Apocalipsis 5:13 - Dižaʼ güen c̱he ancho Jesucristo

¹³ Na' ḻecze benda' yogo' beṉe' že' yaban' na' yežlion' na' beṉe' že' latje c̱he beṉe' guat, na' beṉe' zjanita' ḻo nisdao', cheso'e diža' chesene': Toḻi tocaṉe chonxencho Dios ben' chi' chnabia' na' Jesucriston' ben' zaca'lebde' ca xila' daon' gosot beṉe' Israel cont gwṉitlao xtoḻa'gaque'. Zjanape' yeḻa' bala'aṉ, na' zjanaque' beṉe' zaca' juisyw, na' zjanape' yeḻa' guac xen juisyw toḻi tocaṉe. Na' benda' ḻecze can' gosena be chaš yežlion' na' be chaš le'e yaban' na' ḻo' nis, na' len yogo' bichle da' zjade.

Apocalipsis 5:13 Iomraidhean Croise

San Mateo 6:13

Na' bitw go'o latje soa da' gwžigan' neto' gonto' da' mal, san bcuas bcue'ejšca neto' len da' mala'. Le'na' chnabi'o na' napo' yeḻa' guac na' naco' beṉe' zaca' juisyw toḻi tocaṉe. Ca'czen' gacšca.

San Lucas 2:14

¡Chonxencho Diosa' ben' zoa yaba, na' ḻo yežlio yesezoa yesebez beṉac̱hen' binḻo, con bena' cheson can' chazlaže' Diosen'.

San Juan 1:29

Na' beteyo Juanṉa' ble'ede' zej Jesúsen' gan' zoen' na' gože' ben' chosozenag c̱he': ―Ḻe ṉa' ben' za' nga, Diosen' ba gwseḻe'ne' cont yeque'e xtoḻa' beṉac̱hen'. Bena' zaca'lebe' ca xila' dao' ben' chot chio' beṉe' Israel cont Diosen' chezi'xene' xtoḻa'chon'.

Romanos 11:36

Yogo'ḻoḻ da' de naquen c̱he Dios. Bene' beṉac̱h, beyix̱e' na' bica'chle da' zjade. Na' lagüe yogo'ḻoḻ da' bene' zoe' blao. Ḻen' gacxene' toḻi tocaṉe. Can' gacšca.

Romanos 16:27

Toze Diosen' zaque' gonxen chio' beṉac̱h, na' tozen' napchgüe' yeḻa' sina'. Na' da' gwseḻe' X̱ancho Jesucriston' chaclene' chio', da'nan' chac chonxenchone' toḻi. Ca'šcacze gac.

Romanos 9:5

Beṉe' gole blao beṉe' za' che'eḻte gosaque' x̱ozxtao' neto' beṉe' Israel. Na' ḻo diaža c̱hegaque'na' golje Criston' ben' gwseḻa' Diosen'. Criston' ḻecze naque' Dios na' chnabi'e yogo'te beṉac̱h, yogo'te beyix̱e' na' yogo'ḻoḻ bichle da' de yežlio nga na' gate'teze. Cheyaḻa' gonxenchone' toḻi tocaṉe. Na' can' gonšcaczcho.

Efesios 3:21

Na' chio' chdop chžagcho chonxencho Criston', cheyaḻa' gonxencho Diosen' ṉa'a na' toḻi tocaṉe da' gwseḻe' Cristo Jesúsen' ṉec̱he chio'. Na' can' gonšcaczcho.

Filipenses 2:10

Na' žin ža cate' yogo'ḻoḻ beṉac̱h na' yogo'ḻoḻ angl ca' yosozoa xibgaque' lao Jesucriston', beṉe' že' yaba, yežlion' na' gate'tezechle. Na' ḻecze ca' yeson da' x̱igüe' ca'.

Colosenses 1:23

Na' še soacho šejnilaže'cho Criston' na' soac̱hac̱hcho len toze xbab, na' soateze soacho lez šjayzoacho len Diosen' can' gwzelaže'cho gac c̱hecho cate' bzenagcho xtižen' da' nechw, nachen' bibi doḻa' gapcho cate' yežincho lao Diosen'. Na' diža' güen c̱hen' ba bžinen doxen yežlion' cont beṉac̱hen' chesenden', na' Diosen' gwleje' neda' Pablo chyix̱jue'edan'.

1 Timoteo 4:16

Na' gwsaco' can' soa cuezo' cont soac̱hac̱ho' gono' con can' chazlaže' Diosen' na' soac̱hac̱ho' gwzejni'ido' beṉe' xtiža' Diosen' con can' naquen. Ben ca' cont gaclenen le' na' ḻecze gaclenen beṉe' ca' chosozenag xtižon' cont šjayzoalenḻe Diosen' cate' žin ža.

1 Pedro 4:11

Še Diosen' ba none' c̱hecho c̱hix̱jue'echo xtižen', ḻe xtiže' na'zen' cheyaḻa' c̱hix̱jue'echo. Na' še ba none' c̱hecho gaclencho beṉe', cheyaḻa' gaclenchone' do yic̱hj do laže'cho, ḻe Diosen' chone' cont chac chaclenchone'. Cate' bi da' goncho, gonchon ca gacxen Diosen' da' gwseḻe' Jesucriston' len chio'. Zaca'cze' gonxenchone' toḻi tocaṉe na' zaca'cze' ṉabi'e toḻi tocaṉe. Can' gacšca.

1 Pedro 5:11

Cheyaḻa' soacho gonxenchone' toḻi tocaṉe da' naque' beṉe' zaca' juisyw, na' ṉabia'che' ca note'tezechle. Can' gonšcaczcho.

Apocalipsis 1:6

Nach ba gwleje' chio' cont ṉabia'cho txen len ḻe' ca no rey na' cont soacho gonxencho Diosen' ca no bx̱oz, Dios ben' nac X̱e' na' ḻecze naque' ben' chonxene'. Cheyaḻa' gonxenchone' toḻi tocaṉe, ḻe zoacze' chnabi'e toḻi tocaṉe. Can' gonšcaczcho.

Apocalipsis 13:8

Na' yogo' beṉe' že' yežlion' beṉe' bi zjanyoj lagaque' ḻe'e libr c̱he Jesucriston', gosonxene' bežen'. Ḻe cate' gwxete yežlion' Jesucriston' bzoje' ḻe'e libr c̱he' la yogo' beṉe' ṉezde' gata' yeḻa' mban c̱hegaque' toḻi tocaṉe, Jesucristw ben' zaca'lebde' ca xila' dao' be gosot beṉe' gualaž c̱heto' ṉec̱he xtoḻa'gaque'.

Apocalipsis 5:1

Na' ble'eda' Dios ben' chi' chnabia', len ne'e ḻicha nox̱e' to yiš da' ndobyoyen na' nyoj chop ḻa'aten na' nyeyjon nyišen' gaže seyw.

Apocalipsis 5:12

Na' benda' cheso'e dižan' zižje chesene': Jesucriston' bnežjw cuine' ṉec̱he xtoḻa' beṉac̱hen', na' da'nan' zaca'lebde' ca xila' daon' gosot beṉe' Israel cont gwṉitlao xtoḻa'gaque'. Na' Jesucriston' zaca'cze' gonxenchone', ḻe chnabi'e doxen, na' yo'o ḻo ne'e yogo'te da' zjade. Naque' beṉe' sina' gual, na' nape' yeḻa' guac xen. Cheyaḻa' güe'chone' yeḻa' bala'aṉ, na' güe'cho diža' naque' beṉe' zaca' juisyw.

Apocalipsis 5:3

Na' nono bžel beṉe' zaca' gwzaše' yišen' ṉeca yaban' na' ṉe yežlion' na' ṉeca gan' že' beṉe' guat ca'. Ṉe to nono bžel beṉe' ḻa'c̱h le'ezden' nac naquen.

Apocalipsis 5:6

Nach ble'eda'ne' zeche' gan' chi' ben' chnabian' na' ladjo beṉe' ca' tap ben' zjažia x̱il, do gachoḻ beṉe' blao ca' tapechoa. Ble'eda'ne' ca to xila' dao' ben' ba gosote', ca xila' be žia gaže ḻozba' na' gaže yejlaoba'. Na' yejlaoban' gaže zejen zoa Spiritw c̱he Diosen' doxen ḻo yežlion' chonen can' ža Diosen'.

Apocalipsis 5:9

Nach beṉe' ca' gosoḻe' to da' cobe dan' ža: Zaco' jax̱i'o yišen' cont gwzašon' na' gwzoxjo' seyw ca' nyišen', ḻe bnežjw cuino' gosote' le'. Blalj xc̱heno' cont bṉitlaguo' xtoḻa'to', na' gwxi'o neto' cont nacto' ḻo na' Dios, neto' nacto' beṉe' to to nación, to to yež, to to diaža na' chacto' gwde gwdele diža' da' de ḻo yežlion'.

Apocalipsis 6:16

Na' gosene': ―C̱he'šca bdiṉj na' yej quinga na' ya'a quinga yesebix̱en yeseyenen chio' cont bi le'e Diosen' chio', Dios ben' chi' chnabia', na' yeseyenen chio' cont Jesucriston' ben' zaca'lebde' ca xila' daon' be gosot beṉe' ṉec̱he xtoḻa'gaque' bi gone' saca'zi'cho.