. Che aikove ramojepe che ro’ópe, aikove che jerovia rupi Ñanderuete Ra’y rehe, Ha’e cherayhúgui ha oñeme’ẽmava’ekue che aikove hag̃ua Ha’érupi.
Peha’ãrõ vy’apópe ani penekangy ou ramo pe jepy’ara’ã, peropu’akakuaákena, peñembo’epeína uvei.
Ñanderuete ndivénte che ánga opytu’ukuaa, ichuguínte ou chéve ñepytyvõ.
Ani pejeroviátei pirapire rehe ojepe’áva mbaretépe térã oñemondava’ekue rehe, oñemboheta hetave ramo pende pirapire, ani pemoĩtei hese pende py’a (ani pejerovia pende pirapire rehe).
Ñanderuete oñe’ẽva’ekue, ahendu porã iñe’ẽ he’ívo: Pende Ruete ipu’akapa,
ha nendive, che Jára, oĩ poriahuvereko, ha Nde remyengovia peteĩteĩvape hembiapokue ojerure háicha.
Ha’énte hína che itaguasu ha chepytyvõva añetehápe, Ha’e ningo chemo’ãva, ndachepysyrymo’ãi.
Upe kuimba’e okyhyjéva Ñanderuetégui ojerovia mbarete, ha ita’yrakuéra jepeve oñemo’ãva’erã.
Peikuaa porãke, Ñanderuete, che Jára chesalvataha; ajerovia hese ha ndakyhyjemo’ãi; Ha’e chemombarete, upévare apurahéita ichupe g̃uarã, Ha’e chesalvágui.
Pemomba’eguasu uvei Ñanderuetépe pende py’apýpe, ha peñembosako’ipeína pembohovái hag̃ua opaite oporandúva peẽme pe jerovia perekóva rehe pende py’apýpe.
Opaichagua ñe’ẽ ojehaiukáva Ñanderuete Pytu Porãite rupi, iporã oporombo’e ha oporomyatyrõ hag̃ua, oporomopotĩ ha oporombohekombo’e hag̃ua pe heko peguáva rehe,
ikatu hag̃ua Hesu Crísto reheguáva oiko hekópe ha ikatupyry hag̃ua opaichagua tembiapo porãme.
Avy’a, Ñanderuete ohendu ramo che ñe’ẽ ha che mba’ejerure asy.
Ajerovia gueteri, ha’e ramojepe: Ajepy’apy vaieteha.
Che jepy’apy vaiete jave ha’éma: Ijapu ningo mayma kuimba’e ha kuñakuéra.
Mba’éichapa amyengoviáne Ñanderuetépe opaite mba’eporã cherehe ojapova’ekue.
Ajapyhýta pe váso tekove añete reheguáva, ha ahenóita Ñanderuete réra.
Ko’ág̃a ajapóta opaite mba’e aprometeva’ekue Ñanderuetépe, opaite tetãyguakuéra renondépe.
Hasy asy Ñanderuete resápe umi heko potĩva omano ramo.
Nde, che Ruete, che añetehápe ne rembiguái, che ningo ne rembiguái membykuimba’e, Nde remondoho pe cadéna oñapytĩva che rekove rehe.
Aikuave’ẽta ndéve kuave’ẽmby ñemomba’eguasu reheguáva, ha ahenóita nde réra, ore Ruete.
Ajapóta che ñe’ẽ ame’ẽmava’ekue Ñanderuetépe mayma hetãyguakuéra renondépe.
Ñanderuete róga korapýpe, Jerusalen mbytépe aikuave’ẽta. Alelúia, pemomba’eguasu Ñanderuetépe.
Ha’e oñakãity omoĩgui ijapysa cherendu hag̃ua, che ahenói guive héra.
Peẽ peñemomba’e haguéicha Ñandejára Hesu Crísto rehe, upeichaite peiko avei ipype.
Peñembohapo ha peñemopu’ã ipype, ha peñemohatãkena ipype pende jerovia rupi.
Pema’ẽ porãke, mba’éichapa peikopeína, ani peiko iñarandu’ỹvaicha, iñarandúvaichante uvei peiko.
Peiporu porãke umi oportunidad ko ára kóvape Ñanderuete ome’ẽva peẽme, ko’ã ára ningo ivaieterei.
Che natĩri amombe’u hag̃ua ko salvacion rape, oĩgui ipype Ñanderuete pu’aka osalva hag̃ua opaite ojeroviávape guive Hesu Crísto rehe, Judayguakuérape raẽ, upéi katu avei opaite ambue tetãyguakuérape.
Jaiko mbaretépe ñande jeroviápe ñamyi’ỹre, Ñanderuete katuete ojapopava’erã he’imava’ekue guive,
Pe ñe’ẽ mbohovái porã ombogue pe pochy; pe ñe’ẽ pohýiva katu ohatapyña pe pochy rendy.
Anítei pejapo mba’eve peñembotuichase térã peñorãirõségui, peteĩteĩ toñemomirĩ uvei, ha peguereko ambuekuérape mba’eguasuvérõ pendehegui.
Che ha’égui nde Ruete, nde Jára, Che rojapyhýma nde po akatúagui ha ha’e ndéve: Ani rekyhyje, Che roipytyvõta.
Peñopytyvõ pegueraha hag̃ua oñondive pene mba’e pohýi (cárga) ha péicha pejapo ramo pehóvo pejapo hekópe Hesu Crísto rembiapoukapy.
Ñanderuete voi ningo he’i: Ha’e ojejoko hatãgui cherehe, Che aguenohẽta ichupe ijejopy vaígui, ha Che añangarekóta hese ha’e oikuaágui che réra.
Hesu katu ombohovái ichupe: Ñanderuete kuatiañe’ẽme katu ojehai voi napan rehe añói oikovehína yvyariguakuéra, opaite ñe’ẽ osẽvare Ñanderuete jurúgui uvei, (Deuteronómio 8,3).
Chembo’éna tajapo ne rembipota, Nde ha’égui che Jára, nde Pytu Porãite tachemboguata tape porãre yvy ape ári.
Ani reheja pe ivaíva ipu’aka nderehe, upéva rãngue ndepu’aka pe ivaíva rehe mba’eporã rupi.