Ecsodus 20:7

Am Bìoball Gàidhlig 1992

Na tabhair ainm an Tighearna do Dhia ann an dìomhanas; oir cha mheas an Tighearna neochiontach esan a bheir a ainm ann an dìomhanas.

Iomraidhean Croise

Genesis 27:20

Agus thubhairt Isaac ra mhac, Cionnas a fhuair thu i cho luath, a mhic? Agus thubhairt esan, A chionn gun do chuir an Tighearna do Dhia am rathad i.

1 Rìgh 2:9

A‑nis, matà, na meas neochiontach e: oir is duine glic thu, agus tha fhios agad ciod as còir dhut a dhèanamh ris; ach thoir a cheann liath sìos don uaigh le fuil.

2 Rìgh 5:20

Agus thubhairt Gehasi, òglach Elisa, an duine le Dia, Feuch, chaomhain mo mhaighistir Nàaman an Sirianach seo, a‑thaobh nach do ghabh e as a làimh an nì sin a thug e leis: ach mar as beò an Tighearna, ruithidh mise na dhèidh, agus gabhaidh mi nì‑eigin uaithe.

Salm 139:20

Oir labhair iad ad aghaidh gu h‑aingidh; thug do naimhdean d’ainm an dìomhanas.

Gnàth-fhacal 30:9

Air eagal gum bi mi làn, agus gun àich mi thu, agus gun abair mi, Cò e an Tighearna? No gum bi mi bochd, agus gun goid mi, agus gun toir mi ainm mo Dhè ann an dìomhanas.

Ieremiah 34:16

Ach thill sibh, agus thruaill sibh m’ainm, agus thug sibh, gach aon air a òglach, agus gach aon air a bhanoglaich, a leig e saor uaithe gu a thoil fhèin, tilleadh air an ais; agus chuir sibh fo smachd iad, gu bhith dhuibh nan òglaich agus nam banoglaich.

Ieremiah 4:2

Ach mionnaichidh tu, Mar as beò an Tighearna, ann am fìrinn, ann am breitheanas, agus ann an ionracas: agus beannaichidh na cinnich iad fhèin annsan, agus annsan nì iad uaill.

Eseciel 39:7

Mar seo nì mi m’ainm naomh aithnichte ann am meadhon mo phobaill Israel, agus cha leig mi m’ainm naomh a thruailleadh nas mò; agus bidh fhios aig na cinnich gur mi an Tighearna, aon naomh Israeil.

Lebhiticus 19:12

Agus cha mhionnaich sibh air m’ainm-sa gu breugach, cha mhò a mhì-naomhaicheas tu ainm do Dhè: Is mise an Tighearna.

Malachi 3:5

Agus thig mise dlùth dhuibh gu breitheanas, agus bidh mi am fhianais luath an aghaidh fhiosaichean, agus an aghaidh adhaltranach, agus an aghaidh na muinntir a bheir mionnan-eithich, agus an aghaidh na muinntir a tha a’ cumail air ais a thuarasdail on t‑seirbhiseach, a’ sàrachadh na bantraich agus an dìlleachdain, agus a’ cur a’ choigrich a thaobh, agus air nach eil eagal romhamsa, deir Tighearna nan sluagh.

2 Corintianach 1:23

Ach tha mi a’ gairm Dhè mar fhianais air m’anam, gur ann a‑chum sibhse a chaomhnadh nach tàinig mi fhathast gu Corintus.

Deuteronomi 10:20

Bidh eagal an Tighearna do Dhia ort; dhàsan nì thu seirbhis, agus ris-san dlùth-leanaidh tu, agus air a ainm mionnaichidh tu.

Deuteronomi 5:11

Na tabhair ainm an Tighearna do Dhia ann an dìomhanas: oir cha mheas an Tighearna neochiontach esan a bheir a ainm ann an dìomhanas.

Deuteronomi 6:13

Bidh eagal an Tighearna do Dhia ort, agus nì thu seirbhis dha, agus mionnaichidh tu air a ainm.

Seumas 5:12

Ach ro na h‑uile nithean, mo bhràithrean, na tugaibh mionnan, aon chuid air nèamh, no air an talamh, no air mionnan sam bith eile: ach guma h‑e ur còmhradh, Seadh, seadh, agus Chan eadh, chan eadh; air eagal gun tuit sibh ann an dìteadh.

Iosua 2:12

A‑nis uime sin guidheam oirbh, mionnaichibh dhomh air an Tighearna, a chionn gun do nochd mi coibhneas dhuibh, gun nochd sibhse mar an ceudna coibhneas do thaigh m’athar-sa, agus gun toir sibh dhomh comharradh cinnteach;

Iosua 2:17

Agus thubhairt na daoine rithe, Bidh sinne neochiontach a‑thaobh iad seo do mhionnan a thug thu oirnn a mhionnachadh.

Iosua 9:20

Seo nì sinn riu; leigidh sinn eadhon leo a bhith beò, a‑chum nach bi fearg Dhè nar n‑aghaidh, airson nam mionnan a mhionnaich sinn dhaibh.