Iob 1:16

Am Bìoball Gàidhlig 1992

Nuair a bha e fhathast a’ labhairt, thàinig mar an ceudna fear eile, agus thubhairt e, Thuit teine Dhè o na nèamhan, agus loisg e na caoraich, agus na h‑òglaich, agus chuir e as dhaibh; agus thàinig mise am aonar as, a dh’innse dhut.

Iomraidhean Croise

Genesis 19:24

An sin thug an Tighearna air pronnasg agus teine frasadh air Sòdom agus air Gomorrah a‑nuas on Tighearna as na nèamhan:

1 Rìgh 18:38

An sin thuit teine an Tighearna, agus chaith e an ìobairt-loisgte, agus an connadh, agus na clachan, agus an luaithre; agus an t‑uisge a bha anns a’ chlais dh’imlich e suas.

2 Rìgh 1:10

Agus fhreagair Eliah, agus thubhairt e ri ceannard an lethcheud, Agus mas duine le Dia mise, thigeadh teine a‑nuas o na nèamhan, agus loisgeadh e suas thusa agus do lethcheud. Agus thàinig teine a‑nuas o na nèamhan, agus loisg e suas esan agus a lethcheud.

2 Rìgh 1:12

Agus fhreagair Eliah agus thubhairt e riu, Mas duine le Dia mise, thigeadh teine a‑nuas o na nèamhan, agus loisgeadh e suas thusa agus do lethcheud. Agus thàinig teine Dhè a‑nuas o na nèamhan, agus loisg e suas esan agus a lethcheud.

2 Rìgh 1:14

Feuch, thàinig teine a‑nuas o na nèamhan, agus loisg e suas a’ chiad dà cheannard lethcheud, maille rin lethcheudan; ach a‑nis biodh m’anam-sa luachmhor ad shùilean.

Salm 45:3

Crioslaich do chlaidheamh air do leis, O ghaisgich, led ghlòir agus led mhòralachd.

Ecsodus 9:28

Guidhibh-se air an Tighearna (oir is leòr e) nach bi tàirneanach anabarrach agus clach-mheallain ann nas mò; agus leigidh mise leibh falbh, agus chan fhan sibh nas fhaide.

Lebhiticus 10:2

Agus chaidh teine a‑mach o làthair an Tighearna, agus loisg e suas iad, agus fhuair iad bàs an làthair an Tighearna.

Lebhiticus 9:24

Agus thàinig teine a‑mach o làthair an Tighearna, agus loisg e air an altair an ìobairt-loisgte, agus an t‑saill: agus chunnaic an sluagh uile e, agus rinn iad iolach, agus thuit iad air an aghaidh.

Amos 7:4

Mar seo thaisbein an Tighearna Iehòbhah dhòmhsa; agus, feuch, ghairm an Tighearna Iehòbhah gu breitheanais le teine, agus loisg e an doimhne mhòr: agus shluig e suas earrann.

Taisbeanadh 13:13

Agus tha e a’ dèanamh chomharraidhean mòra, ionnas gu bheil e a’ toirt air teine teachd a‑nuas o nèamh air an talamh, ann am fianais dhaoine;

1 Samuel 14:15

Agus bha ball-chrith anns an fheachd anns a’ mhachair, agus am measg an t‑sluaigh uile: bha crith mar an ceudna air an fhreiceadan agus air an luchd-millidh fhèin, agus chriothnaich an talamh; agus bha i na crith ro‑mhòir.