Apocalipsis 3:7 - Zapoteco de Chichicapan

⁷ Chiꞌchi nah Ñiꞌh loon: ―Bacaꞌh dxyiꞌdxyi riiꞌ loh xaanjla Dxiohs nin rahpa xpwiiꞌnnraꞌn nin rii loh guihdxyi Filadelfia: “Squiiꞌ rñiꞌ nin banayaa par tuꞌpazi, nin guchii naa xchiꞌdxyi Ñiꞌh, nin nahpa xchiahyi guehtu Davihd; laꞌh Ñiꞌh chin ruxaala Ñiꞌh ayi nin tuhbi nin guunn gahn gusieꞌw hasta ruxaala Ñiꞌh, nee chin rusieꞌw Ñiꞌhn ayi za nin guunn gahn guxaala hasta rusieꞌw Ñiꞌh.

Apocalipsis 3:7 Iomraidhean Croise

San Mateo 16:19

ya zuniꞌhihn guelrnabwaꞌ yiꞌh tin guluuꞌyi luꞌh laꞌh raꞌ bwiinn nin gwachii stoꞌ ñiꞌh xchiꞌdxyiꞌhn; nee xi chiꞌhzi nin gusaaꞌn luꞌh guunn raꞌ ba, o xi chiꞌhzi nin ayi gusaaꞌn luꞌh guunn raꞌ ba; zuhnn Dxiohs para soobaa xchiꞌdxyi luꞌh.

San Mateo 24:35

Dxibaaꞌ cun guidxyiyuh ziñihchiloh raꞌn, per xchiꞌdxyiꞌhn ayi ñichilohon, nahpa chaꞌloh xchiꞌdxyiꞌhn,

San Marcos 1:24

―¡Ayy, basaaꞌn laꞌh nu ayi xi guunnee luꞌh laꞌh nu, Jesuhs nin zeꞌ guihdxyi Nazaret! ¿Xixnaa zeꞌgañichiloh luꞌh laꞌh nu? ¡Naꞌh nuꞌnbwaꞌn yiꞌh, yiꞌh nin naa luꞌh Bwiinn Saantu nin guluꞌnehza Dxiohs!

San Lucas 1:32

Laasii gaca bi tuhbi bwiinn nin mahzi lasahca, neezaa guiñiꞌ bwiinn laꞌh bi naa bi Lliiꞌn Dxiohs nin nuu dxibaaꞌ, nee gacaza bi rrehyi ziga guhca guehtaguhla xtatiitaroo bi nin biriaꞌlah Davihd nin guhca rrehyi ca chieempa rooꞌ,

San Lucas 4:34

―¡Ayy, basaaꞌn laꞌh nu! ¿Xixzeꞌ luꞌh riiꞌ Jesuhs nin zeꞌ guihdxyi Nazaret? ¿Ta zeꞌ luꞌh tin guñihchiloh luꞌh laꞌh nu? ¡Naꞌh nuꞌnbwaꞌn yiꞌh, yiꞌh nin naa luꞌh Lliiꞌn Saantu Dxiohs!

San Juan 14:6

Chiꞌchi rahbi Jesuhs: ―Naꞌh naan neziuh, cun dxyiꞌdxyi nin naa guchii nee cun neezaa guelnabahan; niꞌchin pur naꞌh dxiꞌh zahca gadzihn tu nez nuu Daada Dxiohs.

Hechos 3:14

laꞌh gahca tu ayi guclaaꞌdzi tu ñilaꞌh Ñiꞌh cun guñiꞌ tu ayi nuꞌnbwaꞌ tu Lliiꞌn saantu Dxiohs nin ruhnn ganaalla dziꞌn zaꞌca. Mejor gunaaba tu gulaꞌh Barrabahs, ndxiꞌhw nin gudxiinn bwiinn,

1 Juan 5:20

Naann za nuꞌh biꞌ Jesucristu Lliiꞌn Dxiohs loh guidxyiyuh ya baluuꞌyi Ñiꞌh laꞌhnuꞌh xchiꞌdxyi Dxiohs; Daada Dxiohs nin nuu dxibaaꞌ. Ya nabahan nuꞌh tuhsi cun nin naa Dxyiꞌdxyi guchii nin naa laꞌh gahca Jesucristu, pwihsi laꞌh Ñiꞌh naa Dxiohs guchii paꞌh, nee laꞌh za Ñiꞌh naa Ñiꞌh guelnabahan nin ayi ñichilohtiiꞌ.

Apocalipsis 1:11

Nin guñiꞌ loon squiiꞌ: ―Naꞌh naan des galohtiiꞌyi nee cun para hasta fihnyi, ziga zi lehtra A cun lehtra Z. Bacaꞌh loh tuhbi chihbru garaa raꞌ nin gwaꞌha loh luꞌh, ya guixeꞌhla luꞌhn para xpwiiꞌnn raꞌn nin rii loh gahdzi guihdxyi xteenn Asia, o sea par loh guihdxyi Efesu, loh guihdxyi Esmirna, loh guihdxyi Pérgamo, loh guihdxyi Tiatira, loh guihdxyi Sardis, loh guihdxyi Filadelfia, nee cun loh guihdxyi Laodicea.

Apocalipsis 1:18

Naꞌh nin naan nin nabahanahn nnah, guhchiꞌhn per gubiaꞌgarii ba nabahnahn yannah ba nabahnahn par tuꞌpazi; naꞌh naꞌpahn guelrnabwaꞌ loh guelguhchi nee cun loh gabihldxyi za.

Apocalipsis 1:5

nee cun neezaa xquelruhnntaaꞌyi xquelrbahchidxyii stoꞌ Jesucristu nin ruluuꞌyi dxyiꞌdxyi nanchii laꞌh nuꞌh, laꞌh Ñiꞌh nin mwer babahn za loh bwiinn guuchi; laꞌh za Ñiꞌh rnabwaꞌ Ñiꞌh loh garaa raꞌ rrehyi raꞌ nin rii raꞌ loh guidxyiyuh. Jesucristu rcaꞌhstoꞌ Ñiꞌh laꞌh raꞌ nuꞌh, nee basiaa Ñiꞌh laꞌh raꞌ nuꞌh loh duhlda cun llarihn Ñiꞌh.

Apocalipsis 15:3

ya cayuꞌlda raꞌ ba tuhbi coru xteenn guehtu Moisehs nin guhca xpwiinn Dxiohs, nee cun coru za xteenn Xiꞌhyi Dxiohs; ya squiiꞌ naa coru chi: Cohsa rooꞌ duxa naa dziꞌn nin bwiꞌhnn luꞌh Yuꞌbiluꞌh, Daada Dxiohs, nin nahpa garaatiiꞌ raꞌ guelrnabwaꞌ. Ruhnn Yuꞌbiluꞌh ganaalla dziꞌn zaꞌca, rñiꞌ za Yuꞌbiluꞌh ganaalla dxyiꞌdxyi raꞌ nin guchii, nee Yuꞌbi za luꞌh naa luꞌh Rehyi loh garaa raꞌ bwiinn guidxyiyuh.

Apocalipsis 16:7

Ya chiꞌchi biindxiaagahn cañiꞌ nin cañiꞌ nez loh bacuꞌgadxiah squiiꞌ: ―Guchii paꞌh luꞌh, Daada Dxiohs nin nahpa garaatiiꞌ raꞌ guelrnabwaꞌ; xquelguxchiisi Yuꞌbiluꞌh naan guchii paꞌh nee naa xnehza za raꞌn.

Apocalipsis 19:11

Chiꞌchi bwaꞌhahn billaala dxibaaꞌ, ya biinloh tuhbi maangwahyi labweh, ya nin zohba dihtsi ma laa Nin ruzaꞌloh xchiꞌdxyi Ñiꞌh, laasii rnabwaꞌ Ñiꞌh nee ruhnn Ñiꞌh guehrru ziga naa xnehza ziga naa guelguxchisi zaꞌca.

Apocalipsis 19:2

laasii xquelguxchisi Ñiꞌh naa gaduhbi laꞌgaꞌhtiiꞌ ziga naa xnehza; laasii laꞌh Ñiꞌh bwiꞌhnn guelguxchisi xcweenta gunnaꞌh dxaaba nin cagaxiꞌn laꞌh raꞌ bwiinn guidxyiyuh cun xcweenta xquelgubwihlli ba; laꞌh Ñiꞌh basadxihlli laꞌh gunnaꞌh dxaaba chi llarihn raꞌ xpwiinn Ñiꞌh.

Apocalipsis 2:1

Chiꞌchi nah Ñiꞌh loon: ―Bacaꞌh dxyiꞌdxyi raꞌ riiꞌ loh xaanjla Dxiohs nin rahpa xpwiiꞌnnraꞌn nin rii loh guihdxyi Efesu: “Squiiꞌ rñiꞌ nin caa gahdzi dxih llaaꞌndxibaaꞌ naa derehchu Ñiꞌh, nin caꞌnzaa galaayi gagaadzi raꞌ gandayehru ohro raꞌ.

Apocalipsis 21:5

Ya chiꞌchi laꞌh nin zohba loh yahgaxiiyi rooꞌ nez dxibaaꞌ guñiꞌ loon squiiꞌ: ―Bwaꞌha, naꞌh guunn nacuuꞌbihn garaatiiꞌ. Guñiꞌ za Ñiꞌh loon squiiꞌ: ―Bacaꞌh dxyiꞌdxyi raꞌ riiꞌ laasii dxyiꞌdxyi raꞌ riiꞌ guchii paꞌ ca naa raꞌn; zahca chechii stoꞌ raꞌ bwiinn dxyiꞌdxyi raꞌ riiꞌ.

Apocalipsis 3:14

Chiꞌchi nah Ñiꞌh loon: ―Bacaꞌh dxyiꞌdxyi raꞌ riiꞌ loh xaanjla Dxiohs nin rahpa xpwiiꞌnnraꞌn nin rii loh guihdxyi Laodicea: “Squiiꞌ rñiꞌ nin ayi rusaguiꞌhi, nin rñiꞌ ganaalla dxyiꞌdxyi guchii, nin gulahchixchih garaa nin bwiꞌhnn Dxiohs lligaaba gacachaꞌyi.

Apocalipsis 4:8

Ya gadaapa raꞌ maan raꞌ chi tuhbigah raꞌ ma zohba xoꞌpagah xiiyi raꞌ ma, ya gaduhbitiiꞌ tihxi raꞌ ma nuu bizloh raꞌ ma; nee dxyih-nagueꞌla ayi rbweeza cañiꞌ raꞌ ma: Saantu, saantu, saantu naa Daada Dxiohs nin nahpa guelrnabwaꞌ rooꞌ, nin nuu des galohtiiꞌyi, nin nuu nnah, cun nin chuu par tuꞌpazi.

Apocalipsis 5:9

ya cayuꞌlda za raꞌ ba tuhbi dxyiꞌdxyi cuubi nin rahbi raꞌ ba squiiꞌ: Lasahca duxa Yuꞌbiluꞌh pur nin gunaꞌzu luꞌhn, nee laasii Yuꞌbi za luꞌh naa luꞌh nin guhchi loh cruhzi, ya cun llarihn luꞌh gudxihlli luꞌh xcweenta bwiinn raꞌ nin naa xpwiinn Dxiohs. Bwiinn garaa lahta raꞌ nin rñiꞌ guriin-guriin dxyiꞌzah, bwiinn nin naa raꞌ guriin-guriin guihdxyi cun nin rii raꞌ guriin-guriin lahdxyi bwiinn,

Apocalipsis 6:10

Bwiinn raꞌ riiꞌ cañiꞌ raꞌ ba jweersi rooꞌ rahbi raꞌ ba: ―Daada Dxiohs nin naa saantu cun nin naa guchii paꞌh, ¿cuucayi chaꞌloh guunn Yuꞌbiluꞌh guelguxchisi tin chiilli raꞌ bwiinn guidxyiyuh xcweenta nin gudxiinn raꞌ ba laꞌh nu?