San Juan 15:16 - Zapoteco de Chichicapan

¹⁶ Ayi laꞌh dxiꞌh tu gulii tu naꞌh sino que naꞌh guliin laꞌh tu nee rñiꞌn loh tu nahpa chee tu tin guunn duxa tu xtsiꞌn Xtaaꞌdahn, nee ayi ñichiloh dziꞌn chi, ya ziꞌchi zuniꞌhi Xtaaꞌdahn garaa nin guinaaba tu pur laan.

San Juan 15:16 Iomraidhean Croise

San Mateo 21:22

ya garaa raꞌ nin guinaaba tu loh Dxiohs chin cwidxyi-guinaaba tu Ñiꞌh, gaduhbi stoꞌ tu gulchechii stoꞌ tu, tin ziꞌchi zicaꞌha tu nin guinaaba tu.

San Mateo 7:7

Rahbi za Ñiꞌh: ―Gulchezah gulguinaaba nin rchiꞌhn tu, pwihsi Dxiohs zuniꞌhi Ñiꞌh nin guinaaba tu; sidela xiilla chezah chiꞌhyi tu zidxeela tun, ziga nin guiclaaꞌdzi tu; sidela chezah gusihdzi tu rwaaꞌ yuuꞌ pwihsi zillaalan,

San Lucas 6:13

Ya chin barah gueꞌla, gudihdxyi Jesuhs xpwiinn raꞌ Ñiꞌh, chiꞌchi gulii Ñiꞌh tsiꞌh bichiohpa raꞌ ba nin guleꞌhelah Ñiꞌh pooxtla raꞌ.

San Juan 13:18

Ayi cañiꞌn xcweenta garaa tu; cañiꞌn loh si raꞌ nin guliin, per nahpa soobaa dxyiꞌdxyi nin caa loh Xchihtsi Dxiohs: “Bwiinn nin rahwnee naꞌh pahn, laꞌh bwiinn chi rwaꞌha llahn loon.”

San Juan 15:19

Sidela laꞌh tu ñahca tu tuhsi cun bwiinn guidxyiyuh, ñantsiiꞌhi raꞌ ba laꞌh tu ziga nadziiꞌhi raꞌ ba nin naa raꞌ xpwiinn raꞌ ba, per nnah naꞌh guliin laꞌh tu loh raꞌ bwiinn raꞌ nin naa raꞌ bwiinn guidxyiyuh.

San Juan 15:5

Rahbi za Ñiꞌh: ―Naꞌh naan llaaꞌn ziga yahga uhva, ya laꞌh tu naa tu ziga lliiꞌdzi yahga uhva chi. Bwiinn nin dxiaꞌhannee naꞌh tuhsi, dxiaꞌhannee zahn laꞌh bwiinn chi, ya ziꞌchi ruhnn duxa ba xtsiꞌnaꞌhn, laasii sidela guiriaꞌhcaa tu nez loon ayi nuu za xa guunn tu.

San Juan 6:70

Chiꞌchi rahbi Jesuhs: ―¿Tayi naꞌh dxiꞌh guliin laꞌh tu ziga naa tu gadziꞌh bichiohpa xpwiiꞌnnraꞌn? Pwihsi rñiꞌn loh tu, tuhbi tu naa bwiinndxaaba.

Hechos 1:24

Pwihsi chiꞌchi gudihdxyi-gunaaba raꞌ ba laꞌh Dxiohs, squiiꞌ rahbi raꞌ ba: ―Daada Dxiohs nin rahcabwaꞌ lastoꞌ garaatiiꞌ nu, baluuꞌyi laꞌh nu cuun nin naa ndxiꞌhw nin laꞌluꞌh gulii loh garoopa ndxiꞌhw raꞌ riiꞌ,

Hechos 1:8

per zicaꞌha tu Spíritu Saantu, tin cweezaa Ñiꞌh laꞌn lastoꞌ tu. Tin laꞌh Ñiꞌh guniꞌhi Ñiꞌh guelrnabwaꞌ laꞌh tu, tin chegatiꞌchi tu xchiꞌdxyiꞌhn tantu guihdxyi Jerusalehn coma ziga garaa raꞌ guihdxyi nin xnaabwaꞌ Judea, cun Samaria, neezaa gaduhbi guihdxyiyuh.

Hechos 10:41

Ayi baluuꞌyiloh Jesucristu loh chyuuchiꞌhzi bwiinn sino que loh si nu ziga gulii Dxiohs laꞌhnu; bidaꞌwnee nu Ñiꞌh bidwanee nu Ñiꞌh limentu chin babahan Ñiꞌh loh raꞌ bwiinnguuchi.

Hechos 22:14

Chiꞌchi nnah Ananías loon: “Xchiohs raꞌ guehtu xtatita roo raꞌnuꞌh gulii yiꞌh desde galohyi tin gwaꞌha luꞌh xa naa xigaaba Ñiꞌh, niꞌchin ya bwaꞌhaloh luꞌh laꞌh Jesucristu Lliiꞌn Dxiohs cun bihn za luꞌh xchꞌdxyi Ñiꞌh nin guñiꞌ Ñiꞌh loh luꞌh chin bwaꞌhaloh luꞌh Ñiꞌh.

Hechos 9:15

Chiꞌchi rahbi Jesucristu loh Ananías: ―Gwah; Naꞌh guliin ba tin guiñiꞌ ba xchiꞌdxyiꞌhn chezahnee ban loh raꞌ bwiinnziitu cun neezaa loh raꞌ rrehyi cun loh raꞌ bwiinn Israel.

Romanos 1:13

Bwitsi raꞌn ziga naa raꞌ nuꞌh xpwiinn Jesucristu, ziahan la bweelta xclaaꞌdzihn dxieꞌlda guiaꞌhan cuun tu, per hasta nnah ayi ruꞌnnahn gahn. Xclaaꞌdzihn dxieꞌldahn nezca tin chechiistoꞌ ziahan ru bwiinn xchiꞌdxyi Dxiohs ziga riachiistoꞌ raꞌ ba ziahan lahta nez hasta guyaaꞌhahn loh raꞌ bwiinn nin ayi naa raꞌ bwiinn Israel,

Romanos 1:5

Ya pur xcweenta Jesucristu nin naa Daada xteenn nuꞌh baniꞌhi Dxiohs guelrahcanee cun guelrnabwaꞌ laꞌh nu tin chogaluuꞌyi nu xchiꞌdxyi Ñiꞌh laꞌh raꞌ bwiinn nin ayi naa raꞌ bwiinn Israel, tin ziꞌchi chechiistoꞌ garaa raꞌ bwiinn guidxyiyuh xchiꞌdxyi Ñiꞌh nee tin guzoꞌbadxiahga raꞌ ban,

Romanos 15:4

Garaa raꞌ dxyiꞌdxyi raꞌ nin caa loh dxihtsi desde chieempa, gucah raꞌn, tin gacabwaꞌ raꞌ nuꞌh siguhratiiꞌ naa guelnabahan nacuubi para laꞌh raꞌ nuꞌh. Pwihsi siguhra riiꞌ, dxiꞌdxiu-dxaꞌgan paseensi, guelnasaa nin naa ziga tuhbi sehn xteenn guelnabahan nin zeꞌyahlda dxiꞌ.

Romanos 9:21

Pwihsi bwiinn nin bwiꞌhnnchaꞌyi laꞌh guihsu chi ¿tayi zahca guhnn dxiꞌh ba zigachiꞌhzi nin xclaaꞌdzi ba guunn chaꞌyi ba cun yuh chi, nicala cun yuh chi guunn ba tuhbi guihsu nin galluꞌyi, nee cun laꞌh gahca za yuh chi guunn ba tuhbi guihsu nin ayi galluꞌyi?

1 Corintios 10:11

Garaa raꞌ cohsa raꞌ riiꞌ guzahca raꞌ guehtu xtaada guldooꞌ raꞌ nu, niꞌchin biaꞌhanan loh Dxihtsi ziga tuhbi jeemplu tin gaca nasiin raꞌ nuꞌh ayi chyu guunn cweenta ziga bwiꞌhnn raꞌ ba, tin ayi guinaꞌzu raꞌ cohsa raꞌ chi laꞌhnuꞌh loh dxyih raꞌ riiꞌ.

Gálatas 1:15

Per Dxiohs gulii naꞌh nee gulii Ñiꞌh naꞌh desdeyi chin nuuꞌhuhn stoꞌ xmaaꞌn, niꞌchin gudihdxyi Ñiꞌh naꞌh pur tantu nin rucaꞌh stoꞌ Ñiꞌh naꞌh.

Efesios 2:10

laasii Dxiohs naa nin gulahchixchih laꞌh nuꞌh, nee laꞌhzaÑiꞌh gulahchibiñih laꞌhnuꞌh cun Jesucristu tin guidiꞌhnn nuꞌh dziꞌn zaꞌca raꞌ nin bwiꞌhnn Ñiꞌh lligaaba des galohtiiꞌyi nin nahpa guidiꞌhnn nuꞌh.

Colosenses 1:23

per ziga rluuꞌyi cweenta riiꞌ nahpaa cheezah dziꞌtsi tu loh xchiꞌdxyi Dxiohs zigazi zohbaa tuhbi yuuꞌ nin rgaꞌha rahca loh tuhbi simieentu dziꞌtsi tin ziꞌchi ayi chuu dxyih nin gusaaꞌn tu xcweenta cohsa zaꞌca nin naannloh tu zicaꞌha tu laasii cohsa chi bihnn tun pur xcweenta xchiꞌdxyi Dxiohs, laasii dxyiꞌdxyi raꞌ riiꞌ ziahan duxa raꞌ la lahta laꞌn bidiꞌchi la loh gaduhbi guidxyiyuh, ya naꞌh Pahblu bibwiꞌhihn tin ruꞌnnahn cumpahñu cagaluꞌyiꞌhn xchiꞌdxyi Dxiohs laꞌh raꞌ bwiinn.

Colosenses 1:6

Pwihsi dxyiꞌdxyi raꞌ riiꞌ laꞌn zeezah calliiꞌdzin ziahan lahta loh guidxyiyuh nee caguuꞌbiaꞌñihin laꞌh raꞌ bwiinn dxyih cun dxyih tin guunn raꞌba ziga xclaaꞌdzi Dxiohs gaca tal ziga guluꞌbiaꞌñihin laꞌhtu mwer dxyih nin bihnn tun ya guhcabwaꞌ tu balahsastoꞌ Dxiohs laꞌhtu nee guhcabwaꞌza tu nalluꞌhyin para laꞌhtu.

1 Timoteo 2:7

Ya pur deeꞌ gulii Dxiohs naꞌh ziga nin ruluuꞌyi xchiꞌdxyi Ñiꞌh nezloh raꞌ bwiinn, ruluꞌyiꞌhn dxyiꞌdxyi nin guchii xcweenta Ñiꞌh nee naan mwehsu loh raꞌ bwiinn raꞌ nin ayi naa raꞌ bwiinn Israel tin chechiistoꞌ raꞌ ba xchiꞌdxyi Ñiꞌh. Guchiin nin cañiꞌn loh luꞌh, ayi cañiꞌn dxyiꞌdxyi dxixiꞌhw laasii ya naan tuhbi xpwiinn Jesucristu.

2 Timoteo 1:11

Dxiohs gulii naꞌh tin gacaꞌhn tuhbi nin ruluuꞌyi xchiꞌdxyi Ñiꞌh riiꞌ, nee guxeꞌhla za Ñiꞌh naꞌh tin gacaꞌhn tuhbi xpooxtla Ñiꞌh cun tuhbi xmwehsu Ñiꞌh tin guluꞌyiꞌhn xchiꞌdxyi Ñiꞌh laꞌh raꞌ bwiinn raꞌ nin ayi naa raꞌ bwiinn Israel.

2 Timoteo 2:2

Dxyiꞌdxyi raꞌ nin babihndxiahga luꞌh guñiꞌn loh ziahan raꞌ bwiinn, laꞌgahca dxyiꞌdxyi raꞌ chi guñiꞌ loh raꞌ bwiinn raꞌ nin riachii stoꞌ ñiꞌh tin zahca guluuꞌyi raꞌ za ba dxyiꞌdxyi ca loh snuhn raꞌ bwiinn.

Tito 1:5

Chin basiaꞌhanahn yiꞌh loh yuh nin rii loh ñisadoꞌ nin laa Creta, basiaꞌhanahn yiꞌh tin para guunnxnehza luꞌh nin riaꞌdxi gachidiꞌhnn xnehza raꞌ nuꞌh nee tin cwii za luꞌh bwiinn ñuꞌxa raꞌ loh cada tuhbigah raꞌ guihdxyi talpaꞌh ziga guñaan loh luꞌh.

Hebreos 11:4

Pur ziga gwachiistoꞌ guehtu Abel xchiꞌdxyi Dxiohs badiꞌhi guhn ba tuhbi guhn nez loh Ñiꞌh nin nazaꞌca ru loh guhn nin badiꞌhi bwihtsi ba nin biriaꞌhlah Caín, ya pur niꞌchin guñiꞌ Dxiohs naa guehtu Abel bwiinn zaꞌca ru. Nnah nicala laꞌh guehtu Abel guhchi ba, zeezahtiiꞌ zaꞌbi xchiꞌdxyi ba ziga gwachiistoꞌ ba xchiꞌdxyi Dxiohs.

Santiago 3:18

Ya bwiinn raꞌ nin rdxiꞌhyi guelrbwihdxyii stoꞌ, guelrbwihdxyii stoꞌ rbahchi raꞌ ba tin rcaꞌha za raꞌ ba tuhbi guelnabahan nayaa nez loh Dxiohs ziga nin gaca xquelnazaꞌca raꞌ ba.

1 Pedro 3:15

sino que gulgacaꞌh stoꞌ tu Jesucristu cun gaduhbi stoꞌ tu ziga naa Ñiꞌh Daada, gulgahca nasiin tin guiñiꞌ tu loh raꞌ garaa raꞌ bwiinn raꞌ nin guinaabadxyiꞌdxyi loh tu xa naa xcweenta hereensi nin naannloh tu zicaꞌha nuꞌh loh Jesucristu. Pwihsi chin guiñiꞌ tu loh ba, gulguiꞌhnnan cun gaduhbi stoꞌ tu nee cun gaduhbi xquelnadoꞌlaadzi tu.

1 Pedro 3:2

Ya loh gwaꞌha raꞌ ba xa nabahan xnehza tu cun guelnadoꞌlaadzi nin nahpa tu stoꞌ tu

1 Juan 4:10

Pwihsi squiiꞌ rahcabwaꞌ nuꞌh nadziiꞌhi Dxiohs laꞌhnuꞌh: ayi pur nin ñucaꞌ stoꞌ nuꞌh laꞌh Dxiohs, sino que laꞌh Ñiꞌh rucaꞌ stoꞌ Ñiꞌh laꞌhnuꞌh niꞌchin nin guxeꞌhla Ñiꞌh Lliiꞌn Ñiꞌh tin guziaꞌtii Ñiꞌh xtuhlda raꞌ nuꞌh.

1 Juan 4:19

Laꞌhnuꞌh racaꞌ stoꞌ nuꞌh laꞌh Dxiohs laasii laꞌh Ñiꞌh bacaꞌ stoꞌ Ñiꞌh laꞌhnuꞌh desde galohtiiꞌyi,